فيديو: ضرب عدد من رقمين في عدد من رقم واحد دون إعادة التجميع

يوضح الفيديو كيفية ضرب عددين أحدهما مكوَّن من رقمين، والآخَر مكوَّن من رقم واحد بدون إعادة التجميع.

٠٦:٠٣

‏نسخة الفيديو النصية

هنتكلّم عن ضرب عدد من رقمين في عدد من رقم واحد دون إعادة التجميع. هنتعلّم إزاي نضرب عدد من رقمين في عدد من رقم واحد دون إعادة التجميع. هنبتدي الشرح بالمثال التالي.

مثال: مع كلٍّ من عمر وأخويه تلتاشر كرة. ما عدد الكرات لديهم جميعًا؟

عشان أجيب عدد الكرات اللي مع عمر وأخويه كلهم هجيب حاصل ضرب تلاتة في تلتاشر. ممكن نستعمل حقايق الضرب اللي نعرفها عشان نجيب ناتج ضرب تلاتة في تلتاشر من خلال إيجاد نواتج الضرب الجزئية. يعني هنضرب كل مكوّن من أحد العددين في مكوّنات العدد الآخَر بشكل منفصل. وبعدين هنجمع نواتج الضرب الجزئية للحصول على ناتج الضرب النهائي.

هنستعمل الشبكة التالية. هنلاحظ قدّامي الشبكة مكوّنة من تلتاشر عمود، وتلات صفوف. هقسّم التلتاشر عمود إلى تلات أعمدة، وعشر أعمدة. هنلاحظ إنه الجزء اللي باللون الأحمر بيمثّل تلاتة في تلاتة. والجزء اللي باللون الأسود بيمثّل تلاتة في عشرة. دلوقتي هجيب نواتج الضرب الجزئية، وبعدين أجمعها.

تلاتة في تلاتة هيساوي تسعة، وتلاتة في عشرة هيساوي تلاتين. هجمع تسعة زائد تلاتين هيساوي تسعة وتلاتين. وبكده أقدر أقول إنه حاصل ضرب تلاتة في تلتاشر هيساوي تسعة وتلاتين. يعني مع عمر وأخويه تسعة وتلاتين كرة. هنكمّل في الصفحة اللي جايّة.

هنلاحظ كمان ممكن نستعمل نماذج المستطيلات عشان نجيب ناتج الضرب. هناخد مثال.

مثال: في مكتبة رفّان من الكتب يتسع كلّ منهما إلى تلاتة وعشرين كتاب. ما عدد الكتب التي يمكن وضعها على الرفّين؟

في البداية عشان نجيب عدد الكتب اللي هنقدر نحطّها في الرفّين، هنجيب حاصل ضرب اتنين في تلاتة وعشرين. في البداية هنقدّر الناتج هنضرب اتنين في … تلاتة وعشرين هنقرّبها إلى أقرب عشرة، فهتبقى عشرين. اتنين في عشرين هيساوي أربعين. يعني ناتج التقدير هيساوي أربعين.

دلوقتي هنجيب حاصل الضرب للعددين اتنين في تلاتة وعشرين. هنلاحظ إنه تلاتة وعشرين بتساوي تلاتة زائد عشرين. هنستعمل النموذج. عرض المستطيل هيمثّل العدد اتنين، وطول المستطيل هيمثّل العدد تلاتة وعشرين؛ اللي هو تلاتة زائد عشرين.

إذن الجزء الأولاني من المستطيل هو عبارة عن حاصل ضرب اتنين في تلاتة، هيساوي ستة. والجزء التاني من المستطيل هيكون عبارة عن حاصل ضرب اتنين في عشرين، واتنين في عشرين هيساوي أربعين.

دلوقتي هنجمع نواتج الضرب الجزئية؛ وهي ستة، وأربعين. إذن أقدر أقول إنه ستة زائد أربعين هيساوي ستة وأربعين. يعني اتنين في تلاتة وعشرين هيساوي ستة وأربعين. وبكده أقدر أقول إنه يمكن وضع ستة وأربعين كتاب على الرفّين. هنلاحظ إنه ناتج الضرب قريب جدًّا من ناتج التقدير. إذن الإجابة منطقية.

يعني بطريقة تانية تلاتة وعشرين في اتنين. ضربنا الأول اتنين في تلاتة، وكان بيساوي ستة. وبعدين ضربنا اتنين في عشرين هيساوي أربعين. وجمعنا نواتج الضرب الجزئية؛ فحصلنا على ستة وأربعين. هنكمّل في الصفحة اللي جايّة.

هنلاحظ إنه ممكن كمان نضرب عدد في رقم واحد بدون ما نستعمل النماذج. هناخد مثال.

أوجد ناتج ضرب تلاتة في اتنين وتلاتين.

الخطوة الأولى: هنضرب في الآحاد. تلاتة في اتنين آحاد هيساوي ست آحاد؛ يعني هيساوي ستة.

الخطوة التانية: هنضرب في العشرات. تلاتة في تلات عشرات هيساوي تسع عشرات؛ يعني هيساوي تسعين. وبكده أقدر أقول إنه حاصل ضرب تلاتة في اتنين وتلاتين هيساوي ستة وتسعين.

هنتأكّد بالنموذج. عرض المستطيل هيكون عبارة عن العدد تلاتة، وطول المستطيل هيكون عبارة عن العدد اتنين وتلاتين؛ هنقسّمه لاتنين زائد تلاتين.

الجزء الأولاني من المستطيل هيكون عبارة عن حاصل ضرب تلاتة في اتنين، هيساوي ستة. والجزء التاني من المستطيل هيكون عبارة عن حاصل ضرب تلاتة في تلاتين، هيساوي تسعين. بعدين هنجمع نواتج الضرب الجزئية؛ ستة زائد تسعين هيساوي ستة وتسعين. نفس الناتج اللي حصلنا عليه بالطريقة الأولى.

وبكده هنكون اتعلّمنا إزاي نضرب عدد من رقمين في عدد من رقم واحد بدون إعادة التجميع. وقُلنا ممكن نستعمل نماذج المستطيلات عشان نجيب ناتج ضرب العددين، وممكن نضرب عدد في عدد من رقم واحد بدون ما نستعمل النماذج.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.