فيديو: أقل من، أكبر من، يساوي

يصنع أمير طوقًا من ٦ خرزات. يريد أن يصنع طوقًا آخر ولكن بعدد أقل من ٦ خرزات. ما عدد الخرزات التي يمكن أن تتوفر لديه؟ [أ] ٦ أم ٥ أم ٤ أم ٣ أم ٢ أم ١ [ب] ٦ أم ٥ أم ٤ أم ٣ أم ٢ [ج] ٥ أم ٤ أم ٣ أم ٢ أم ١

٠٣:٤٤

‏نسخة الفيديو النصية

يصنع أمير طوقًا من ست خرزات. يريد أن يصنع طوقًا آخر، ولكن بعدد أقل من ست خرزات. ما عدد الخرزات التي يمكن أن تتوفر إليه؟ ستة، أم خمسة، أم أربعة، أم تلاتة، أم اتنين، أم واحد. ولّا ستة، أم خمسة، أم أربعة، أم تلاتة، أم اتنين. ولّا خمسة، أم أربعة، أم تلاتة، أم اتنين، أم واحد.

يعني إيه الكلام ده؟ فيه ولد اسمه أمير صنع الطوق اللي قدامنا ده. الطوق ده مكوّن من ست خرزات. واحد، اتنين، تلاتة، أربعة، خمسة، ستة. والسؤال بيقول لنا إن هو عاوز يعمل طوق تاني بس بعدد أقل من الخرزات، فهيستخدم كام خرزة؟ عدد أقل من الست خرزات؛ يعني نفكر إيه هي الأعداد اللي أقل من الستة.

الأعداد الأقل من الستة: الخمسة، والأربعة، والتلاتة، والاتنين، والواحد، والصفر. دي الأعداد اللي أقل من الستة. طيب لو رجعنا للسؤال بتاعنا. إحنا قلنا إن الطوق اللي أمير عمله فيه ست خرزات، عاوزين نقلل منه. فمثلًا أقل حاجة هنشيلها خرزة واحدة. أهو بعد ما شِلناها، اتبقى لنا إيه؟ واحد، اتنين، تلاتة، أربعة، خمسة. اتبقى لنا خمس خرزات. يبقى كده همّ ممكن يبقوا خمسة.

طيب لو شلنا كمان خرزة بالشكل ده، اتبقى لنا كام واحدة؟ واحد، اتنين، تلاتة، أربعة. يبقى برضو همّ ممكن يكونوا أربع خرزات.

طيب نجرب نشيل واحدة كمان. كده اتبقى لنا واحد، اتنين، تلاتة. تلات خرزات يبقى همّ ممكن يكونوا تلاتة.

ولو جربنا نشيل واحدة كمان، هيبقى الطوق مكوّن من: واحد، اتنين. خرزتين، يبقى برضو إحنا ممكن نحط خرزتين اتنين، أو فعلًا الاتنين أقل من الستة.

طيب نشيل واحدة كمان. لمّا شِلنا واحدة كمان ما اتبقلناش غير خرزة واحدة بس. يعني واحد.

طب هو إحنا ينفع نشيل الخرزة اللي اتبقت دي؟ ما إحنا لو شلناها هي كمان، مش هيبقى فيه طوق أصلًا، أو هيبقى العقد من غير أي خرز. والسؤال عندنا بيسألنا عن عدد الخرزات اللي هتتبقى معاه. ده أقل عدد من الخرزات؛ خرزة واحدة، ما ينفعش نشيل تاني.

طيب اللي إحنا عملناه ده بقى، أكدنا على إيه؟ إن عدد الخرزات اللي أقل من الستة همّ دول. بس كده، الخمسة، والأربعة، والتلاتة، والاتنين، والواحد. لو جينا نبص في الاختيارات، هنلاقي أول اختيار فيه ستة، وإحنا عاوزين حاجة أقل من الستة؛ يبقى الاختيار ده غلط. طيب لو جينا نبص على الاختيار اللي بعده، برضو هنلاقي فيه ستة، يبقى برضو هو اختيار غلط. ولو بصينا عَ اللي بعده، هنلاقي فيه خمسة أهي، أربعة أهي، تلاتة أهي، اتنين هنا برضو، واحد هنا. يبقى هو ده الاختيار الصح: خمسة، أو أربعة، أو تلاتة، أو اتنين، أو واحد.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.