فيديو: تحديد هل الأحداث مؤكدة أو أكثر احتمالًا أو أقل احتمالًا أو مستحيلة

يعرض الفيديو مفهوم الاحتمال وأنواعه وتعريف الحدث المؤكد والمحتمل بدرجة كبيرة وقليلة والمستحيل، مع التطبيق ببعض الأمثلة الحياتية عليه.

٠٧:٠٩

‏نسخة الفيديو النصية

تحديد هل الأحداث مؤكّدة، أو أكثر احتمالًا، أو أقل احتمالًا، أو مستحيلة.

في الفيديو ده هنعرف يعني إيه حدث مؤكّد، ويعني إيه حدث مستحيل. ويعني إيه حدث احتمال وقوعه كبير، أو احتمال وقوعه قليل. وكمان هنعرف إمتى نقول على الحدث ده إنه مؤكّد، أو مستحيل، أو أكثر احتمالًا، أو أقل احتمالًا.

الاحتمال هو إمكانية وقوع حدث ما، يعني بناخد حدث وندرس احتماله. لو مثلًا عندنا كيس كور زيّ ده، وهنطبّق عليه الاحتمال، أول حاجة في الاحتمال هي الحدث المؤكّد. حدث مؤكّد يعني حاجة لازم تحصل. فمثلًا في كيس الكور بنقول من المؤكّد سحب كرة، يعني إيه؟

لو جِبنا أيّ حد وقلنا له دخّل إيدك جوّه الكيس، وطلع إيدك بكورة، هيطلّعها بكورة. يبقى أكيد إن هو سحب كورة، في اللحظة دي بنسمّيه حدث مؤكّد.

طيّب لو شرطنا على الولد ده إنه يسحب كورة لونها أحمر، ساعتها بقى بيكون فيه احتمال. فبنلاحظ هنا إن الكيس فيه كور حمرا عددها كبير. فبالتالي فرصة الولد في سحب كورة حمرا بتكون كبيرة، فبنسمّيه حدث أكثر احتمالًا. وده اللي بنشوفه لمّا بنسحب كورة لونها أحمر. وبنقول: من المحتمل بدرجة كبيرة سحب كرة حمراء.

طيّب لو العكس؛ لو طلبنا مِ الولد يسحب كورة لونها أزرق، هنلاحظ إن في الكيس عدد الكور الأزرق قليل. فبيكون احتمال ضعيف إنه يسحب كورة لونها أزرق. فبنسمّيه الحدث الأقل احتمالًا، وبنقول فيه: من المحتمل بدرجة قليلة أن نسحب كرة زرقاء.

وأخيرًا الحدث المستحيل. يعني لو جينا قلنا للولد اسحب كورة لونها أصفر، والكيس أصلًا ما فيهوش ولا كورة لونها أصفر. يبقى: من المستحيل سحب كرة صفراء؛ حاجة عمرها ما هتحصل.

وبكده نكون عرفنا أنواع الأحداث. الحدث المؤكّد احتماله لازم يحصل، لازم لمّا نحطّ إيدينا في الكيس نسحب كورة؛ أيًّا كان لونها. والحدث الأكثر احتمالًا الحدث اللي بيحصل بدرجة كبيرة جدًّا؛ زيّ الكور الحمرا اللي موجودة في الكيس بعدد كبير. وعكسه الحدث الأقل احتمالًا اللي بيحصل بدرجة قليلة؛ زيّ الكور الزرقا اللي موجودة بعدد قليل في الكيس. وأخيرًا الحدث المستحيل اللي استحالة يحصل؛ زيّ ما بنقول: استحالة نلاقي كورة لونها أصفر في الكيس اللي قدّامنا ده.

ودلوقتي هناخد طبق فيه تفاح؛ فيه سبع تفاحات حمراء، وتفاحة واحدة لونها أصفر. وعاوزين نعرف احتمالية إن سارة تاكل تفاحة صفراء.

هنقول احتمالية أن تأكل سارة تفاحة صفراء هو الأقل احتمالًا. ليه بقى؟ لأن عدد التفاح الأصفر صغير جدًّا؛ تفاحة واحدة بس. يبقى بنقول من هنا إن محتمل بدرجة قليلة أن تأكل سارة تفاحة صفراء.

طيّب لو عكسنا، وسألنا إيه احتمال أن تأكل سارة تفاحة حمراء؟ فنقول إن احتمالية أن تأكل سارة تفاحة حمراء هو الأكثر احتمالًا؛ لأن ده محتمل بدرجة كبيرة جدًّا. وده علشان الطبق فيه عدد كبير من التفاح الأحمر.

وبكده نكون فهمنا الأحداث الأكثر احتمالًا، والأقل احتمالًا. وهناخد كمان مثالين واحد على الحدث المؤكّد، وواحد على الحدث المستحيل.

عندنا لعبة القرص الدوّار. لعبة القرص الدوّار دايرة زيّ اللي موجودة قدّامنا متقسّمة لأجزاء فيها أعداد، وعليها مؤشر صغير زيّ عقرب الساعة. بنلفّها بسرعة، ونستنى لحد ما تُقَف عند عدد معيّن. فلو خدنا القرص ده ولفّيناه، إيه هي احتمالية إن المؤشر يُقَف عند عدد من مضاعفات العدد تلاتة؟

هنلاحظ إن كل الأعداد اللي موجودة على القرص هي مضاعفات العدد تلاتة. يبقى أيّ مكان المؤشر هيُقَف فيه هيكون واقف عند مضاعف مِ مضاعفات العدد تلاتة. يبقى هنا الحدث بيكون مؤكّد، وبنقول من المؤكّد أن يقف المؤشر على عدد من مضاعفات العدد تلاتة، وده حدث أكيد. وهناخد مثال على الحدث المستحيل.

لو سارة بتلعب كوتشينة. والورق اللي معاها هو اللي معروض قدّامنا: اتنين، وتلاتة، وأربعة، وخمسة، وستة، وسبعة، وتمنية، وتسعة، وعشرة. وللأسف محتاجة يكون معاها الورقة رقم واحد علشان تكسب. عاوزين نعرف احتمالية إن سارة تكسب إيه. فهنقول إن من المستحيل إن سارة تكسب؛ لأن مش معاها الواحد. من المستحيل أن تفوز سارة باللعبة.

وآخِر مثال هناخده في الفيديو ده هو وصف لكيس فيه كور. عاوزين نوصف أو نشوف شكل الكيس اللي فيه كور اللي لمّا نيجي نسحب منه هيكون مستحيل اختيار كرة حمراء.

ده معناها إن الكيس ما فيهوش ولا كورة لونها أحمر. فممكن نصفه بالشكل ده: إنه كيس فيه أيّ لون من الكور ما عدا اللون الأحمر.

ده رقم واحد. طب لو رقم اتنين كان الحدث مؤكّد اختيار كرة حمراء.

ده معناه إن كل الكور الموجودة في الكيس لونها أحمر؛ علشان لمّا نسحب أيّ كورة من الكيس تطلع لونها أحمر. فبيكون كيس كل الكور اللي جوّاه حمراء.

وبكده نكون عرفنا إزاي نحدّد الحدث المؤكّد، والحدث الأكثر احتمالًا، والحدث الأقل احتمالًا، وأخيرًا الحدث المستحيل.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.