تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.

فيديو: الأشكال الرباعية الأضلاع

سوزان فائق

يوضح الفيديو تعريف الأشكال الرباعية الأضلاع، وكيفية إيجاد قيم الزوايا الداخلية لها، ويوضح خواص الأشكال الرباعية الأضلاع وأنواعها.

٠٥:٦٠

‏نسخة الفيديو النصية

في الفيديو ده هنتكلّم عن الأشكال رباعية الأضلاع.

الأشكال رباعية الأضلاع دي عبارة عن شكل له أربع أضلاع، وله أربع زوايا، وشكل مغلق زي الشكل ده. أربع أضلاع: واحد، اتنين، تلاتة، أربعة. وأربع زوايا: واحد، اتنين، تلاتة، أربعة. أي شكل رباعي أقدر أقسمه لشكلين مثلثين. مثلث واحد ومثلث اتنين. من خواص المثلث عندي إن الزوايا الداخلية للمثلث بتساوي مية وتمانين درجة. طيب لو أنا عندي مثلثين؛ يبقى معنى كده إن الزوايا الداخلية دي هتساوي مية وتمانين درجة في اتنين. ودي هتمثّل مجموع الزوايا للشكل رباعي الأضلاع. يعني لمّا أقول مية وتمانين في اتنين يبقى تلتمية وستين. يبقى مجموع الزوايا الداخلية لأي شكل رباعي الأضلاع هتبقى قيمتها تلتمية وستين درجة.

يعني لو في الشكل ده. الزاوية دي قيمتها تمانين درجة، والزاوية دي قيمتها سبعين درجة، والزاوية دي قيمتها أربعين درجة. لو قدرت أجمع الزوايا دول وأطرحهم من تلتمية وستين درجة، هقدر أجيب قيمة الزاوية دي.

بنسمي الأشكال الرباعية دي على حسب الأضلاع والزوايا. يعني إيه عن طريق الأضلاع والزوايا؟ يعني لو عندي شكل رباعي فيه ضلعين متوازيين، بقول إن الشكل ده اسمه شبه منحرف، وبيكون شكله بالشكل ده. ودي علامة توازي الأضلاع. لو عندي كمان الضلعين التانيين متوازيين، بنقول عليه متوازي أضلاع، وبيبقى رسمه بالشكل ده. كل ضلعين فيه متوازيين.

لو فيه ضلعين متوازيين بتبقى المسافة العمودية ما بينهم متساوية. يعني لو الضلعين دول متساويين، يبقى معنى كده إن المسافة ما بينهم متساوية. يبقى معنى كده إن المسافة دي هتبقى نفسها هي المسافة دي. ولو العكس لو جينا شُفنا الضلعين التانيين، هنلاقي إن المسافة دي هتساوي المسافة دي.

النوع التالت من أنواع الأشكال رباعية الأضلاع، اللي هو لو كل الأضلاع متساوية. ده بيبقى عندنا شكل اسمه معيّن. وبيبقى رسمه بالشكل ده. جميع أطوال الأضلاع متساوية. وفيه كل ضلعين متقابلين متوازيين.

نقلب الصفحة، وناخد باقي الأنواع.

لو متوازي الأضلاع كان زواياه قائمة؛ يعني متوازي الأضلاع زائد زوايا قائمة. ده بيدّي لنا شكل اسمه مستطيل. وبيبقى رسمه بالشكل ده.

النوع اللي هو الأخير، اللي هو لو حصل والمستطيل كان فيه كل الأبعاد متساوية. ده بيدّيني مربع. أو بمعنى تاني لو معيّن اللي هو كل أطوال أضلاعه متساوية، كان فيه زواياه قائمة، هيبقى اسمه برضو مربع، وبيبقى بالشكل ده.

نقلب الصفحة وناخد مثال: عندنا شكل رباعي بالشكل ده. الشكل أ ب ج د. الزوايا الداخلية فيه قيمتها اتنين س درجة، اتنين س درجة، اتنين س درجة، واتنين س درجة. بيقول لنا إن الضلع ده يساوي الضلع ده، والضلع ده بيساوي الضلع ده. والضلع ده موازي للضلع ده، والضلع ده موازي للضلع ده. طيب عايزين نجيب قيمة الـ س دي بكام. إحنا عندنا طريقتين للحل.

أول طريقة إن أنا أحدّد نوع الشكل، ومن خلال نوع الشكل ممكن أعرف قيمة الزاوية. يعني الشكل ده مستطيل، جميع زواياه تساوي تسعين درجة. يبقى أنا أقدر أقول إن الاتنين س تساوي التسعين. يبقى الـ س لوحدها تساوي كام؟ يبقى هنقسم التسعين عَ الاتنين، هتبقى خمسة وأربعين. يبقى معنى كده إن كل زاوية هنا تسعين درجة. يبقى أنا كده قدرت أجيب قيمة الـ س.

فيه طريقة حل تانية، بإن أنا اجمع الزوايا الداخلية اللي هي اتنين س، زائد اتنين س، زائد اتنين س، زائد اتنين س. وأقول إن ده كله يساوي تلتمية وستين درجة. وبالتالي أقدر أجيب قيمة الـ س بقسمة التلتمية وستين على التمنية، هيطلع لي إن الـ س تساوي خمسة وأربعين درجة. يبقى الطريقتين للحل صح.

ملخص اللي اتكلمنا عنه في فيديو النهارده: إن الشكل الرباعي لو كان فيه ضلعين متوازيين هيبقى شبه منحرف. الشبه المنحرف لو فيه ضلعين آخرين متوازيين هيبقى متوازي أضلاع. متوازي الأضلاع زائد زاوية قائمة هيبقى مستطيل. متوازي الأضلاع زائد أضلاع متساوية هيبقى معيّن. مستطيل زائد المعيّن هيبقى مربع.