فيديو: طرح النقود

يوضح الفيديو طريقة طرح النقود التي تُطرح كطرح الأعداد، أو باستخدام النماذج.

٠٤:١٤

‏نسخة الفيديو النصية

هنتكلم عن طرح النقود. هنتعلم إزاي نطرح النقود. هبتدي شرح بالمثال التالي. يتمّ بيع صور الحائط الكبيرة بأربعة وتسعين جنيه، وصور الحائط الصغيرة باتنين وأربعين جنيه. كم يكون الفرق في التكلفة؟

عشان نجيب الفرق في التكلفة، هنطرح أربعة وتسعين جنيه، ناقص اتنين وأربعين جنيه. هنلاحظ إنه طرح النقود زيّ طرح الأعداد. هنستعمل طريقتين. الطريقة الأولى هنستعمل النماذج. هنمثّل أربعة وتسعين جنيه باستعمال الأوراق النقدية. هنستعمل ورقة نقدية بخمسين جنيه، وورقتين كل واحدة فيهم بعشرين جنيه. يبقى إحنا كده كوّنّا تسعين جنيه. وعشان نكوّن أربعة جنيه، هنستعمل أربع أوراق نقدية، كل ورقة بواحد جنيه.

بعد كده عشان نطرح اتنين وأربعين جنيه، هطرح اتنين جنيه الأول. يعني هشيل ورقة بجنيه، وأشيل ورقة تانية بجنيه. وبعد كده هطرح أربعين جنيه. يعني هشيل الورقتين اللي كل واحدة فيهم بعشرين جنيه. هلاحظ إن اتبقّى عندي خمسين جنيه، زائد جنيه، زائد جنيه. يعني ناتج الطرح هو اتنين وخمسين جنيه.

الطريقة التانية هي طرح الأعداد. هنطرح أربعة وتسعين جنيه، ناقص اتنين وأربعين جنيه. هبتدي بطرح الآحاد. أربع آحاد ناقص اتنين آحاد، هيساوي اتنين آحاد. بعد كده هطرح العشرات. تسع عشرات ناقص أربع عشرات، هيساوي خمس عشرات. إذن ناتج الطرح اتنين وخمسين جنيه. وهو هو نفس الناتج اللي حصلنا عليه بالطريقة الأولى. وبكده أقدر أقول إنه الفرق في التكلفة هو اتنين وخمسين جنيه.

هنكمل في الصفحة اللي جاية. هنلاحظ كمان إن طرح النقود زيّ طرح الأعداد؛ بنحتاج أحيانًا إلى إعادة التجميع. هناخد مثال. اشترى مصطفى أدوات مكتبية بمبلغ تسعة وخمسين جنيه. واشترت منى أدوات مكتبية بمبلغ خمسة وسبعين جنيه. فكم جنيه دفعت منى أكتر مما دفع مصطفى؟

عشان أجيب كام جنيه دفعت منى أكتر مما دفع مصطفى، هطرح خمسة وسبعين جنيه، ناقص تسعة وخمسين جنيه. في البداية هستعمل التقدير؛ هقرب كلٍّ من العددين إلى أقرب عشرة. خمسة وسبعين إلى أقرب عشرة هتبقى تمانين. ناقص … تسعة وخمسين إلى أقرب عشرة هتبقى ستين. تمانين ناقص ستين، هيساوي عشرين جنيه. إذن ناتج التقدير هو عشرين جنيه.

دلوقتي هجيب الناتج الدقيق. هطرح خمسة وسبعين جنيه، ناقص تسعة وخمسين جنيه. هبتدي بطرح الآحاد. هلاحظ إنه مش هينفع أطرح تسع آحاد، من خمس آحاد. وبكده هعيد تجميع واحد عشرة، إلى عشر آحاد. فالعشرات هتبقى ست عشرات. والآحاد هتبقى خمس آحاد، زائد عشر آحاد، يعني خمستاشر آحاد.

بعد كده هطرح خمستاشر آحاد ناقص تسع آحاد، هيساوي ست آحاد. بعد كده هطرح العشرات. ست عشرات ناقص خمس عشرات، هيساوي واحد عشرة. وبكده أقدر أقول إنه دفعت منى ستاشر جنيه، أكتر مما دفع مصطفى. هنلاحظ إنه ستاشر قريبة جدًّا من ناتج التقدير، وهو عشرين. إذن الإجابة منطقية.

و عشان نتأكد أكتر، بما إنه خمسة وسبعين ناقص تسعة وخمسين، هيساوي ستاشر. هجمع ستاشر زائد العدد التاني، اللي هو تسعة وخمسين. هحصل على خمسة وسبعين، العدد الأولاني. وبكده أقدر أقول إن الإجابة صحيحة.

وبكده هنكون اتعلّمنا إزاي نطرح النقود. وكمان لاحظنا إن طرح النقود زيّ طرح الأعداد؛ بنحتاج أحيانا إلى إعادة التجميع.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.