فيديو: مقارنة الكسور

يوضح الفيديو كيفية مقارنة الكسور لمعرفة أيها أكبر أو أصغر أو متكافئ باستخدام النماذج والصور، وترتيبها بناءً على ذلك، وأمثلة عليها.

٠٤:٢٣

‏نسخة الفيديو النصية

مقارنة الكسور.

في الفيديو ده هنتعلم إزاي بنقارن الكسور ونرتبها. نقدر نقارِن بين الكسور عشان نعرف الكسر الأكبر والكسر الأصغر والكسور المتكافئة. وعشان نعمل ده ممكن نستخدم النماذج أو الصور. نحل مثال ونشوف هنعمل ده إزاي.

سارة وصالح بيقرأوا نفس الكتاب. فسارة قرأت خمسة على تمنية من الكتاب. وصالح قرأ تلاتة على تمنية من الكتاب. فمين فيهم قرأ أكتر؟

هيظهر قدامنا نموذجين لكسور مُقسَّمين لتمن أجزاء متساوية. الشكل الأول محدَّد فيه خمس أجزاء، وهو معبِّر عن اللي قرأته سارة. والشكل التاني محدَّد فيه تلاتة أجزاء، وهو معبر عن اللي قرأه صالح. بمجرد النظر نقدر نلاحظ إن الأجزاء المحدَّدة في الشكل الأول أكتر من الأجزاء المحددة في الشكل التاني. يعني خمسة على تمنية أكبر من تلاتة على تمنية. أو تلاتة على تمنية أصغر من خمسة على تمنية. وده معناه إن سارة قرأت أكتر من صالح.

نقدر برضو نقارن الكسور اللي ليها مقام مختلف. نتنقل لصفحة تانية، ونشوف إزاي.

إبراهيم وعبد الرحمن دخلوا مطعم. وكل واحد فيهم طلب وجبة فإبراهيم أكل نص أو واحد على اتنين من وجبته. وعبد الرحمن أكل تلاتة على أربعة أو تلاتة أرباع وجبته. فمين فيهم أكل أقل من التاني إذا كانت الوجبتين متساويتين في الحجم؟

يعني المطلوب نقارن ما بين واحد على اتنين وتلاتة على أربعة. هيظهر قدامنا دلوقتي دائرتين متساويتين. الأولى متلوِّن منها واحد على اتنين. والتانية متلون منها تلاتة على أربعة. بمجرد النظر نقدر نلاحظ إن الجزء الملوَّن في الدائرة الأولى أصغر من الجزء الملون في الدائرة التانية. وده معناه إن واحد على اتنين أصغر من تلاتة على أربعة. أو تلاتة على أربعة أكبر من واحد على اتنين. يعني ابراهيم أكل أقل من عبد الرحمن.

لازم ننتبه إن في حالة مقارنة الكسور، لازم نتأكد إن الكل متساوي في الكسرين. يعني مثلًا لازم الوجبتين في المثال ده يكونوا قَدّ بعض؛ عشان نقدر نقارن ما بينهم.

نتنقل لصفحة تانية، ونحل مثال تاني.

هيظهر قدامنا تلات دوائر متساوية. الأولى هنلوِّن منها واحد على أربعة. والتانية هنلوِّن منها خمسة على تمنية. والتالتة هنلوِّن منها تلاتة على تمنية. ومطلوب إننا نقارن ما بين الكسور دي ونرتبهم من الأكبر للأصغر.

بمجرد النظر نقدر نلاحظ إن أكتر دائرة متلوِّن منها هي الدائرة التانية خمسة على تمنية. تليها الدائرة التالتة تلاتة على تمنية. تليها الدائرة الأولى واحد على أربعة. وده معناه إن خمسة على تمنية، أكبر من تلاتة على تمنية، أكبر من واحد على أربعة. أو واحد على أربعة، أصغر من تلاتة على تمنية، أصغر من خمسة على تمنية.

وبكده نبقى خلصنا الفيديو ده اللي اتعلِّمنا فيه إزاي بنقارن الكسور ونرتبها.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.