تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.

فيديو: إيجاد مساحة شكل مركَّب من مستطيل ومثلث

سوزان فائق

احسب مساحة الشكل الآتي.

٠٢:٢١

‏نسخة الفيديو النصية

احسب مساحة الشكل.

الشكل اللي قدامنا ده عبارة عن شكل مركّب من مثلث لو كملنا القاعدة بتاعته كده، والجزء اللي تحت ده عبارة عن مستطيل؛ لأن فيه زاويتين قائمتين متقابلتين وضلعين متقابلين متساويين، وواضح إن هم متوازيين فبيمثل مستطيل، علشان نحسب مساحة الشكل هنحسب مساحة المثلث اللي فوق ده ومساحة المستطيل ونجمعهم على بعض.

مساحة المثلث بتساوي نص طول القاعدة في الارتفاع، القاعدة في المثلث اللي عندنا دي متقسمة تلات أجزاء: عشرة متر، وعشرة متر، وحتة في النص اللي لونها برتقالي دي طولها تلاتة وعشرين متر زي الضلع اللي تحت في المستطيل، يبقى القاعدة هتساوي عشرة زائد عشرة زائد تلاتة وعشرين؛ يعني هتساوي تلاتة وأربعين متر، ارتفاع المثلث اللي هو هيبقى الجزء ده اللي هو جزء من الخط المنقط اللي طوله اتنين وتلاتين متر، وعشان نعرف نوجد قيمته يبقى الاتنين وتلاتين متر كلها هنطرح منها الأربعة وعشرين متر دول عشان يتبقى لنا الحتة اللي فوق دي بس نعرف طولها كام، يعني الحتة الصغيرة دي هتساوي اتنين وتلاتين ناقص أربعة وعشرين، يبقى تمنية متر، يبقى ارتفاع المثلث تمنية متر، مساحة المثلث هتساوي نص في تلاتة وأربعين في تمنية، يعني هتساوي مية اتنين وسبعين متر مربع.

هنوجد مساحة المستطيل اللي هي بتساوي الطول في العرض، الطول اللي هو الضلع ده طوله أربعة وعشرين متر في العرض اللي هو الضلع ده يبقى تلاتة وعشرين متر، يبقى مساحة المستطيل هتساوي أربعة وعشرين في تلاتة وعشرين يعني هتساوي خمسمية اتنين وخمسين متر مربع.

مساحة الشكل كله هتبقى مساحة المثلث زائد مساحة المستطيل؛ يعني هتساوي مية اتنين وسبعين زائد خمسمية اتنين وخمسين، هتساوي سبعمية أربعة وعشرين متر مربع، وهي دي المساحة المطلوبة.