فيديو: قسمة الأعداد الصحيحة التي تُمثِّل السعة

تشرب مجموعة من الأفيال ٩٨٢ لترًا من المياه كلَّ يوم. ما عدد الأيام التي يكفي فيها هذه المجموعة ٤‎٩١٠ لترات للشرب؟

٠٢:٢٩

‏نسخة الفيديو النصية

تشرب مجموعة من الأفيال تسعمية واتنين وتمانين لترًا من المياه كل يوم. ما عدد الأيام التي يكفي فيها هذه المجموعة أربعة آلاف وتسعمية وعشر لترات للشرب؟

عشان نعرف عدد الأيام اللي هتشرب فيها مجموعة من الأفيال أربعة آلاف وتسعمية وعشرة لتر من المياه. هنقسم العدد ده على الكمية اللي بتشربها المجموعة كل يوم. يعني عدد الأيام هيساوي أربعة آلاف وتسعمية وعشرة على تسعمية واتنين وتمانين.

وعشان نحلّ السؤال ده بسهولة هنستخدم التقريب. ففي حالة التقريب هنقرّب العدد الأول لأقرب ألف، فأربعة آلاف وتسعمية وعشرة هتساوي تقريبًا خمسة آلاف. وهنقرّب العدد التاني لأقرب ألف برضو، فتسعمية واتنين وتمانين بالتقريب لأقرب ألف هيساوي تقريبًا ألف. يبقى ممكن نقول إن عدد الأيام هيساوي تقريبًا خمسة آلاف على ألف، وده بيساوي خمسة. يعني عدد الأيام هيساوي تقريبًا خمس أيام.

وعشان نتحقّق من صحة الإجابة، هنضرب عدد الأيام اللي أوجدناه باستخدام التقريب، اللي هو خمسة. في المقدار اللي بتشربه الأفيال في اليوم الواحد، اللي هو تسعمية واتنين وتمانين. فإذا كان الناتج بيساوي أربعة آلاف وتسعمية وعشرة تبقى إجابتنا صحيحة.

فهنضرب تسعمية واتنين وتمانين في خمسة. أول حاجة نضرب خمسة في اتنين فده هيساوي عشرة، فنكتب صفر في الناتج، ونضيف واحد فوق القيمة المكانية اللي بعد كده.

بعدين نضرب خمسة في تمنية فده هيساوي أربعين، ونضيف واحد فده هيساوي واحد وأربعين. فهنكتب واحد في الناتج، ونضيف أربعة فوق القيمة المكانية اللي بعد كده. بعدين نضرب خمسة في تسعة فده هيساوي خمسة وأربعين، ونضيف أربعة فده هيساوي تسعة وأربعين.

يبقى تسعمية واتنين وتمانين مضروبة في خمسة هتساوي أربعة آلاف وتسعمية وعشرة، وبالتالي يبقى عدد الأيام بيساوي خمس أيام.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.