فيديو: المقارنة بين الأعداد الكسرية والأعداد العشرية

أكمل ٥/٤ ٩ _ ٩٫٧٦ باستخدام< أو = أو >.

٠٣:٠٧

‏نسخة الفيديو النصية

أكمل: تسعة وأربعة على خمسة، نقط، تسعة وستة وسبعين من مية؛ باستخدام أقل من، أو يساوي، أو أكبر من.

في المثال ده عايزين نقارن بين عدد كسري هو تسعة وأربعة على خمسة، وعدد عشري هو تسعة وستة وسبعين من مية؛ باستخدام علامة أقل من، أو يساوي، أو أكبر من. وبما إن عندنا عدد كسري وعدد عشري وعايزين نقارن بينهم. فأول حاجة هنعملها إننا نكتبهم همّ الاتنين في نفس الصورة؛ وده علشان نقدر نقارن بينهم.

فهنكتب العدد الكسري تسعة وأربعة على خمسة في صورة عدد عشري. فبالنسبة للعدد الكسري تسعة وأربعة على خمسة، فهو عبارة عن عدد صحيح هو تسعة، وكسر هو أربعة على خمسة. وعلشان نكتبه في صورة عدد عشري، عايزين نخلّي المقام بتاع الكسر اللي هو خمسة يساوي عشرة أو مية أو ألف وهكذا. فهنلاحظ إن إحنا ممكن نخلّي المقام اللي هو خمسة يساوي عشرة، بإننا نضربه في اتنين. لكن علشان نحافظ على الكسر زي ما هو، فزي ما ضربنا المقام في اتنين، كمان هنضرب البسط في اتنين.

فمعنى كده إن العدد الكسري تسعة وأربعة على خمسة، يساوي تسعة زائد أربعة على خمسة. ولمّا هنضرب كلًّا من البسط والمقام بتاع الكسر أربعة على خمسة في اتنين، هيبقى العدد الكسري تسعة وأربعة على خمسة، يساوي تسعة زائد تمنية على عشرة. والكسر تمنية على عشرة نقدر نحوّله بكل سهولة لعدد عشري؛ وده لأن تمنية على عشرة معناها تمن أجزاء من عشرة. فمعنى كده إن الكسر تمنية على عشرة يساوي العدد العشري تمنية من عشرة.

بكده العدد الكسري تسعة وأربعة على خمسة، يساوي تسعة زائد تمنية من عشرة. ولمّا هنجمع هنلاقي العدد الكسري تسعة وأربعة على خمسة يساوي العدد العشري تسعة وتمنية من عشرة.

كده إحنا كتبنا العدد الكسري تسعة وأربعة على خمسة في صورة عدد عشري هو تسعة وتمنية من عشرة. بعد كده هنقارن بين تسعة وأربعة على خمسة وتسعة وستة وسبعين من مية، باستخدام أقل من أو يساوي أو أكبر من.

بالنسبة للعدد الكسري تسعة وأربعة على خمسة، فهو في صورة عدد عشري يساوي تسعة وتمنية من عشرة. فمعنى كده إن إحنا هنقارن تسعة وتمنية من عشرة، وتسعة وستة وسبعين من مية. فهنبدأ نقارن القيم المكانية من الأكبر للأصغر.

أكبر قيمة مكانية عندنا هي الآحاد، فهنلاقي الرقم اللي موجود في الآحاد متساوي وهو تسعة. بعد كده هنقارن خانة الأجزاء من عشرة، فهنلاقي رقمين مختلفين؛ واحد تمنية، والتاني سبعة. والتمنية أكبر من سبعة. فمعنى كده إن تسعة وتمنية من عشرة أكبر من تسعة وستة وسبعين من مية. وبما إن العدد العشري تسعة وتمنية من عشرة يساوي العدد الكسري تسعة وأربعة على خمسة. فمعنى كده إن العدد الكسري تسعة وأربعة على خمسة، أكبر من العدد العشري تسعة وستة وسبعين من مية.

فبالتالي لمّا هنكمّل هنستخدم علامة أكبر من؛ وده لأن تسعة وأربعة على خمسة أكبر من تسعة وستة وسبعين من مية. وهو ده المطلوب.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.