فيديو: الأشكال المستوية: الأضلاع والرءوس

يوضح الفيديو عدد الأضلاع والرءوس فى الأشكال المستوية والعلاقة بين العددين، مع أمثلة توضيحية.

٠٦:٠٣

‏نسخة الفيديو النصية

الأشكال المستوية: الأضلاع والرؤوس.

هنتكلّم في الدرس ده على مجموعة من الأشكال المستوية. وهنتعرّف على كل شكل منهم؛ عدد أضلاعه قدّ إيه، وعدد الرؤوس اللي فيه قدّ إيه. أول شكل عندنا ده، هو المثلث. المثلث بيتكوّن من مجموعة من الأضلاع والرؤوس. ده ضلع، يبقى كده أول ضلع. ده كمان ضلع، يبقى كده عنده ضلعين. وده الضلع التالت، يبقى المثلث فيه تلات أضلاع. هنشوف الرؤوس. الرأس هي نقطة تَلاقي الضلعين. فدي رأس. كده اتنين. كده تلات رؤوس. يبقى المثلث فيه تلات أضلاع، وتلات رؤوس. هنلاحظ إن عدد الأضلاع بيساوي عدد الرؤوس.

لو بصّينا على الشكل اللي قدامنا ده، الشكل ده عبارة عن مربع. عايزين نشوف عدد أضلاع المربع. هنبتدي نعدّهم مع بعض. واحد، اتنين، تلاتة، أربعة. يبقى المربع بيتكوّن من أربع أضلاع. نبتدي نشوف عدد الرؤوس اللي موجودة في المربع. واحد … الرأس هي نقطة تَلاقي ضلعين. اتنين، تلاتة، أربعة. يبقى كده المربع فيه أربع رؤوس. هنلاحظ برضو أربع أضلاع، وأربع رؤوس. يعني عدد الأضلاع بيساوي عدد الرؤوس.

ولو بصّينا على الشكل اللي قدامنا دلوقتي، اللي هو الدائرة. يا ترى فيه أيّ أضلاع في الدائرة؟ الضلع ده بيبقى عبارة عن قطعة مستقيمة، من مجموعة القطع المستقيمة اللي بيتكوّن منها الشكل. الدائرة ما فيهاش أيّ قطع مستقيمة. يبقى الدائرة لا يوجد فيها أيّ أضلاع. وبالمثل لو جينا نشوف، هي فيها أيّ رؤوس. الرأس عبارة عن إيه؟ عن نقطة تَلاقي ضلعين. ما فيش أيّ أضلاع أصلًا في الدائرة. فبالتالي لا يوجد رؤوس. يبقى في الدائرة لا يوجد أضلاع، ولا يوجد رؤوس.

هنشوف دلوقتي مجموعة من الأمثلة، فيها مجموعة متنوعة من الأشكال المستوية. ونشوف عدد الأضلاع والرؤوس في كلٍّ منها.

أول شكل عندنا هو شبه منحرف. هنبتدي نعدّ عدد الأضلاع اللي فيه. واحد، اتنين، تلاتة، أربعة. يبقى شبه المنحرف فيه أربع أضلاع. نبتدي نعدّ الرؤوس. واحد، اتنين، تلاتة، أربعة. يبقى شبه المنحرف فيه أربع رؤوس. أربع أضلاع، وأربع رؤوس.

أمّا الشكل التاني اللي قدامنا، فهو مثلث. هنبتدي نعدّ عدد الأضلاع اللي في المثلث. واحد، اتنين، تلاتة. يبقى المثلث بيحتوي على تلات أضلاع. نبتدي نعدّ الرؤوس. واحد، اتنين، تلاتة. يبقى المثلث فيه تلات رؤوس. تلات أضلاع، وتلات رؤوس.

أمّا الشكل اللي قدامنا دلوقتي، فهو متوازي أضلاع. نبتدي نعدّ عدد أضلاعه. واحد، اتنين، تلاتة، أربعة. يبقى برضو متوازي الأضلاع بيحتوي على أربع أضلاع. عدد الرؤوس اللي فيه: واحد، اتنين، تلاتة، أربعة. يبقى فيه أربع رؤوس. برضو أربع أضلاع، وأربع رؤوس. نفس العدد من الأضلاع والرؤوس. عدد الأضلاع بيساوي عدد الرؤوس.

الشكل اللي عندنا بعد كده، هو شكل سداسي. هنعدّ عدد الأضلاع. واحد، اتنين، تلاتة، أربعة، خمسة، ستة. هو اسمه سداسي، عشان بيتكوّن من ست أضلاع. يبقى عدد الأضلاع في الشكل السداسي، هو ستة. هنشوف دلوقتي عدد الرؤوس. واحد، اتنين، تلاتة، أربعة، خمسة، ستة. يبقى برضو عدد الرؤوس ستة. بنفس الطريقة عدد الأضلاع، بيساوي عدد الرؤوس.

لو بصّينا على الشكل اللي بعد كده، اللي هو الدائرة. الدائرة لا يوجد فيها أضلاع، ولا رؤوس.

آخر شكل في مجموعة الأشكال اللي قدامنا، هو المستطيل. هنشوف عدد الأضلاع اللي بيتكوّن منها المستطيل. واحد، اتنين، تلاتة، أربعة. يبقى المستطيل فيه أربع أضلاع. عدد الرؤوس هنعدّها. واحد، اتنين، تلاتة، أربعة. يبقى وأربع رؤوس.

هنلاحظ في كل الأمثلة اللي عندنا، إن عدد الأضلاع بيساوي عدد الرؤوس. ولمّا كان في شكل زيّ الدائرة، ما كانش فيه أيّ أضلاع، فما كانش فيه بالتالي أيّ رؤوس.

وبكده اتعرّفنا في الدرس ده على مجموعة كبيرة من الأشكال المستوية. واتعرّفنا على عدد الأضلاع وعدد الرؤوس في كلٍّ منها. وعرفنا إن كل الأشكال المستوية، عدد الأضلاع اللي فيها، بيبقى بيساوي عدد الرؤوس.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.