فيديو: تحديد الأشكال

نادر عاطف

ما الشكل الهندسي الذي تمثِّله الصورة؟ [أ] كرة. [ب] مكعب. [ج] متوازي مستطيلات. [د] مخروط. [ه] أسطوانة.

٠١:٤٣

‏نسخة الفيديو النصية

ما الشكل الهندسي الذي تمثله الصورة؟ ومُعطى عندنا الشكل الهندسي اللي في الصورة ده، وعايزين نعرف إذا كان هو كرة، ولا مكعب، ولا متوازي مستطيلات، ولا مخروط، ولا أسطوانة.

فهنلاحظ إن الشكل اللي عندنا هو جسم كروي، له سطح واحد، وفي نفس الوقت ليس له أوجه أو أضلاع أو حواف، فبالتالي هيبقى برضو مالوش زوايا ولا ليه رؤوس؛ فمعنى كده، فبالتالي هيبقى الشكل الهندسي ده ما ينفعش يكون مكعب؛ لأن المكعب بيبقى ليه ست أوجه متماثلة الشكل، وكل وجه عبارة عن مربع. وفي نفس الوقت ما ينفعش يكون متوازي مستطيلات؛ لأن متوازي المستطيلات برضو ليه ست أوجه، وكل وجه ليه أربع أضلاع، وبيكون على شكل مستطيل. وبرضو ما ينفعش إن الشكل الهندسي اللي قدامنا يكون مخروط؛ لأن المخروط بيبقى ليه قاعدة دائرية الشكل مسطحة، والشكل اللي قدامنا ده ما فيهوش قاعدة دائرية الشكل، لأنه كله عبارة عن سطح واحد.

وآخر حاجة عندنا الأسطوانة، وبرضو ما ينفعش يكون أسطوانة؛ لأن الأسطوانة بيبقى لها قاعدتين على شكل دائرة.

فبالتالي هيبقى الشكل الهندسي اللي عندنا هو شكل كرة؛ لأن الكرة ليها سطح واحد، وفي نفس الوقت مالهاش جوانب أو أضلاع، فزي الشكل اللي قدامنا ده، وبرضو ما فيهاش زوايا أو رؤوس؛ فبالتالي هيبقى الشكل اللي قدامنا ده هو شكل الكرة.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.