تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.

فيديو: العلاقات المتناسبة وغير المتناسبة

سوزان فائق

يوضح الفيديو مفهوم العلاقات المتناسبة وغير المتناسبة، وكيفية تحديدها.

٠٥:١٤

‏نسخة الفيديو النصية

في الفيديو ده هنتكلم عن العلاقات المتناسبة وغير المتناسبة، وإزاي بنحددهم.

العلاقات المتناسبة هي اللي بيكون فيها النسبة بين الكميات المختلفة ثابتة، أما العلاقات التي تكون فيها النسبة غير ثابتة بتسمى علاقات غير متناسبة؛ يعني مثلًا لو أنا كنت بشتري هدايا، وكان عدد الهدايا واحد، وتمنها تمنية، يبقى معنى كده إن النسبة ما بينهم تمنية إلى واحد؛ كانت مرة تانية اشتريت هدايا، كانت تمنها ستاشر، وكان هديتين، يبقى النسبة ستاشر إلى اتنين؛ ولما اشتريت تلات هدايا كان تمنهم أربعة وعشرين، يبقى كده النسبة أربعة وعشرين على تلاتة. لو بسّطنا الكسور دي هنلاقي دي تمنية، هنلاقي دي تمنية، وهنلاقي دي تمنية؛ يبقى معنى كده إن النسب كانت متساوية، يبقى العلاقات دي متناسبة، ولو ما كانتش القيم دي ثابتة، يبقى العلاقات غير متناسبة. هنشوف مثال.

يبيع أحد المطاعم الوجبة الواحدة بمبلغ أربعتاشر جنيه، ويتقاضى اتنين جنيه عن توصيل كل طلب. هل تتناسب التكلفة مع عدد الوجبات المطلوبة؟ هنوجد تكلفة وجبة ووجبتين وتلاتة وأربع وجبات، وننظمهم في جدول، في جدول بالشكل ده. التكلفة لما تكون عدد الوجبات واحد، يبقى تمن الوجبة الأربعتاشر جنيه زائد الاتنين جنيه توصيل، يعني هتبقى ستاشر؛ لما تكون وجبتين، يبقى سعرهم تمنية وعشرين جنيه زائد اتنين جنيه توصيل، يبقى تلاتين جنيه؛ ولما يكونوا تلات وجبات، هتبقى التكلفة الكلية أربعة وأربعين؛ ولما هيكونوا أربع وجبات، هيبقى التكلفة تمنية وخمسين جنيه.

هنكتب العلاقة بين التكلفة وعدد الوجبات في صورة نسبة. يبقى التكلفة إلى العدد؛ لما بيكون عدد وجبة واحدة، بيبقى التكلفة ستاشر، يعني تساوي ستاشر؛ لما بيكون وجبتين، يبقى التكلفة تلاتين، لما هنبسطها هتبقى خمستاشر؛ لما بيكون تلاتة، تكلفتهم أربعة وأربعين، يبقى تقريبًا أربعتاشر وسبعة من عشرة؛ لما بيكونوا تمنية وخمسين التكلفة، وعدد الوجبات أربعة، يبقى هتساوي أربعتاشر ونص؛ معنى كده إن النسبة دي مش متساوية، وده معناه إن النسبة بين الكميات ليست ثابتة؛ يبقى التكلفة لا تتناسب مع عدد الوجبات، يبقى العلاقة غير متناسبة، وهو ده المطلوب في المثال.

هناخد مثال كمان، يمكن استخدام الوصفة المجاورة لإعداد عصير الفواكه. هل كمية المسحوق متناسبة مع كمية السكر المستخدمة؟

هنوجد كمية كل من المسحوق والسكر اللازمة لإعداد كميات مختلفة من العصير. زي ما عملنا قبل كده في عدد مختلف من الوجبات، هنشوف هنا كميات مختلفة من العصير، وهننظمها في جدول. يبقى لما هنستخدم نص فنجان سكر، هيبقى قصاده كيس مسحوق، واتنين كوب مية؛ لما هنستخدم فنجان سكر، هيبقى اتنين كيس مسحوق، وأربعة كوب مية؛ لما هنستخدم واحد ونص فنجان سكر، يبقى تلاتة كيس مسحوق، وستة كوب مية؛ ولما هنستخدم اتنين فنجان سكر، يبقى أربعة كيس مسحوق، وتمنية كوب ماء. هنكتب العلاقة بين عدد فناجين السكر وأكياس المسحوق في كل حالة على هيئة نسبة. يبقى الكمية الأولانية اللي هو نص على واحد، الكمية التانية واحد إلى اتنين، الكمية التالتة واحد ونص إلى تلاتة، الكمية الرابعة اتنين إلى أربعة. لما هنبسط القيم دي كلها هنلاقيها هتساوي نص؛ يبقى معنى كده إن كمية المسحوق متناسبة مع كمية السكر.

اتكلمنا في الفيديو ده عن مفهوم العلاقات المتناسبة ومفهوم العلاقات غير المتناسبة وإزاي بنحددهم.