فيديو: القسمة على ١٠

يوضح الفيديو طريقة قسمة الأعداد على ١٠ باستخدام النماذج وحقائق الضرب المرتبطة.

٠٤:٠٥

‏نسخة الفيديو النصية

هنتكلم عن القسمة على عشرة. هنتعلم إزاي نجيب ناتج القسمة على عشرة. هنلاحظ إنه ممكن نستعمل الطرح المتكرر، أو الحقائق المترابطة، عشان أجيب ناتج القسمة على عشرة. هبتدى الشرح بالمثال التالي. يحتوي صندوق العصير على عشر علب عصير. إذا احتاج الطلاب إلى خمسين علبة، للاحتفال بالنجاح، فكم صندوق هيحتاجوا؟

المطلوب عدد الصناديق اللي هيحتاجها الطلاب عشان يحتفلوا بنجاحهم. وبكده مطلوب إن إحنا نجيب ناتج قسمة خمسين على عشرة؛ عشان أقدر أعرف عدد الصناديق اللي هيحتاجوها. هنحل بطريقتين. الطريقة الأولى: هي الطرح المتكرر. هبتدي بخمسين، وأطرح كل مرة عشرة، لحدّ ما أوصل لصفر.

خمسين ناقص عشرة، هيساوي أربعين. أربعين ناقص عشرة، هيساوي تلاتين. تلاتين ناقص عشرة، هيساوي عشرين. عشرين ناقص عشرة، هيساوي عشرة. وأخيرًا عشرة ناقص عشرة، هيساوي صفر. وبكده هلاحظ إني طرحت عشرة خمس مرات. إذن خمسين على عشرة، هيساوي خمسة.

الطريقة التانية: الحقائق المترابطة. بما إنه حاصل ضرب عشرة في خمسة، هيساوي خمسين. إذن أقدر أقول إنه خمسين على عشرة، هيساوي خمسة. أو باستعمال الرمز التاني للقسمة، خمسين على عشرة، هيساوي خمسة. يعني هيحتاج الطلاب إلى خمس صناديق من العصير.

هنكمل في الصفحة اللي جاية. تدريبات: أوجد ناتج القسمة، مستعملًا الطرح المتكرر، أو حقائق الضرب المرتبطة.

أول سؤال: عشرين على عشرة. هنستعمل حقائق الضرب المرتبطة. بما إنه حاصل ضرب عشرة في اتنين، هيساوي عشرين. إذن عشرين على عشرة، هيساوي اتنين. وبكده أقدر أقول إن ناتج القسمة، هيساوي اتنين.

سؤال رقم اتنين: ستين على عشرة. هنستعمل الطرح المتكرر. هبتدي بستين، وهطرح كل مرة عشرة، لحدّ ما أوصل للصفر. ستين ناقص عشرة، هيساوي خمسين. خمسين ناقص عشرة، هيساوي أربعين. أربعين ناقص عشرة، هيساوي تلاتين. تلاتين ناقص عشرة، هيساوي عشرين. عشرين ناقص عشرة، هيساوي عشرة. وعشرة ناقص عشرة، هيساوي صفر. وبكده هنلاحظ إن إحنا طرحنا عشرة ست مرات. إذن ناتج القسمة هيساوي ستة.

سؤال رقم تلاتة: عشرة على عشرة. هنستعمل حقائق الضرب المرتبطة. بما إنه حاصل ضرب عشرة في واحد، هيساوي عشرة. إذن عشرة على عشرة، هيساوي واحد. يعني ناتج القسمة هيساوي واحد.

سؤال رقم أربعة: إذا وُضع أربعين كرسي، حوْل عشر طاولات بالتساوي. فما عدد الكراسي حوْل كل طاولة؟ عشان نجيب عدد الكراسي حوْل كل طاولة، هنجيب ناتج قسمة أربعين على عشرة. هنستعمل حقائق الضرب المرتبطة. بما إنه حاصل ضرب عشرة في أربعة، هيساوي أربعين. إذن أقدر أقول إنه أربعين على عشرة، هيساوي أربعة. وبكده أقدر أقول إنه ناتج القسمة هيساوي أربعة. يعني عدد الكراسي حوْل كل طاولة، هو أربع كراسي.

وبكده هنكون اتعلّمنا إزاي نجيب ناتج القسمة على عشرة، باستعمال الطرح المتكرر، أو الحقائق المترابطة.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.