فيديو: حساب الكسور الجبرية التي تتضمَّن أعدادًا عشرية

إذا كانت م = ٨٩٫٣، ل = ١٧٫٨، فأوجد قيمة م/ل لأقرب جزء من عشرة.

٠٤:٣٤

‏نسخة الفيديو النصية

إذا كانت م تساوي تسعة وتمانين وتلاتة من عشرة، وَ ل تساوي سبعتاشر وتمنية من عشرة، فأوجد قيمة م على ل، لأقرب جزء من عشرة.

يعني عايزين نوجد قيمة م على ل. وعشان نوجد قيمة م على ل، في الأول هنعوّض عن كل واحدة بقيمتها. يعني هنعوّض عن م بقيمتها، اللي هي تسعة وتمانين وتلاتة من عشرة. وهنعوّض عن ل بقيمتها، اللي هي سبعتاشر وتمنية من عشرة. فمعنى كده إننا عايزين نقسم العددين العشريين دول.

وعلشان نقسم أعداد عشرية، لازم أول حاجة بنعملها إننا هنحوّل العدد المقسوم عليه إلى عدد صحيح. وعلشان نحوّل سبعتاشر وتمنية من عشرة لعدد صحيح، هنضربه في عشرة. وبما إننا ضربنا المقام في عشرة، فبنفس الطريقة لازم نضرب البسط في عشرة؛ علشان يفضل الناتج بنفس قيمته.

فهنبدأ نحسب. وهنيجي في الأول عند البسط، اللي هو تسعة وتمانين وتلاتة من عشرة، في عشرة. فلمّا هنضربه هيساوي تمنمية تلاتة وتسعين. بعد كده هنيجي عند المقام. فهنضرب سبعتاشر وتمنية من عشرة، في عشرة، واللي هتساوي مية تمنية وسبعين. فكده بعد ما حوّلنا العدد المقسوم عليه من عدد كسري لعدد صحيح، نقدر دلوقتي نقسم تمنمية تلاتة وتسعين على مية تمنية وسبعين، باستخدام القسمة المطولة.

وهنكتب العددين بالشكل ده، وهنبدأ نقسم. ففي الأول هنقسم تمنية على مية تمنية وسبعين. وبما إن تمنية أقل من مية تمنية وسبعين، فبالتالي مش هينفع نقسمها. فهنجرب نقسم تسعة وتمانين. وبرضو هنلاقي إن هي أصغر من مية تمنية وسبعين، فبرضو مش هينفع نقسمها. فمعنى كده إننا هنقسم العدد كله، اللي هو تمنمية تلاتة وتسعين على مية تمنية وسبعين.

وبما إن تمنمية تلاتة وتسعين أكبر من مية تمنية وسبعين، فبالتالي هنقدر نقسمهم. لكن بما إننا عندنا أعداد كبيرة، فهيبقى صعب إننا نقسمهم. فهنقرب العددين دول لأعداد أسهل إننا نِقدر نقدّر قسمتهم. فهنيجي مثلًا عند تمنمية تلاتة وتسعين، فنقدر نقرّبها لتسعمية. وهنيجى عند مية تمنية وسبعين، وهنلاحظ إنها قريبة من مية وتمانين.

بعد كده هنشوف التسعمية هنا، فيها تقريبًا كام مية وتمانين. فبالتقدير ممكن نقول إن هي فيها خمسة. فهنيجي هنا عند القسمة المطولة، وهنكتب عند الناتج خمسة. وهنكتب خمسة هنا لأننا قسمنا العدد كله، اللي هو تمنمية تلاتة وتسعين، فهنكتبها فوق تلاتة. بعد كده هنضرب خمسة في مية تمنية وسبعين. فلمّا نحسبها، هتساوي تمنمية وتسعين. بعد كده هنطرح تمنمية تلاتة وتسعين ناقص تمنمية وتسعين. فلمّا نطرحها، هتساوي تلاتة.

وكده إحنا خلّصنا عملية القسمة المطولة. فهيبقى خارج القسمة عندنا هو خمسة، وهيتبقّى عندنا تلاتة، وهنكتبها هنا في البسط. والعدد اللي بنقسم عليه، اللي هو مية تمنية وسبعين، هنكتبه في المقام.

فإحنا كده بقى عندنا خارج القسمة في صورة عدد كسري. فعلشان نحوّله لعدد عشري، يبقى هنستخدم الآلة الحاسبة؛ علشان نقسم تلاتة على مية تمنية وسبعين. فلمّا نحسب تلاتة على مية تمنية وسبعين، باستخدام الآلة الحاسبة، هتساوي مية تمنية وستين من عشر آلاف. لكن إحنا عندنا هنا العدد الصحيح خمسة، فهنكتبه بعد العلامة العشرية، فهيبقى بيساوي خمسة ومية تمنية وستين من عشر آلاف.

لكن مطلوب في السؤال عندنا إننا نوجد قيمة م على ل، لأقرب جزء من عشرة. فلمّا نقرّب خمسة ومية تمنية وستين من عشر آلاف، لأقرب جزء من عشرة، هتبقى تقريبًا بتساوي خمسة. وبالتالي هيبقى قيمة م على ل تساوي خمسة.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.