فيديو: إيجاد أطوال الأضلاع المجهولة في مثلث باستخدام نظرية منصِّف الزاوية

أوجد طول كلٍّ من دﺏ، دﺟ، إذا كان ﺃﺏ = ٣٨، ﺃﺟ = ١٨، ﺏﺟ = ٢٨.

٠٢:٣٠

‏نسخة الفيديو النصية

أوجد طول كل من د ب وَ د ج، إذا كان أ ب يساوي تمنية وتلاتين، أ ج يساوي تمنتاشر، ب ج يساوي تمنية وعشرين.

لو بصّينا على الرسم هنلاقي إن أ د بينصّف الزاوية ب أ ج. يبقى في الحالة اللي عندنا زاوية رأس المثلث اتنصّفت. يبقى المنصِّف اللي هو أ د، هيقسم قاعدة المثلث إلى جزئين، النسبة بين طوليهما تساوي النسبة بين طولي الضلعين الآخرين. يبقى القاعة اتقسمت إلى جزئين، اللي همّ ب د وَ د ج. النسبة بينهم هتساوي النسبة بين طولي الضلعين الآخرين، اللي همّ أ ب وَ أ ج. يبقى ب د على د ج بيساوي أ ب على أ ج. ب د على د ج بيساوي … أ ب اللي هو تمنية وتلاتين، على أ ج تمنتاشر. يبقى ب د على د ج بيساوي تمنية وتلاتين على تمنتاشر.

هنضرب الطرفين في د ج، هيبقى ب د بيساوي تمنية وتلاتين على تمنتاشر، في د ج. نعرف إن ب ج مُعطى بيساوي تمنية وعشرين. ب ج هو عبارة عن ب د زائد د ج. ب ج اللي هو ب د زائد د ج بيساوي تمنية وعشرين. ب د بتساوي تمنية وتلاتين على تمنتاشر د ج، نعوّض عنها. يبقى تمنية وتلاتين على تمنتاشر د ج، اللي هي قيمة ب د. زائد د ج بيساوي تمنية وعشرين.

هنجمع يبقى تمنية وعشرين على تسعة د ج بيساوي تمنية وعشرين. هنضرب الطرفين في تسعة على تمنية وعشرين. هيبقى د ج بتساوي تمنية وعشرين في تسعة على تمنية وعشرين. وده بيساوي تسعة. يبقى د ج بيساوي تسعة.

ب د بيساوي تمنية وتلاتين على تمنتاشر د ج. قدرنا نجيب د ج اللي هي قيمتها بتسعة. يبقى ب د بيساوي تمنية وتلاتين على تمنتاشر في تسعة. يبقى ب د بيساوي تسعتاشر. يبقى المطلوب منّنا إن إحنا نوجِد طول د ب و د ج. د ب بيساوي تسعتاشر، وَ د ج بيساوي تسعة.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.