فيديو: امتحان الفزياء للعام السابق • ٢٠١٨/٢٠١٧ • السؤال الثاني عشر ب

امتحان الفزياء للعام السابق • ٢٠١٨/٢٠١٧ • السؤال الثاني عشر ب

٠٢:٤١

‏نسخة الفيديو النصية

يوضّح الشكل العلاقة بين الطول الموجي وشدة طيف الأشعة السينية التي تنتجها أنبوبة كولدج. أيٌّ من الأطوال الموجية الموضَّحة يعتمد على فرق الجهد بين الفتيلة والهدف؟ أ: 𝜆 واحد 𝜆 اتنين. ب: 𝜆 اتنين 𝜆 تلاتة. ج: 𝜆 واحد 𝜆 أربعة. د: 𝜆 واحد 𝜆 تلاتة.

فأنبوبة كولدج هي عبارة عن أنبوبة مفرّغة. موجود فيها فتيلة بتصدر إلكترونات، وموجود فيها هدف بتصطدم بيه الإلكترونات. وبيبقى فيه فرق جهد بين الفتيلة والهدف؛ عشان الإلكترونات تتسارع لحدّ ما تخبط في مادة الهدف. وتصادُم الإلكترونات بمادة الهدف بيصدر أشعة سينية. وطيفها بيبقى على الشكل ده. فالمطلوب منّنا إن إحنا نعرف أنهي طول موجي من الأطوال الموجية الأربعة الموضّحين في الشكل، هيعتمد على فرق الجهد بين الفتيلة والهدف.

فَـ 𝜆 واحد هي أقل طول موجي بيحصل عنده إشعاع. وَ 𝜆 اتنين هي عند الطيف الخطي ده. وَ 𝜆 تلاتة عند الطيف الخطي اللي بعده. أمّا 𝜆 أربعة، فهي الطول الموجي اللي عنده الإشعاع ده. فطيف الأشعة السينية اللي صادر من أنبوبة كولدج ممكن نقسّمه لنوعين. أول نوع هو اللي عنده شدة الإشعاع بتبقى حادة جدًّا. وعلشان كده بنسميه الطيف الخطي. والأطوال الموجية اللي بيصدر عندها الطيف الخطي، بتعتمد بس على مادة الهدف. وعلشان كده ممكن نسمّي الطيف الخطي، الطيف المميِّز. لأنه بيميِّز كل مادة هدف عن التانية.

فده معناه إن 𝜆 اتنين و𝜆 تلاتة ما بيعتمدوش على أيّ حاجة غير مادة الهدف. يعني ما بيعتمدوش على فرق الجهد بين الفتيلة والهدف. وبالتالي ممكن نستبعد الاختيارات اللي فيها 𝜆 اتنين أو 𝜆 تلاتة. اللي هم: الاختيار أ، والاختيار ب، والاختيار د. فعلشان نعرف ليه الاختيار اللي فاضل هو الاختيار ج، هنبصّ للنوع التاني من طيف الأشعة السينية، وهو الطيف المستمر.

فالطيف المستمر بيُنتَج نتيجة إن الإلكترونات لمّا بتيجي تقرّب من مادة الهدف، بتبدأ تفقد طاقتها على هيئة موجات كهرومغناطيسية. وبالتالي الأشعة الكهرومغناطيسية، اللي هي بتبقى عبارة عن طيف مستمر، بتعتمد على طاقة الإلكترونات وهي بتقرّب من مادة الهدف. والإلكترونات بتكتسب طاقتها لأنها بتتسارع نتيجة فرق الجهد ما بين الفتيلة والهدف. وده معناه إن الطيف المستمر بيعتمد على فرق الجهد بين الفتيلة والهدف.

فلو زوّدنا فرق الجهد بين الفتيلة والهدف، هنلاقي إن الطيف الخطّي عند نفس الأطوال الموجية، ولكن شدّته زادت شوية. أمّا أقصر طول موجي بيحصل عنده إشعاع هنلاقيه قلّ. وده معناه إن 𝜆 واحد هتقلّ. والطول الموجي اللي هيحصل عنده نفس شدة الأشعة بتاعة 𝜆 أربعة، هنلاقيه اتغيّر وبقى أكبر. وعلشان كده الأطوال الموجية اللي بتعتمد على فرق الجهد بين الفتيلة والهدف، هم: 𝜆 واحد، وَ 𝜆 أربعة.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.