فيديو: ربط النسب المئوية والكسور

عبِّر عن الجزء الملوَّن في النموذج الموضَّح على صورة نسبة مئوية.

٠١:٥٤

‏نسخة الفيديو النصية

عبِّر عن الجزء الملون في النموذج الموضح على صورة نسبة مئوية.

ومعطى عندنا الشكل اللي قدامنا ده. وهنلاحظ إن الشكل ده بيتقسّم إلى خمس أجزاء متساوية. بعد كده هنلاحظ إن عندنا الجزء الملون باللون الأزرق بيمثّل جزء واحد من الخمس أجزاء. فمعنى كده إننا لو عايزين نعبر عن الجزء الملون ده في صورة كسر، فهيبقى الجزء الملون بيمثّل جزء واحد من خمس أجزاء. يعني هيبقى الجزء الملون بيساوي واحد على خمسة. وده كده لو هنعبر عن الجزء الملون في صورة كسر. لكن المطلوب في السؤال إننا نعبر عن الجزء الملون على صورة نسبة مئوية.

وخلينا في الأول نفتكر إن النسبة المئوية هي عبارة عن كسر مقامه مية. فمعنى كده إننا عشان نعبّر عن الجزء الملون ده في صورة نسبة مئوية. يبقى عايزين الكسر اللي عندنا اللي هو واحد على خمسة يكون مقامه مية. فمعنى كده إننا عايزين نخلّي خمسة اللي في المقام تبقى مية. وعشان نخلّي خمسة مية، يبقى محتاجين نضربها في عشرين. وبنفس الطريقة زي ما ضربنا المقام في عشرين، يبقى نضرب البسط في عشرين؛ وده علشان نحافظ على نفس قيمة الكسر اللي هي واحد على خمسة. فلمّا نضرب واحد في عشرين هتبقى بتساوي عشرين، وهنكتبها في البسط. وأما المقام خمسة في عشرين بتساوي مية.

فبكده يبقى إحنا عبّرنا عن الجزء الملون في صورة كسر مقامه مية. وبكده نقدر نكتب الكسر ده في صورة نسبة مئوية. فعشرين على مية معناها عشرين في المية. فبكده يبقى إحنا كتبناها في صورة نسبة مئوية. وبالتالي هيبقى الجزء الملوّن اللي في النموذج اللي عندنا، بيمثّل عشرين في المية. وهتبقى هي دي إجابة السؤال.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.