فيديو: الأعداد الصحيحة وتمثيلها بيانيًّا

يتناول الفيديو طريقة كتابة وقراءة الأعداد الصحيحة وتمثيلها بيانيًّا على خط الأعداد.

٠٦:٠٦

‏نسخة الفيديو النصية

دلوقتي هنتكلّم عن الأعداد الصحيحة. هنتعلّم إزّاي نقرا الأعداد الصحيحة ونكتبها. العدد الصحيح هو أيّ عدد من المجموعة اللي هتظهر قدامي دلوقتي. الأعداد دي مكوّنة من الأعداد الصحيحة الموجبة، الأعداد الصحيحة السالبة، والصفر. على خط الأعداد، هنلاحظ إن الصفر في النص. على يمين الصفر الأعداد الصحيحة الموجبة. وعلى يسار الصفر الأعداد الصحيحة السالبة.

الأعداد الصحيحة الموجبة، هي أعداد صحيحة أكبر من الصفر. وبيكتب قبلها إشارة موجب، زيّ ما هو موضّح قدامي، أو بدون. أمّا الأعداد الصحيحة السالبة، هي أعداد صحيحة أقلّ مِ الصفر. وبيكتب قبلها إشارة سالب، زيّ ما هو موضّح قدامي. دلوقتي هنتعلّم إزّاي بنستفاد من الأعداد الصحيحة الموجبة، والأعداد الصحيحة السالبة، في الحياه العملية.

هناخد أمثلة. مثلًا لو اتحفر جراج على عمق خمسة متر تحت مستوى الأرض. فإن العدد الصحيح سالب خمسة، معناه خمسة متر تحت مستوى الأرض. ولو اتبنت عمارة عشرين متر فوق مستوى الشارع، أو فوق مستوى الأرض. فإن العدد الصحيح عشرين، أو موجب عشرين، بيعبّر عن ارتفاع العمارة، اللي هو عشرين متر فوق مستوى الأرض.

هنكمّل في الصفحة اللي جاية. اكتب عدد صحيح لكلٍّ من … واحد: درجة الحرارة خمس درجات تحت الصفر. بما إنه درجة الحرارة خمس درجات تحت الصفر. فإن العدد الصحيح اللي بيمثّل خمس درجات تحت الصفر، هو سالب خمسة.

رقم اتنين: ارتفاع شجرة تلاتة مترًا فوق مستوى الأرض. بما إنه ارتفاع الشجرة تلاتة متر فوق مستوى الأرض. فإن العدد الصحيح، اللي هيعبّر عن ارتفاع الشجرة، هو العدد تلاتة، أو موجب تلاتة.

كمان يمكن تمثيل العدد الصحيح بيانيًّا، على خط الأعداد؛ بتعيين نقطة في الموقع المناسب. هناخد دلوقتي مثال. مثِّل مجموعة الأعداد الصحيحة: أربعة، سالب ستة، وصفر بيانيًّا على خط الأعداد.

في البداية هرسم خط الأعداد. وبعدين هقسّمه: صفر، واحد، اتنين، تلاتة، أربعة، خمسة. وعلى يسار الصفر، الأعداد الصحيحة السالبة: سالب واحد، سالب اتنين، سالب تلاتة، سالب أربعة، سالب خمسة، وسالب ستة. هحدّد نقطة في الموقع المناسب لكل عدد صحيح.

أول عدد صحيح أربعة. هاجي عند أربعة، وأرسم نقطة. تاني عدد صحيح سالب ستة. هاجي عند سالب ستة، وأرسم نقطة. تالت عدد صحيح هو صفر. هاجي عند صفر، وأرسم نقطة. وبكده هكون مثّلت الأعداد الصحيحة بيانيًّا على خط الأعداد.

هنكمّل في الصفحة اللي جاية. تدريبات: اكتب عددًا صحيحًا لكلٍّ من … واحد: خسارة تلاتة جنيه. بما إنه حصل خسارة بمبلغ مقداره تلاتة جنيه. فإن العدد الصحيح اللي هيعبّر عن الخسارة، هو سالب تلاتة.

رقم اتنين: ميتين وخمسين متر فوق سطح البحر. بما إن الارتفاع ميتين وخمسين متر فوق سطح البحر. فإن العدد الصحيح اللي هيعبّر عن الارتفاع ده، هو ميتين وخمسين، أو موجب ميتين وخمسين.

رقم تلاتة: مكسب تلاتة جنيه. بما إنه حصل مكسب بمبلغ مقداره تلاتة جنيه. فإن العدد الصحيح اللي هيعبّر عن المكسب ده، هو تلاتة، أو موجب تلاتة.

رقم أربعة: سحب بنكي بمقدار ألف جنيه. بما إنه حصل سحب بنكي بمقدار ألف جنيه. يعني الفلوس اللي في البنك قلّت. يبقى العدد الصحيح اللي هيعبّر عن السحب البنكي، هو سالب ألف.

رقم خمسة: تلتاشر درجة مئوية تحت الصفر. بما إنه درجة الحرارة تلتاشر درجة تحت الصفر. فإن العدد الصحيح اللي هيعبّر عن درجة الحرارة دي، هو سالب تلتاشر. هنكمّل في الصفحة اللي جاية.

تاني تدريب: مثّل بيانيًّا كلّ من الأعداد التالية على خط الأعداد. معطى في السؤال مجموعتين من الأعداد الصحيحة. ومطلوب إني أمثّلها بيانيًّا على خط الأعداد. في البداية هرسم خط الأعداد. بعد كده هحدّد موقع كل عدد من الأعداد الصحيحة، على خط الأعداد.

العدد الأولاني اتنين. هاجي عند اتنين، وأرسم نقطة. تاني عدد سالب واحد. هاجي عند سالب واحد، وأرسم نقطة. تالت عدد سالب تسعة. هاجي عند سالب تسعة، وأرسم نقطة. وأخيرًا واحد. هاجي عند واحد، وأرسم نقطة. وبكده هكون مثّلت المجموعة الأولى بيانيًّا على خط الأعداد.

المجموعة التانية، أول عدد فيها هو تلاتة. هاجي عند تلاتة، وأرسم نقطة. بعد كده سالب سبعة. هاجي عند سالب سبعة، وأرسم نقطة. وأخيرًا ستة. هاجي عند ستة، وهرسم نقطة. وبكده هكون مثّلت المجموعة التانية بيانيًّا على خط الأعداد.

وبكده هنكون اتعلّمنا إزّاي نقرا ونكتب الأعداد الصحيحة. وإن مجموعة الأعداد الصحيحة مكوّنة من الصفر. والأعداد الصحيحة الموجبة، اللي هي بتكون أكبر من الصفر، وبيكتب قبلها إشارة موجب أو بدون. والأعداد الصحيحة السالبة، وهي أعداد صحيحة أقل من صفر، وبيكتب قبلها إشارة سالب. وإن العدد صفر ليس سالبًا، وليس موجبًا. وكمان اتعلّمنا إزّاي نمثّل الأعداد الصحيحة بيانيًّا على خط الأعداد، بتعيين نقطة في الموقع المناسب لكل عدد.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.