فيديو: النموذج التجريبي الأول • الإستاتيكا • ٢٠١٩ • السؤال السادس

النموذج التجريبي الأول • الإستاتيكا • ٢٠١٩ • السؤال السادس

٠٢:٥٨

‏نسخة الفيديو النصية

القطعة المستقيمة أ ب قضيب منتظم طوله أربعة متر، ووزنه مية نيوتن. يتصل القضيب عند النقطة أ بمفصل مثبّت في حائط رأسي. أثّرت قوة ق على القضيب، فأبقته في وضع اتزان. إذا كانت س وَ ص مركّبتا رد فعل المفصل عند أ، فأوجد قيمة ص بالنيوتن.

عندنا في الشكل اللي قدّامنا أ ب قضيب وزنه مية نيوتن. من طرفه أ مثبّت في حائط رأسي، اللي هو أ د. ومن طرفه ب فيه قوة ق أثّرت عليه. القضيب ده في وضع اتزان. وَ س وَ ص همَا مركّبتا رد فعل المفصل عند النقطة أ. ومطلوب نعرف قيمة ص.

بما أن القضيب ده متزن، يبقى بينعدم مجموع القياسات الجبرية لعزوم القوى بالنسبة لأيّ نقطة في مستواه. يعني إيه؟

يعني إحنا عندنا القضيب أ ب بتؤثّر عليه مجموعة من القوى؛ القوة ق، والقوة مية نيوتن، والقوتين س وَ ص. القوى دي كلها مستوية في نفس المستوى. لو إحنا خدنا أيّ نقطة في نفس المستوى ده، وأوجدنا مجموع عزوم القوى حواليها؛ هينعدم وهيساوي الصفر. إحنا محتاجين نعرف قيمة ص؛ يبقى هنختار النقطة ب، ونحسب مجموع عزوم القوى حواليها. طيّب إشمعنى اخترنا النقطة ب؟

لأن القوة ق والقوة س الاتنين بيمُرّوا أو خط عملهم بيمُرّ بالنقطة ب. يعني بُعدهم عن النقطة ب هيساوي الصفر. فهنتخلّص منهم ومش هيكونوا موجودين عندنا في المعادلة. لكن القوتين اللي هيتبقّوا لنا هم القوة ص، والقوة مية نيوتن. فكده القانون اللي هنستخدمه هو: ج ب بتساوي الصفر، أو مجموع عزوم القوى حوالين النقطة ب هيساوي الصفر.

نبدأ بالقوة مية نيوتن. اتجاه دوران خط عمل القوة مية نيوتن حوالين النقطة ب عكس اتجاه دوران عقارب الساعة، يعني إشارته موجبة. والبُعد العمودي بينه وبين النقطة ب هو طول الجزء ده، اللي هو نُصّ طول القضيب. وإحنا عندنا طول القضيب أربعة متر، يبقى نُصّه اتنين متر. فكده نقدر نقول القوة مية مضروبة في البُعد اتنين.

نيجي للقوة ص. اتجاه دوران خط عمل القوة ص حوالين النقطة ب في نفس اتجاه دوران عقارب الساعة، يعني هتكون إشارته سالبة. والبُعد العمودي بين خط عمل القوة ص والنقطة ب هو طول القضيب كله أ ب، اللي هو أربعة متر. فنقول سالب ص في أربعة. ده كله بيساوي الصفر. يبقى عندنا ميتين ناقص أربعة ص بتساوي الصفر. يبقى أربعة ص بتساوي ميتين.

وبقسمة الطرفين على أربعة، تبقى ص بتساوي خمسين نيوتن. وهي دي الإجابة الصح.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.