فيديو: ضرب الأعداد العشرية في أعداد طبيعية

يوضح الفيديو كيفية ضرب الأعداد العشرية في الأعداد الطبيعية، وطرق معرفة مكان العلامة العشرية في ناتج الضرب، وأمثلة عليها.

٠٦:٣٢

‏نسخة الفيديو النصية

ضرب الأعداد العشرية في أعداد طبيعية.

هنتكلّم في الفيديو ده عن عملية ضرب الأعداد العشرية في أعداد طبيعية. ضرب الأعداد العشرية ما بيختلفش كتير عن ضرب الأعداد الطبيعية. والاختلاف الوحيد بيكون في العلامة العشرية ومكانها. فيه طريقتين لمعرفة مكان العلامة العشرية. الطريقة الأولى هي التقدير. والطريقة التانية هي عدّ القيم المكانية العشرية. هنوضح الطريقتين بمثال.

عاوزين نضرب أربعتاشر واتنين من عشرة في ستة.

بالطريقة الأولى هنقدّر الأربعتاشر واتنين من عشرة. فهتبقى تقريبًا بتساوي أربعتاشر. بعدين هنضربها في الستة اللي هي العدد التاني. فالناتج هيساوي أربعة وتمانين. هنلاحظ إن العدد أربعة وتمانين مكوّن من رقمين.

بعدين نضرب العددين في بعض قبل التقدير بدون علامة عشرية، بالشكل ده. بعدين هنحط العلامة العشرية بعد رقمين من الشمال، بالشكل ده. فهيبقى الناتج خمسة وتمانين واتنين من عشرة.

بالطريقة التانية هنعدّ القيم المكانية العشرية. يعني عدد الأرقام اللي على يمين العلامة العشرية. فلو السؤال أربعتاشر واتنين من عشرة في ستة. هنلاقي إن عدد الأرقام بعد العلامة العشرية في العدد الأول رقم واحد. بعدين هنضرب، ونعدّ من اليمين رقم واحد ونحط العلامة العشرية. هيبقى الناتج بالشكل ده، خمسة وتمانين واتنين من عشرة، وهو نفس الناتج الأول.

نتنقل لصفحة تانية.

لو عاوزين نضرب تسعة في تلاتة وتمانين من مية.

بالطريقة الأولى هنقرّب التلاتة وتمانين من مية لواحد. فهيبقى السؤال تسعة في واحد هيساوي تسعة. وهنلاحظ إنه رقم واحد.

بعدين هنضرب العددين بدون العلامة العشرية. وهنحط العلامة العشرية بعد رقم واحد من الشمال، بالشكل ده. فالناتج هيبقى سبعة وسبعة وأربعين من مية.

بالطريقة التانية هنعدّ القِيَم المكانية العشرية، وهنضرب العددين في بعض. هنلاحظ إن عندنا قيمتين مكانيتين عشريتين. بعدين نعدّ القيم المكانية العشرية من اليمين، ونحط العلامة العشرية. فهيبقى الناتج سبعة وسبعة وأربعين من مية. نفس ناتج الطريقة الأولى.

طيب لو فيه أصفار على يمين العلامة العشرية هنعمل إيه؟ هنعتبر الأصفار كأنها أرقام. يعني مثلًا لو عاوزين حاصل ضرب اتنين في تمنتاشر من ألف. فأول حاجة هنعدّ الأرقام اللي في القيم المكانية العشرية، هنلاقيهم تلاتة. بعدين هنضرب العددين في بعض بدون العلامة العشرية. وبما إن العلامة العشرية كانت بعد تلات قيم مكانية في التمنتاشر من ألف، يبقى هنضيف صفر على شمال الستة وتلاتين، وبعدين نحط العلامة العشرية. فهيبقى الناتج ستة وتلاتين من ألف.

نتنقل لصفحة تانية. نحل مثال في الجبر.

لو عاوزين قيمة أربعة س؛ حيث قيمة س بتساوي سبعة وعشرين من عشرة آلاف.

هنعوّض عن قيمة س. فهيبقى أربعة س بتساوي أربعة في سبعة وعشرين من عشرة آلاف. وهنعدّ الأرقام اللي على يمين العلامة العشرية، هنلاقيهم أربع أرقام. بعدين نضرب بدون العلامة العشرية. بعدين نعدّ من اليمين أربع أرقام. فهنضيف صفر، بعد كده نحط العلامة العشرية. فهيبقى الناتج مية وتمنية من عشرة آلاف.

طيب لو عاوزين نضرب عدد عشري في عشرة أو مية أو ألف. بنعمل ده إزّاي؟ فيه طريقتين لده هنوضحهم بالمثال دلوقتي.

لو عاوزين حاصل ضرب خمسة وسبعة من عشرة في ألف.

الطريقة الأولى: هنشوف كام رقم على يمين العلامة العشرية، هنلاقيه رقم واحد. بعدين نضرب الرقمين في بعض بدون العلامة العشرية. بعدين نعدّ من اليمين قيمة مكانية عشرية واحدة، ونحط العلامة العشرية بالشكل ده. فالناتج هيبقى خمسة آلاف وسبعمية.

الطريقة التانية هنحرّك العلامة العشرية بعدد الأصفار. يعني الألف فيها تلات أصفار. فهيبقى خمسة وسبعة من عشرة. هنحرّك العلامة العشرية باتجاه اليمين بعدد الأصفار؛ يعني هنتحرك تلات قيم مكانية عشرية بالشكل ده. ونحط أصفار في الأماكن الفاضية، فهيبقى الناتج خمسة آلاف وسبعمية. وهو نفس ناتج الطريقة الأولى.

وبكده نبقى خلصنا الفيديو ده اللي اتكلّمنا فيه عن ضرب الأعداد العشرية في أعداد طبيعية.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.