تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.

فيديو: كتابة الجمل والعبارات اللفظية في صورة معادلات جبرية بسيطة

سوزان فائق

يوضح الفيديو كيفية التعبير عن الجمل والعبارات اللفظية بالعمليات الجبرية، وكيفية كتابتها في صورة معادلات جبرية بسيطة.

٠٥:٣٣

‏نسخة الفيديو النصية

في الفيديو ده هنتكلم على كتابة الجمل والعبارات اللفظية في صورة معادلات جبرية بسيطة. هنعرف يعني إيه معادلة، وإزاي نحوّل الجُمل والعبارات إلى معادلة بيبقى فيها عمليات حسابية.

المعادلة هي جملة رياضية بتحتوي إشارة المساواة، اللي هي علامة اليساوي، فبيبقى عند كتابة جملة أو تعبير لفظي على صورة معادلة رياضية، بنستخدم إشارة المساواة بدل كلمة يساوي. وعندنا كلمات ثانية بتعبر عن العمليات الحسابية اللي هي الجمع والطرح والضرب والقسمة، اللي هي لما هيبقى مكتوب: المجموع، أو الفرق، أكبر من، أقل من، زاد بمقدار، يقل، إجمالي، قل بمقدار، أو نقص بمقدار؛ كل عبارة فيهم أو كلمة فيهم بتبقى معناها هنجمع أو نطرح، الضرب والقسمة لكل: اقسم، حاصل ضرب، خارج قسمة، ضُرب ضعف، وزّع، أمثال؛ الكلام ده كله بيعبر عن عمليات الضرب والقسمة؛ فأي جملة عندنا أو عبارة لفظية هنقدر نحطها في صورة معادلة جبرية بسيطة، هنشوف الكلام ده إزاي من خلال مثال.

في المثال اكتب كلًّا من الجملتين التاليتين على صورة معادلة جبرية: أقل من العدد بـستة يساوي عشرين، ثلاثة أمثال عُمْر أحمد يساوي اتناشر. الجملة الأولانية اللي هي: أقل من العدد؛ يعني معناها إن إحنا هنطرح من العدد بـ ستة يبقى العدد هنعبر عنه برمز س، أقل منه بـ ستة هيساوي عشرين الأقل من هنعبر عنها بالناقص، واليساوي هنعبر عنها بعلامة اليساوي، اللي هي إشارة المساواة. يبقى المعادلة الجبرية هيبقى فيها إشارة المساواة، يساوي عشرين، والعدد س أقل منه بـ ستة، اللي هو الـ س ناقص الستة، يبقى الـ س ناقص الستة هتساوي العشرين

في الجملة التانية ثلاثة أمثال عمْر أحمد هيساوي اتناشر. يبقى هنعبر عن عمر أحمد بمتغير ص، ثلاثة أمثال؛ يعني هنضرب تلاتة في الـ ص، يبقى هنستخدم علامة الضرب، واليساوي اللي هي إشارة المساواة بتاعت المعادلة الجبرية، يبقى ثلاثة أمثال ص هتبقى التلاتة مضروبة في الـ ص هتساوي الـ اتناشر. يبقى هي دي المعادلة الجبرية اللي بتعبر عن الجملة اللفظية.

هناخد مثال كمان من حياتنا العملية. في المثال: والد ياسر أطول من ياسر مرة ونصف، إذا كان طول والد ياسر مية وتمانين سنتيمتر؛ فما طول ياسر؟ واكتب معادلة تمثل هذة المسألة.

المجهول هنا هو طول ياسر، هنعبر عنه بالرمز س، وفي المسألة بيقول والد ياسر أطول من ياسر مرة ونصف؛ يعني معناها المرة والنصف دي معناها أمثال؛ يعني الواحد والنص هتبقى مضروبة في الـ س. علشان تعبر عن والد ياسر اللي هو طوله يساوي مية وتمانين، يبقى المعادلة اللي بتعبر عن الجملة اللفظية دي هي مية وتمانين هتساوي الواحد والنص في الـ س. وهو ده المعادلة المطلوبة. حيث أن طول ياسر هو الـ س.

هناخد مثال كمان، سرعة السيارة هي ع كيلومترًا في الساعة، اكتب معادلة تعبر عن المسافة المقطوعة بالسيارة بعد تسع ساعات، علمًا بأن السرعة بتساوي المسافة على الزمن. سرعة السيارة هنا ع كيلومتر في الساعة، وعايزين نكتب معادلة بتعبر عن المسافة اللي هي تسع ساعات. لو عبرنا عن المسافة بالمتغير س؛ يبقى علشان نكتب المعادلة، يبقى الـ س اللي هي بتعبر عن المسافة، هنقسمها على الزمن اللي هو تسع ساعات، اللي هتساوي السرعة ع؛ يعني الـ ع هتساوي الـ س على الـ تسعة. يبقى هي دي المعادلة المطلوبة.

اتكلمنا في الفيديو ده عن كتابة الجُمل والعبارات اللفظية في صورة معادلات جبرية بسيطة. عرفنا إزاي هنعبر عن التعبير اللفظي أو الجمل اللفظية بالعمليات الحسابية المقابلة لها، اللي هي الجمع والطرح والضرب والقسمة، واستخدمنا إشارة المساواة للتعبير عن المعادلة.