فيديو: الطرح مع وجود أصفار

يوضح الفيديو طريقة طرح الأعداد التي بها أصفار عن طريق إعادة التجميع، ثم يعرض طريقة التأكد من الحل.

٠٥:٢٤

‏نسخة الفيديو النصية

هنتكلم عن الطرح مع وجود أصفار. هنتعلم إزاي نطرح مع وجود الأصفار.

هبتدي الشرح بالمثال التالي: إذا كانت كتلة حمولة بطيخ تلتمية كيلوجرام. وكتلة حمولة أخرى مية أربعة وتلاتين كيلوجرام. فما الفرق بين كتلتيهم؟

عشان نجيب الفرق بين كتلة حمولة البطيخ وكتلة الحمولة التانية، هنجيب ناتج طرح تلتمية ناقص مية أربعة وتلاتين. هنلاحظ إنه أحيانًا يجب التجميع أكتر من مرة، عشان نجيب ناتج الطرح. الخطوة رقم واحد هنطرح الآحاد. هنلاحظ إنه مش هينفع نطرح أربع آحاد من صفر آحاد. وبكده هنعيد التجميع. بس هنلاقي إنه ما فيش عشرات عشان أعيد تجميعها. إذن هعيد تجميع التلات مئات إلى عشر عشرات، واتنين مئات، زي ما هو موضح قدامي في النموذج. وبكده العشرات بقت عشرة، والمئات بقت اتنين.

خطوة رقم اتنين: هعيد تجميع عشر عشرات إلى عشرة آحاد، وتسع عشرات. يعني العشرات بقت تسعة، والآحاد بقت عشرة، زيّ ما موضح قدامي في النموذج. هبتدي بطرح الآحاد. عشر آحاد ناقص أربع آحاد هيساوي ست آحاد. باستعمال النموذج، هشطُب على أربع آحاد. فعلًا هيتبقّى ست آحاد.

بعد كده هطرح العشرات. تسع عشرات ناقص تلات عشرات هيساوي ست عشرات. باستعمال النماذج، هشطُب على تلات عشرات من التسع عشرات، هيتبقّى ست عشرات. وأخيرًا هطرح المئات. اتنين مئات ناقص واحد مئات، هيبقّى واحد مئات. إذن الإجابة هي: مية ستة وستين. وبكده أقدر أقول إنه الفرق بين كتلة حمولة البطيخ، وكتلة الحمولة التانية، مية ستة وستين كيلوجرام.

هنكمل في الصفحة اللي جاية. مثال: إذا كان عدد صفحات كتاب سلمى ألفين صفحة. وعدد صفحات كتاب منى ميتين تلاتة وخمسين صفحة. ما الفرق بين عدد صفحات كتاب سلمى وكتاب منى؟

عشان نجيب الفرق بين عدد صفحات كتاب سلمى وكتاب منى، هنطرح ألفين ناقص ميتين تلاتة وخمسين. الخطوة الأولى: هنعيد التجميع. هبتدي بطرح الآحاد. هنلاحظ إنه ما ينفعش نطرح تلات آحاد من صفر آحاد. وكمان ما فيش عشرات أو مئات عشان أعيد تجميعها. وبكده هعيد تجميع الألوف إلى واحد ألف، وعشر مئات. يعني الألوف بقت واحد، والمئات بقت عشرة.

خطوة رقم اتنين: هعيد تجميع واحد مائة إلى عشر عشرات. يعني المئات بعد ما آخُد منها واحد مائة، هتبقى تسعة، والعشرات هتبقى عشرة. خطوة رقم تلاتة: هعيد تجميع عشرة واحدة إلى عشر آحاد. فالآحاد هتبقى عشرة، والعشرات بدل ما هي عشرة هتبقى تسعة. بعد كده هطرح. عشر آحاد ناقص تلات آحاد هيساوي سبع آحاد. تسع عشرات ناقص خمس عشرات هيساوي أربع عشرات. تسع مئات ناقص اتنين مئات هيساوي سبع مئات. وأخيرًا واحد ألف ناقص صفر آلاف هيساوي واحد ألف.

إذن الناتج هو ألف سبعمية سبعة وأربعين. وبكده أقدر أقول إنه بيزيد على صفحات كتاب سلمى، على عدد صفحات كتاب منى، بألف سبعمية سبعة وأربعين صفحة. عشان نتأكد؛ بما إنه ألفين ناقص ميتين تلاتة وخمسين هيساوي ألف سبعمية سبعة وأربعين. هجمع الناتج ألف سبعمية سبعة وأربعين زائد العدد التاني اللي هو ميتين تلاتة وخمسين. هحصل على العدد الأولاني اللي هو ألفين. وبكده الإجابة صحيحة.

وبكده هنكون اتعلمنا إزاي نطرح مع وجود أصفار. واتعلمنا كمان إنه أحيانًا بنحتاج التجميع أكتر من مرة، عشان أجيب ناتج الطرح.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.