فيديو: حساب مساحة شكل مركب يتضمن شبه منحرف ومستطيلًا

أوجِد مساحة الشكل الموضَّح.

٠٣:٠٦

‏نسخة الفيديو النصية

أوجد مساحة الشكل الموضح.

ومعطى عندنا الشكل اللي قدّامنا ده، وعايزين نوجد مساحته. فهنلاحظ إن الشكل اللي عندنا ده نقدر نقسّمه إلى شكلين. فهيبقى أول شكل عندنا الشكل أ. والشكل ده هو عبارة عن شبه منحرف. وأمّا الشكل التاني فهو الشكل ب. واللي هنلاحظ إن هو على شكل مستطيل. فبالتالي علشان نوجد مساحة الشكل اللي عندنا، يبقى عايزين نوجد مساحة شبه المنحرف، ونوجد مساحة المستطيل، وبعد كده نجمع مساحتهم. وبالتالي هتبقى مساحة الشكل بتساوي مساحة شكل أ زائد مساحة شكل ب.

وزيّ ما عرفنا إن الشكل أ هو عبارة عن شبه منحرف. ومساحة شبه المنحرف بتساوي نُصّ حاصل ضرب مجموع قاعدتيه، في ارتفاعه. يعني نُصّ في، ق واحد زائد ق اتنين، اللي هو طول القاعدة واحد زائد قاعدة اتنين، في ارتفاعه، اللي هو ع. فبالتالي هيبقى ده مساحة شكل أ. بعد كده هنجمع عليه مساحة شكل ب. وزيّ ما عرفنا إن الشكل ب هو شكل مستطيل. وبالتالي هتبقى مساحة المستطيل هي حاصل ضرب طوله في عرضه. وبالتالي هيبقى المقدار ده بيمثل مساحة الشكل ب.

بعد كده هنبدأ نعوّض. فمن الشكل هنلاحظ إن شكل شبه المنحرف اللي عندنا، معطى عندنا طول قاعدته اللي هي ستة سنتيمتر. وأمّا قاعدته التانية، اللي هي القاعدة دي، فهيبقى طولها بيساوي نفس الطول ده. اللي هو ستة وعشرين سنتيمتر. فبالتالي هنعوّض في مساحة شبه المنحرف عن ق واحد وَ ق اتنين بستة، وستة وعشرين. فهيبقى المقدار هو نُصّ في، ستة زائد ستة وعشرين، اللي هم مجموع طول القاعدتين، في الارتفاع ع، اللي إحنا عايزين نوجده.

فمن الشكل هنلاحظ إن ارتفاع الشكل كله تسعتاشر سنتيمتر. ومعطى عندنا إن الارتفاع ده، اللي هو في نفس الوقت عرض المستطيل تسعة سنتيمتر. فعشان نوجد ارتفاع شبه المنحرف اللي هو الارتفاع ده، فهيبقى عبارة عن الفرق بين الارتفاع تسعتاشر سنتيمتر، والارتفاع تسعة سنتيمتر. يعني هيساوي عشرة سنتيمتر. فيبقى هو ده ارتفاع شبه المنحرف. وهنعوّض عنه في المساحة. فبالتالي هتبقى مساحة شبه المنحرف هي نُصّ في، ستة زائد ستة وعشرين، في الارتفاع عشرة. فكده يبقى إحنا قدرنا نعوّض في مساحة شبه المنحرف.

بعد كده هنجمع عليها مساحة المستطيل. ومن الشكل هنلاحظ إن معطى عندنا طول المستطيل ستة وعشرين سنتيمتر، وعرضه تسعة سنتيمتر. وزيّ ما عرفنا إن المساحة المستطيل هي حاصل ضرب طوله في عرضه. يعني هيساوي ستة وعشرين في تسعة. فكده يبقى إحنا عوّضنا بمساحة المستطيل. فبعد كده نقدر نحسب قيمة المقدارين دول. ونجمعهم على بعض.

فلمّا نحسب مساحة شبه المنحرف اللي هي نُصّ في، ستة زائد ستة وعشرين، في عشرة. هتبقى بتساوي مية وستين. زائد مساحة المستطيل، اللي هي ستة وعشرين في تسعة. ولمّا نحسبها هتبقى بتساوي ميتين أربعة وتلاتين. بعد كده هنجمع مية وستين زائد ميتين أربعة وتلاتين، واللي هتساوي تلتمية أربعة وتسعين. وبما إننا بنوجد مساحة، فهتبقى الوحدة هي سنتيمتر مربع. وبالتالي هتبقى مساحة الشكل الموضح هي تلتمية أربعة وتسعين سنتيمتر مربع.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.