فيديو: نظرية متباينة المثلث

أيٌّ من التالي يمكن أن يكون أطوال أضلاع مثلث؟ [أ] ١٣ سم، ١٨ سم، ٤٣ سم [ب] ٧ سم، ٣٦ سم، ٤٣ سم [ج] ١٣ سم، ٣٦ سم، ٤٣ سم

٠٢:٥١

‏نسخة الفيديو النصية

أيٌّ من التالي يمكن أن يكون أطوال أضلاع مثلث؟ ومعطى عندنا الاختيارات؛ واحد: تلتاشر سنتيمتر وتمنتاشر سنتيمتر وتلاتة وأربعين سنتيمتر، اتنين: سبعة سنتيمتر وستة وتلاتين سنتيمتر وتلاتة وأربعين سنتيمتر، تلاتة: تلتاشر سنتيمتر ستة وتلاتين سنتيمتر وتلاتة وأربعين سنتيمتر.

وخلينا نفتكر إن لو عندنا أي مثلث بالشكل ده، ومن نظرية متباينة المثلث، إن مجموع طولي أي ضلعين في مثلث أكبر من طول الضلع الثالث؛ فمثلًا في المثلث أ ب ج هيبقى طول الضلع أ ب زائد طول الضلع ب ج لازم يكون أكبر من طول الضلع أ ج، وبنفس الطريقة في أي ضلعين من أضلاع المثلث لازم يكون مجموع طولهم أكبر من طول الضلع التالت، فهنيجي نشوف الاختيارات اللي عندنا ونشوف أنهي فيهم اللي ممكن يكون أطوال أضلاع مثلث.

فهنبدأ نجرب الاختيار الأول، وهنجرب الأول نجمع تلتاشر زائد تمنتاشر، فلما نجمعهم هيساوي واحد وتلاتين، فهنلاحظ إن واحد وتلاتين أقل من تلاتة وأربعين؛ فمعنى كده إن مجموع طول ضلعين من أضلاع المثلث مش أكبر من طول الضلع التالت، فبالتالي هيبقى الاختبار الأول إجابة خاطئة.

وبنفس الطريقة هنجرب في الاختيار التاني، فهنجمع سبعة زائد ستة وتلاتين، ويفضّل إننا نبدأ دايمًا بأقل طولين عشان نقلل من عدد مرات التجربة، فلما هنحسب سبعة زائد ستة وتلاتين هتساوي تلاتة وأربعين، وهنلاحظ أنها بتساوي طول الضلع التالت، لكن النظرية إن لازم يكون طول أي ضلعين من المثلث أكبر من طول الضلع التالت؛ فبالتالي هيبقى الاختيار التاني برضو إجابة خاطئة.

بعد كده هنجرب آخر اختيار عندنا، وهنبدأ نجمع تلتاشر زائد ستة وتلاتين اللي هما أقل الأطوال، فلما هنجمع تلتاشر زائد ستة وتلاتين هتساوي تسعة وأربعين، وهنلاحظ إن تسعة وأربعين أكبر من طول الضلع التالت؛ فبالتالي هيبقى تلتاشر سنتيمتر وستة وتلاتين سنتيمتر وتلاتة وأربعين سنتيمتر يمكن إن يكونوا أطوال أضلاع مثلث.

وبالتالي هيبقى الاختيار التالت هو الإجابة الصحيحة.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.