فيديو: إيجاد عجلة جسمٍ ما بمعلومية متجهات القوة المؤثِّرة عليه

إذا تحرك جسم كتلته ١ كجم تحت تأثير القوتين ﻕ_١ = (المتجه ﺱ + ٨ المتجه ﺹ − ٥ المتجه ﻉ) نيوتن، ﻕ_٢ = (٢ المتجه ﺱ − ٧ المتجه ﺹ + ٨ المتجه ﻉ) نيوتن، فما قيمة عجلته؟

٠٣:٠٠

‏نسخة الفيديو النصية

إذا تحرّك جسم كتلته واحد كيلوجرام تحت تأثير القوتين. متجه القوة ق واحد بيساوي متجه الوحدة س، زائد تمنية في متجه الوحدة ص، ناقص خمسة في متجه الوحدة ع نيوتن. ومتجه القوة ق اتنين بيساوي اتنين في متجه الوحدة س، ناقص سبعة في متجه الوحدة ص، زائد تمنية في متجه الوحدة ع نيوتن. فما قيمة عجلته؟

هنلاحظ معطى عندنا كتلة الجسم، ومعطى عندنا القوتين اللي بيأثّروا على الجسم. وبالتالي نقدر نستخدم قانون نيوتن التاني اللي بيكون إن القوة بتساوي الكتلة مضروبة في العجلة.

معطى عندنا القوتين اللي بيأثّروا على الجسم، ومعطى عندنا كتلة الجسم، ومطلوب نوجد العجلة. وبالتالي بقسمة الطرفين على الكتلة فهنجد إن العجلة هتساوي القوة مقسومة على الكتلة. يعني نقدر نقول إن العجلة هتساوي … معطى عندنا قوتين بيأثّروا على الجسم، وبالتالي القوة اللي هتكون بتأثّر عَ الجسم هي محصلة القوتين. يعني هنجمع القوتين: متجه القوة ق واحد، زائد متجه القوة ق اتنين؛ الكل مقسوم على كتلة الجسم.

يعني عجلة الجسم هتساوي … هنعوّض عن متجه القوة ق واحد، ومتجه القوة ق اتنين. فهيكون عندنا متجه الوحدة س، زائد تمنية في متجه الوحدة ص، ناقص خمسة في متجه الوحدة ع. زائد اتنين في متجه الوحدة س، ناقص سبعة في متجه الوحدة ص، زائد تمنية في متجه الوحدة ع. الكل مقسوم على كتلة الجسم اللي هي واحد كيلوجرام.

يعني عجلة الجسم هتساوي … عندنا مجموع القوتين مقسوم على الكتلة اللي هي بواحد كيلوجرام، يعني عجلة الجسم هتساوي مجموع القوتين.

عشان نقدر نوجد محصلة القوتين. هنجمع مركّبة القوة الأولى في اتجاه متجه الوحدة س مع مركّبة القوة التانية في اتجاه متجه الوحدة س. يعني هيكون عندنا اتنين زائد واحد، اللي هي بتساوي تلاتة، في اتجاه متجه الوحدة س.

وهنجمع مركّبة القوة الأولى في اتجاه متجه الوحدة ص مع مركّبة القوة التانية في اتجاه متجه الوحدة ص. يعني عندنا تمنية ناقص سبعة في اتجاه متجه الوحدة ص، يعني هيكون عندنا زائد متجه الوحدة ص.

وهنجمع مركّبة القوة الأولى في اتجاه متجه الوحدة ع مع مركّبة القوة التانية في اتجاه متجه الوحدة ع. يعني هنجمع سالب خمسة زائد تمنية، يعني هيساوي تلاتة في اتجاه متجه الوحدة ع.

وبالتالي يبقى عجلة الجسم هتكون تلاتة في اتجاه متجه الوحدة س، زائد متجه الوحدة ص، زائد تلاتة في متجه الوحدة ع. ووحدتها هتكون متر عَ الثانية تربيع.

يبقى كده قدِرنا نوجد عجلة الجسم. وكانت بتساوي تلاتة في اتجاه متجه الوحدة س، زائد متجه الوحدة ص، زائد تلاتة في اتجاه متجه الوحدة ع. متر عَ الثانية تربيع.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.