فيديو: إيجاد قاعدة لنمط أشكال

تكوِّن داليا أنماط أشكال باستخدام أعواد الثقاب. تسجل داليا أعواد الثقاب وعدد المربعات لكل شكل في الجدول التالي. حدِّد القاعدة المتَّبعة لتكوين الشكل التالي. [أ] إضافة ٨ أعواد ثقاب لتكوين مربعين إضافيين. [ب] إضافة ٦ أعواد ثقاب لتكوين ٤ مربعات إضافية. [ج] إضافة عودَيْ ثقاب لتكوين ٨ مربعات إضافية. [د] إضافة ٨ أعواد ثقاب لتكوين ٤ مربعات إضافية. [ﻫ] إضافة ٦ أعواد ثقاب لتكوين مربعين إضافيين.

٠٤:٤٥

‏نسخة الفيديو النصية

تكوِّن داليا أنماط أشكال باستخدام أعواد الثقاب. تسجِّل داليا أعواد الثقاب وعدد المربعات لكل شكل في الجدول التالي. حدِّد القاعدة المتبعة لتكوين الشكل التالي. أ: إضافة تمن أعواد ثقاب لتكوين مربعين إضافيين. ب: إضافة ست أعواد ثقاب لتكوين أربع مربعات إضافية. ج: إضافة عودَيْ ثقاب لتكوين تمن مربعات إضافية. د: إضافة تمن أعواد ثقاب لتكوين أربع مربعات إضافية. هـ: إضافة ست أعواد ثقاب لتكوين مربعين إضافيين.

السؤال بيقول لنا إن فيه بنت اسمها داليا بتستخدم أعواد الكبريت؛ علشان تعمل بيهم أشكال. فعملت هنا الشكل ده، وبعده الشكل التاني ده، وبعده الشكل التالت ده. وهي ماشية علي نمط معيَّن، سجلته في الجدول اللي قدامنا ده. حطت هنا الشكل الأول، وهنا الشكل التاني، وهنا الشكل التالت. وهنا عدد أعواد الثقاب. وهنا عدد المربعات.

فمثلًا عندنا في الشكل الأول أربع أعواد ثقاب، اللي هو الشكل الأول ده. وعبارة عن مربع واحد؛ لأن عدد المربعات واحد، وهو فعلًا مربع واحد. جت في الشكل التاني اللي هو ده، قالت إن عدد أعواد الثقاب عشرة، وعدد المربعات تلاتة. همّ فعلًا تلاتة مربعات، أهو ده الأول، وده التاني، وده التالت. وفي الشكل اللي بعده اللي هو الشكل التالت، قالت إن أعداد الثقاب اللي استخدمتها ستاشر عود، وإن عدد المربعات خمسة. أهم واحد، اتنين، تلاتة، أربعة، خمسة.

عاوزين نعرف بقى القاعدة اللي هي بتستخدمها هي أي قاعدة مِ اللي موجودة في الاختيارات. هنلاحظ إن في الشكل الأول كان عدد المربعات واحد، بعد كده بقى تلاتة؛ فمعنى كده إن هو زاد مربعين. الشكل الأول زوّدنا له مربع هنا، وزودنا له مربع هنا؛ فنتج لنا الشكل التاني. وإحنا علشان نزود مربع فوق ومربع تحت، بنحتاج تلات أعواد؛ عود هنا، وعود هنا، وعود هنا. يبقى كده إحنا استخدمنا هنا تلاتة. وعلشان نزود مربع هنا، بنعمل عود هنا، وعود هنا، وعود هنا. وكده تلاتة. تلاتة وتلاتة ستة.

فده معناه إن الشكل الأول برضو لمّا كان فيه أربعة أعواد بقوا عشرة؛ يعني زودناهم ست أعواد. نفس الكلام بالظبط حصل في الشكل التاني؛ زودنا هنا عود، وهنا عود، وهنا عود؛ يعني تلاتة. وزيهم هنا تلات أعواد؛ يعني برضو ضفنا ستة، فبقوا كلهم ستاشر عود، اللي هو نتج لنا الشكل الإيه؟ التالت. وعدد المربعات زاد مربعين؛ المربع ده، والمربع ده، يعني التلاتة بقت خمسة، يعني زودنا اتنين.

نفهم إيه بقى من اللي إحنا قلنا ده؟ نفهم إننا كل مرة بنزوّد ست أعواد ثقاب. كل مرة بنزود ست أعواد، وفي المقابل بيزيد مربعين. يبقى إحنا كده لمّا نيجي نقرأ الاختيارات، ونبص مثلًا على أول اختيار. هل إحنا كل مرة بنضيف تمن أعواد ثقاب علشان نكون مربعين؟ لأ، إحنا كل مرة بنضيف ست أعواد ثقاب علشان نزود مربعين. يبقى الاختيار الأول مش صح.

طب نشوف الاختيار اللي بعده. هل إحنا كل مرة بنضيف ست أعواد ثقاب؟ أيوه. علشان نكون أربع مربعات؟ لأ، ده إحنا كل مرة بنكون اتنين. فبرضو الاختيار ده للأسف كله مش صح.

الاختيار اللي بعده. كل مرة بنضيف عودين اتنين ثقاب علشان نعمل تمن مربعات؟ برضو غلط. إحنا قلنا كل مرة بنضيف ستة علشان نكون مربعين.

طيب وبالنسبة للاختيار اللي بعده. هل كل مرة بنزود تمن أعواد ثقاب علشان نزود أربعة مربعات؟ برضو لأ، مش صح.

طيب آخر اختيار. كل مرة بنزود ست أعواد ثقاب؟ أيوه، أهو كل مرة بنضيف ستة. علشان نكوِّن مربعين جداد؟ أيوه كل مرة المربعات بتزيد اتنين. فتبقى هي دي القاعدة الصح: إضافة ست أعواد ثقاب لتكوين مربعين إضافيين. هي دي الإجابة الصح.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.