فيديو السؤال: ترتيب أعداد معطاة ترتيبًا تصاعديًّا

نسخة الفيديو النصية

رتّب الأعداد: ست آلاف ميتين تمنية وتسعين. خمسة آلاف تسعمية تمنية وتمانين. ألفين مية خمسة وسبعين. سبعة آلاف تمنمية تسعة وتلاتين. خمسة آلاف تلاتة وتلاتين. ترتيبًا تصاعديًّا.

عاوزين نرتّب الأعداد اللي قدامنا دي ترتيبًا تصاعديًّا، يعني من الصغير للكبير. فنبدأ نكتب الأعداد بتاعتنا. أول عدد، ست آلاف ميتين تمنية وتسعين. والعدد اللي بعده، خمسة آلاف تسعمية تمنية وتمانين. واللي بعده، ألفين مية خمسة وسبعين. واللي بعده، سبعة آلاف تمنمية تسعة وتلاتين. والأخير، خمسة آلاف تلاتة وتلاتين. كده إحنا نقلنا الأعداد تحت. نبدأ بقى نرتّبها.

هنلاحظ إن كل عدد من الأعداد اللي قدامنا دي، مكوّن من أربع أرقام. يعني العدد فيه أربع خانات؛ آحاد، وعشرات، ومئات، وألوف. فعشان نبدأ نقارن ما بينهم، هنبَروِز خانة الألوف في كل عدد. فالعدد الأول، الستة فيه في خانة الألوف. واللي بعده، الخمسة في خانة الألوف. واللي بعده الاتنين. واللي بعده السبعة. واللي بعده الخمسة.

ونبدأ نقارن بين الأعداد اللي إحنا بَروِزناها دي؛ الستة، والخمسة، والاتنين، والسبعة، والخمسة. إحنا بنرتّب ترتيب تصاعدي، يعني من الصغير للكبير. مين أصغر عدد قدامنا؛ الستة، ولّا الخمسة، ولّا الاتنين، ولّا السبعة، ولّا الخمسة؟ أكيد الاتنين. فده معناه إن العدد ده، هو أصغر عدد. فندّي له رقم واحد.

نشوف اللي بعده. كده اتبقّى لنا الستة، والخمسة، والسبعة، والخمسة. مين الصغير؟ أكيد الخمسة. بس إحنا هنلاقي عندنا هنا خمستين، في العددين دول. عندنا أول خمسة جاي بعدها تسعة. وتاني خمسة جاي بعضها صفر. ما دام الخمستين هنا زيّ بعض، فمش هنعرف نقارن ما بينهم، فنشوف الرقم اللي جنبهم.

الخمسة اللي جنبها تسعة، هو العدد الكبير. والخمسة اللي جنبها صفر، هو العدد الصغير. وإحنا بنرتّب تصاعديًّا من الصغير للكبير. فيبقى الخمسة آلاف تلاتة وتلاتين، هو الأصغر، فياخد اتنين. وخمسة آلاف تسعمية تمنية وتمانين، هو الأكبر منه، فياخد الترتيب تلاتة.

كده اتبقّى لنا الستة، والسبعة. مين الصغير؟ أكيد الستة. فالستة هي اللي تاخد الترتيب أربعة؛ يعني العدد ست آلاف ميتين تمنية وتسعين. وآخِر عدد وأكبر عدد، اللي هو فيه سبعة، اللي هو سبعة آلاف تمنمية تسعة وتلاتين، هياخد الترتيب خمسة. وبكده نكون رتّبنا الخمس أعداد اللي عندنا من الصغير للكبير.

أصغر واحد هو ألفين مية خمسة وسبعين. وبييجي بعده خمسة آلاف تلاتة وتلاتين. وييجي بعده خمسة آلاف تسعمية تمنية وتمانين. وييجي بعده ست آلاف ميتين تمنية وتسعين. وآخِر واحد هو سبعة آلاف تمنمية تسعة وتلاتين. ويبقى هو ده الترتيب الصح.