فيديو: امتحان الفيزياء • ٢٠١٧/٢٠١٦ • السؤال الرابع والثلاثون

امتحان الفيزياء • ٢٠١٧/٢٠١٦ • السؤال الرابع والثلاثون

٠١:٣٧

‏نسخة الفيديو النصية

اذكر دور ملف الحث في دائرة مصباح الفلورسنت.

مصباح الفلورسنت بيبقى جواه غازات خاملة وضغطها بيبقى قليل جدًّا. وبيبقى فيه فتيلتين، لما بيتوصلوا بالكهرباء بيصدروا إلكترونات. ولكن مقاومة الغاز اللي ما بين الفتلتين بتبقى كبيرة جدًّا. وبالتالي ما بيمشيش تيار ما بينهم. وعلشان كده لما بنوصَّل مصباح الفلورسنت بمصدر للتيار المتردد، بيبقى ليه دايرة خاصة. الدايرة دي بيبقى فيها ملف حث ومفتاح خاص. المفتاح ده أول ما بيمشي فيه تيار بيقفل الدايرة، ولكن بعد فترة زمنية معينة بيفتح الدايرة تاني.

فلما نوصَّل الدايرة بمصدر للتيار المتردد. المفتاح الخاص هيقفل الدايرة. وبالتالي التيار هيمشي من الملف لحدّ الفتيلة اللي على اليمين، ويطلع من الطرف التاني للفتيلة، ويمشي في الدايرة المغلقة اللي عملها المفتاح، لحدّ ما يوصل للفتيلة التانية ويرجع للمصدر. وطول الفترة اللي الدايرة مغلقة فيها بيتكوِّن مجال مغناطيسي جوّه ملف الحث، وده بيخزن جوّاه طاقة مغناطيسية. وزي ما قلنا بعد فترة معينة المفتاح الخاص بيفتح. فده بيقلِّل التيار اللي ماشي في الدايرة بسرعة جدًّا. والتغير المفاجئ اللي بيحصل في التيار ده، بيخلي ملف الحث يفرَّغ الطاقة المغناطيسية اللي جواه، بحيث إن التيار ما يتغيرش تغير مفاجئ. وده بيحصل عن طريق إن يبقى فيه فرق جهد عالي جدًّا بين طرفين ملف الحث؛ لدرجة إنه بيأيِّن ذرات الغاز الخامل اللي موجود جوَّه مصباح الفلورسنت. والأيونات دي بتساعد على نقل التيار بين الفتيلتين؛ وده بيؤدي لأن المصباح ينور.

فممكن كده نقول إن دور ملف الحث في دايرة مصباح الفلورسنت، إنه بيحصل تفريغ للطاقة المغناطيسية المختزنة في الملف خلال الغاز الخامل؛ مما يؤدي إلى تصادُم ذراته وتأيُّنها.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.