فيديو: فهم القيمة المكانية عند جمع عددين صحيحين

أكمل: ٤ + ٣ = _، ٤ عشرات + ٣ عشرات = _، ٤٠ + ٣٠ = _.

٠٢:٤٧

‏نسخة الفيديو النصية

أكمل: أربعة زائد تلاتة تساوي، نقط. أربعة عشرات زائد تلاتة عشرات تساوي، نقط. وأربعين زائد تلاتين تساوي، نقط.

هنحلّ جزء جزء من السؤال ده. أول جزء بيقول لنا إيه؟ أربعة زائد تلاتة تساوي، نقط. هنحطّ الأربعة في مخّنا والتلاتة على إيدينا، ونعدّ؛ بعد الأربعة، خمسة، ستة، سبعة. يبقى أربعة زائد تلاتة تساوي سبعة. كده نكون حلّينا أول جزء من السؤال. نكتبه هنا في مكان النقط: أربعة زائد تلاتة سبعة.

الجزء التاني: أربعة عشرات زائد تلاتة عشرات تساوي، نقط. هو إحنا مش قلنا: إن أربعة زائد تلاتة تساوي سبعة، لسه حالّينها؟ طيب لو جينا نزوّد كلمة عشرات، يبقى ولا كأننا عملنا حاجة؟ ليه؟ أو إزّاي؟ أربعة عشرات هي الأربعة بس زوّدنا عليها عشرات، زائد … تلاتة عشرات هي التلاتة بس زوّدنا عليها عشرات. أربعة زائد تلاتة تساوي إيه؟ تساوي سبعة. سبعة إيه؟ عشرات. عشان تبقى هي هي هي السبعة. طيب يبقى معنى كده إن أربعة عشرات زائد تلاتة عشرات تساوي سبعة عشرات. وآدي تاني جزء من السؤال كمّلناه؛ سبعة عشرات.

نيجي لتالت جزء والأخير: أربعين زائد تلاتين تساوي، نقط. وإحنا آخر حاجة كنا قايلينها إيه؟ أربعة عشرات زائد تلاتة عشرات تساوي سبعة عشرات. حلو جدًّا. هو مش الأربعة عشرات دي هي الأربعين، معناها إن أربع عشرات بأربعين، والتلاتة عشرات دي هي التلاتين؟ طب لمّا أربعة عشرات زائد تلاتة عشرات تساوي سبعة عشرات، يبقى أربعين زائد تلاتين كام؟ سبعين، اللي هي سبعة عشرات. ده معناه إن أربعين زائد تلاتين سبعين. يبقى ده تالت جزء من السؤال كمّلناه.

يبقى إحنا كده كل جزء من السؤال ساعدنا نحلّ الجزء اللي بعده، والإجابات بتاعتنا: أول إجابة كانت سبعة اللي هي أربعة زائد تلاتة، واللي بعدها سبع عشرات اللي هي أربعة عشرات زائد تلاتة عشرات، واللي بعدها سبعين اللي هي أربعين زائد تلاتين. يبقى هي دي الإجابة النهائية.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.