فيديو: تمثيل وقراءة البيانات الممثَّلة بالرسم الخطي

يوضح الفيديو طريقة تمثيل البيانات باستخدام الرسم الخطي، وكيفية قراءة البيانات الممثَّلة به، وإيجاد الوسيط والمنوال والقيم المتطرفة، مع حل أمثلة توضيحية.

٠٩:٢٧

‏نسخة الفيديو النصية

تمثيل وقراءة البيانات الممثَّلة بالرسم الخطي.

في الفيديو ده هنشرح طريقة تمثيل البيانات، باستخدام الرسم الخطي. وإزّاي نقدر نقرا البيانات المعروضة فيه. وكمان إزّاي نقدر نحصل على المنوال، والوسيط، والقيم المتطرفة للبيانات الممثَّلة عليه. مع حل أمثلة. وأول حاجة هنبدأ بيها، هي طريقة استخدام الرسم الخطي لعرض البيانات.

لاستخدام الرسم الخطي لعرض البيانات، أول حاجة بنرسم خط الأعداد. بعد كده بنضع علامة إكس، أو نقطة، فوق نقاط على خط الأعداد. والنقاط دي، اللي على خط الأعداد، بتمثّل البيانات بتاعتنا. عشان نفهم أكتر، هنبدأ نحل مثال على تمثيل البيانات باستخدام الرسم الخطي. هنفتح صفحة جديدة.

بنكمّل ونقرا المثال التالي. يوضّح الجدول التالي عدد الأسماك التي اصطادها أحمد على مدار أسبوع. مثِّل البيانات الموضَّحة في الجدول، بالرسم الخطّي. من خلال الجدول التالي، بنلاقي إن أحمد يوم السبت اصطاد عدد من الأسماك، اتنين. ويوم الحدّ، خمسة. يوم الإتنين، أربعة. يوم التلات، اتنين. يوم الأربع، أربعة. يوم الخميس، سبعة. يوم الجمعة، اتنين.

زيّ ما شرحنا قبل كده، لاستخدام الرسم الخطي لعرض البيانات، أول خطوة بنعملها هي رسم خط الأعداد. رسمنا خط الأعداد، زيّ ما إحنا شايفين، من واحد إلى تمنية. ملحوظة مهمة لازم نقولها؛ لو عاوزين نحدّد بداية ونهاية خط الأعداد، فبنبدأ نبصّ عندنا في البيانات. فبنلاقي إن أقل قيمة عندنا هي اتنين، وأكبر قيمة عندنا هي سبعة. وبكده كان ممكن خط الأعداد يبدأ من اتنين، وينتهي لحدّ سبعة. وده هيكون الجزء الكافي لتمثيل البيانات الموجودة عندنا في المثال التالي. حاجة أخيرة، بعد ما رسمنا خط الأعداد، لازم نكتب البيانات عندنا بتمثّل إيه. فكتبنا عدد الأسماك التي تمّ صيدها.

تاني خطوة، هنضع علامة إكس، أو نقطة، فوق البيانات الموجودة على خط الأعداد. بنلاقي عندنا إن يوم السبت، أحمد اصطاد عدد اتنين من الأسماك. فبنيجي كده على اتنين على خط الأعداد، ونضع علامة إكس. بعد كده بنلاقي إن يوم الحدّ، تمّ اصطياد خمس أسماك. فبنيجي على خمسة على خط الأعداد، ونضع إكس. بنلاقي إن اليوم اللي بعده، أحمد اصطاد أربع أسماك. فبنيجي على أربعة، ونضع علامة إكس.

بعد كده اليوم اللي بعده، بنلاقي أحمد اصطاد سمكتين. فبنيجي فوق الإكس اللي موجودة على الاتنين، ونضع كمان إكس. اليوم اللي بعده، بنلاقي إن أحمد اصطاد أربع أسماك. فبنيجي على أربعة، ونضع كمان إكس فوق الإكس الموجودة. يوم الخميس، بنلاقي إن أحمد اصطاد سبع أسماك. فبنيجي على سبعة، ونضع علامة إكس. ويوم الجمعة، بنلاقي إن أحمد اصطاد عدد اتنين من الأسماك. فبنيجي على اتنين، ونضع كمان إكس.

وبكده يبقى إحنا عرضنا الجدول اللي إحنا شفناه، واللي بيمثّل عدد الأسماك اللي اصطادها أحمد. عرضنا البيانات الموجودة، باستخدام الرسم الخطّي، زيّ ما إحنا شايفين كده. هنحلّ بعد كده مثال آخر، ونشوف إزّاي نقدر نقرا البيانات الموجودة على الرسم الخطي.

بنكمّل ونقرا المثال التالي. في اختبار قصير، كانت نتائج طلاب فصل، كما في التمثيل الموضَّح. حدّد الوسيط، والمنوال، والقيم المتطرفة لهذه البيانات. زيّ ما إحنا شايفين كده، بنلاقي إن البيانات معروضة باستخدام الرسم الخطّي. بنلاقي مكتوب فوق خط الأعداد، ما تمثّله هذه البيانات؛ وهي درجات الطلاب في الاختبار.

بنلاقي إن الدرجات عندنا بتتراوح بين اتنين وبين تمنية. بنلاقي إن طالب واحد بس، هو اللي حصل على اتنين من الدرجات. بنلاقي إن فيه تلات طلاب حصلوا على خمسة. وفيه طالبين حصلوا على ستة. وفيه أربع طلاب حصلوا على سبعة. وفيه طالب واحد حصل على تمنية.

يبقى على سبيل المثال، لو فرضنا إن الدرجة بتاعة الاختبار من عشرة. بنلاقي فيه طالب واحد حصل على اتنين من عشرة. فيه تلات طلاب حصلوا على خمسة من عشرة. فيه طالبين حصلوا على ستة من عشرة. فيه أربع طلاب حصلوا على سبعة من عشرة. وطالب واحد حصل على تمنية من عشرة. مطلوب منّنا نحدّد أول حاجة الوسيط.

لتحديد الوسيط هنا، بنلاقي الوسيط هو القيمة التي تتوسط البيانات على خط الأعداد. فبنلاقي هنا إن البيانات هي الدرجات اللي حصل عليها الطلاب، زيّ ما إحنا شايفين كده. اتنين، وخمسة، وستة، وسبعة، وتمنية. طبعًا على خط الأعداد مرتَّبة ترتيبًا تصاعديًّا. فبنلاقي عندنا إن الستة هي دي القيمة التي تتوسط البيانات عندنا. يبقى البيانات اللي عندنا، تاني كده، هي عبارة عن: اتنين، وخمسة، وستة، وسبعة، وتمنية. القيمة التي تتوسطهم، هي الستة. يبقى بنكتب كده: الوسيط عبارة عن ستة.

تاني حاجة، مطلوب تحديد المنوال. المنوال هنا هو الدرجة اللي حصل عليها أكتر عدد من الطلاب. علامات الإكسات عندنا، بتمثّل عدد الطلاب. فبنلاقي إن فيه أربع طلاب حصلوا على سبعة من عشرة، بِفَرض يعني إن الدرجة من عشرة. وبكده المنوال عندنا هيكون عبارة عن سبعة.

آخر حاجة مطلوب تحديدها، وهي القيم المتطرفة. القيم المتطرفة هي نقطة بعيدة عن تجمُّع باقي البيانات. فبنلاقي على خط الأعداد، إن البيانات عندنا متجمِّعة خلال خمسة إلى تمنية. أمّا اتنين، فبنلاقي إن النقطة دي بعيدة عن تجمُّع البيانات. وبالتالي اتنين بتكون القيمة المتطرفة.

وبكده يبقى من خلال المثال التالي، قدرنا نقرا البيانات من على الرسم الخطي. قدرنا نحدّد الوسيط، والمنوال، والقيم المتطرفة للبيانات المعروضة. هنكمّل ونحل مثال آخر.

بنكمّل ونقرا المثال التالي. يمثّل الجدول التالي أعمار أطفال في نزهة بحرية. مثِّل البيانات الموضَّحة في الجدول، باستخدام الرسم الخطي. بنلاقي عندنا في الجدول التالي أعمار الأطفال: حداشر، حداشر، عشرة، اتناشر، عشرة، حداشر، عشرة، حداشر.

بعد كده بنبدأ نستخدم الرسم البياني، لتمثيل البيانات اللي قدامنا. وأول حاجة بنعملها، إننا بنرسم خط الأعداد. رسمنا خط الأعداد زيّ ما إحنا شايفين، بيبدأ من عشرة إلى اتناشر. وده لأننا بنلاقي إن أصغر قيمة في البيانات عندنا، مقدارها عشرة. وأكبر قيمة، اتناشر. فبالتالي من عشرة لاتناشر، هي دي القيم اللي هتكون فيها البيانات معروضة، وكفاية جدًّا.

بعد كده بنبدأ تمثيل البيانات على خط الأعداد. بنلاقي إن أول طفل عمره حداشر سنة. بنيجي هنا على حداشر على خط الأعداد، ونضع علامة إكس. تاني طفل برضو حداشر سنة، نضع كمان علامة إكس فوق حداشر. الطفل اللي بعده بنلاقي عمره عشر سنوات، بنيجي على عشرة، ونضع إكس. الطفل اللي بعده اتناشر سنة، بنيجي على اتناشر، ونضع إكس. الطفل اللي بعد عشر سنوات، بنيجي عَ العشرة، ونضع كمان إكس. بعد كده حداشر، نضع إكس فوق حداشر. بعد كده عشرة، نضع إكس فوق عشرة. بعد كده حداشر، نضع إكس فوق حداشر.

وبكده يبقى إحنا قدرنا نعرض البيانات الموجودة في الجدول، باستخدام الرسم الخطي، زيّ ما إحنا شايفين كده. وكمان ممكن نقرا الرسم الخطي اللي قدامنا. خلّونا نشوف إزّاي. بنلاقي إن الرسم الخطي اللي قدامنا، بيمثِّل أعمار الأطفال. فبنلاقي إن عدد الأطفال اللي عمرهم عشر سنوات، تلات أطفال. وعدد الأطفال اللي عمرهم حداشر سنة، عبارة عن أربع أطفال. وعدد الأطفال اللي عمرهم اتناشر سنة، طفل واحد.

بكده يبقى في الفيديو ده اتعلّمنا طريقة تمثيل البيانات، باستخدام الرسم الخطي. وإزّاي نقدر نقرا البيانات المعروضة. وكمان إزّاي نقدر نحصل على المنوال، والوسيط، والقيم المتطرفة للبيانات. وحلّينا أمثلة توضيحية.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.