تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.

فيديو: تحديد الأشكال الثلاثية الأبعاد

سوزان فائق

يوضح الفيديو تحديد الأشكال الثلاثية الأبعاد، ومفهومها، وخواصها، وأمثلة من حياتنا العملية.

٠٤:١٣

‏نسخة الفيديو النصية

هنتكلم في الفيديو ده عن تحديد الأشكال الثلاثية الأبعاد، هنعرف يعني إيه الشكل الثلاثي الأبعاد، إيه خواص الأشكال الثلاثية الأبعاد، إيه هي المجسمات، وهنعرف إن الأشكال دي كلها أشكال موجودة في حياتنا.

الأشكال الثلاثية الأبعاد هي مجسّمات لها طول وعرض وارتفاع؛ يعني مثلًا الخزنة اللي بنحط فيها الفلوس دي، لها طول وعرض وارتفاع، يبقى الأشكال الثلاثية الأبعاد هي مجسّمات، لها ثلاثة أبعاد.

هنعرف إيه هي الأشكال الثلاثية الأبعاد اللي إحنا ممكن نشوفها في حياتنا.

فيه الكرة، وفيه المكعب، وفيه الهرم، وفيه المخروط، وفيه متوازي المستطيلات، وكمان الأسطوانة. هي دي الأشكال اللي ممكن بنقابلها كتير أوي في حياتنا. الكورة بتبقى سطحها منحني كده. المكعب بيبقى وِشُوشُه دي شكل بعض. الهرم بيبقى شكل الهرم؛ له راس كده من فوق وقاعدة من تحت. المخروط بيبقى له راس من فوق وبيبقى فيه منحنى من تحت. متوازي المستطيلات يبقى في مستطيلات، وممكن يبقى فيه كمان هنا مربع. الأسطوانة بيبقى فيها هنا دايرة، وهنا قاعدتها دايرة، وبيبقى في هنا خطوط مستقيمة. وكمان ممكن نرسمهم بالأشكال دي؛ اللي هيبقى فيها خطوط منقطة دي، يعني مش شايفينها، يعني إحنا مش شايفين في أول رسمة، اللي هي الأسطوانة دي، مش شايفين الخط اللي ورا ده، فعاملينه منقّط. متوازي المستطيلات كمان عاملين فيه خطوط منقطة اللي مش باينة من ورا. المكعب، والهرم، والمخروط، والكرة.

يبقى لما هيجيلنا شكل بشكل من الأشكال دي، هنعرف اسمه إيه. الأشكال اللي قدامنا دي بنقابلها في حياتنا، عايزين نعرف كل شكل اسمه إيه. أول حاجه كرة القدم دي على شكل كرة. علبة البطاطس الطويلة دي وفيها القاعدة بتاعتها هنا دايرة، هنقول عليها أسطوانة. مكعب الثلج كله شكل بعضه، هنقول عليه مكعب؛ يبقى كرة، أسطوانة، مكعب.

بسكوتة الأيس كريم شكل مخروط. البرتقانة على شكل كرة. علبة المربى على شكل أسطوانة. علبة الكبريت على شكل متوازي مستطيلات. عَجَل حذاء التزحلق شكل أسطوانة. كرة التنس على شكل كرة. علب الهدايا دي على شكل متوازي مستطيلات. أهرامات الجيزة أشكال هرمية.

اتكلمنا في الفيديو ده عن الأشكال الثلاثية الأبعاد إزاي بنحددها، وإيه خواصها؛ إنها بيبقى لها تلات أبعاد؛ الطول والعرض والارتفاع. وعرفنا أشكال الكرة، والمكعب، والهرم، والأسطوانة، ومتوازي المستطيلات، والمخروط، وربطناهم بالأشكال في حياتنا.