فيديو: كتابة الأعداد الكسرية في صورة كسور غير فعلية

يوضح الفيديو كيفية كتابة الأعداد الكسرية في صورة كسور غير فعلية من خلال مجموعة متنوعة من الأمثلة.

٠٥:٥١

‏نسخة الفيديو النصية

هنشوف في الفيديو ده إزاي نقدر نكتب أي عدد كسري في صورة كسر غير فعلي.

ونفتكر كده العدد الكسري بيبقى مكتوب على الصورة اللي قدامنا دي. الجزء الأول ده بيبقى بيتكوّن من عدد صحيح. والجزء التاني بيبقى عبارة عن كسر.

أما الكسر غير الفعلي فبيبقى كسر مكوّن من بسط ومقام. بس البسط بتاعه بيبقى أكبر من أو يساوي المقام.

في الصورة اللي قدامنا دي، فيه أحد أنواع الحيتان بيبلغ طوله خمسة وواحد على تلاتة أمتار. نقدر نمثّل العدد اللي عندنا ده باستخدام النماذج بالطريقة دي. إحنا عندنا الجزء الصحيح في العدد الكسري ده هو خمسة. يبقى هنستخدم خمس وحدات كاملة، كل منها بيمثل واحد صحيح. وبعدين عايزين نمثل دلوقتي الجزء الكسري اللي هو واحد على تلاتة. فهناخد وحدة كاملة نقسّمها لتلات أجزاء متساوية، كل جزء فيها هيبقى بيمثّل واحد على تلاتة. وهنظلل جزء واحد من الأجزاء دي. كده يبقى استخدمنا واحد على تلاتة من الوحدة.

لو أخدنا كل وحدة من الوحدات اللي بتمثل الواحد الصحيح في النماذج اللي عندنا دي، وقسمناها لتلات أجزاء متساوية. دلوقتي عشان نقدر نخلّي العدد الكسري اللي قدامنا ده مكتوب على صورة كسر غير فعلي. هنشوف عدد الأتلات اللي بيتكون منها الشكل. يعني عندنا كام تِلت في النموذج اللي قدامنا ده. لو عدّيناهم هنلاقيهم ستاشر تِلت. يبقى نقدر نقول إن العدد الكسري خمسة وواحد على تلاتة نقدر نكتبه على صورة الكسر غير الفعلي ستاشر على تلاتة.

هنشوف دلوقتي إزاي ممكن نكتب أي عدد كسري على صورة كسر غير فعلي بطريقة رياضية. دلوقتي بناخد المقام بتاع الجزء الكسري، وبنضربه في الجزء الصحيح. هيبقى تلاتة في خمسة هيساوي خمستاشر. دي أول خطوة.

الخطوة اللي بعد كده هنجمع على الناتج اللي حصلنا عليه ده بسط الجزء الكسري، اللي هو هنا واحد. فهيبقى الناتج كده ستاشر.

الخطوة التالتة بقى إننا هنخلي ناتج الجمع اللي حصلنا عليه ده بسط لكسر مقامه المقام الأصلي، اللي هو تلاتة. فهيبقى كده خمسة وواحد على تلاتة، ده بيكافئه الكسر غير الفعلي ستاشر على تلاتة.

في المثال اللي عندنا ده، مطلوب مننا نكتب العدد الكسري اتنين وسبعة على تمنية على صورة كسر غير فعلي.

لمّا بنيجي نحوّل من عدد كسري لكسر غير فعلي. بنبتدي أول خطوة بنعملها بنضرب المقام بتاع الجزء الكسري في العدد الصحيح اللي عندنا. يعني هنضرب تمنية في اتنين هيبقى حاصل الضرب ستاشر.

الخطوة اللي بعد كده إننا هنجمع البسط على حاصل الضرب اللي حصلنا عليه. يعني هنجمع سبعة على الستاشر اللي حصلنا عليها، هيصبح الناتج تلاتة وعشرين.

أما الخطوة التالتة والأخيرة، فالناتج اللي حصلنا عليه ده بيبقى بسط لكسر، والمقام بتاعه هو المقام الأصلي اللي عندنا، اللي هو التمنية. فهيبقى الكسر غير الفعلي المكافئ هو تلاتة وعشرين على تمنية.

ونقدر نستخدم النماذج عشان نتأكد من صحة الحل اللي حصلنا عليه. هنبدأ الأول بتمثيل العدد الكسري اتنين وسبعة على تمنية. اتنين وسبعة وتمنية، معناها إن إحنا هنسخدم نموذج كامل بيمثّل واحد صحيح. ونموذج آخر برضو بيمثّل واحد صحيح كده. عشان نقدر نمثل الجزء الصحيح في العدد الكسري اللي هو اتنين.

وبعد كده نموذج هنقسّمه لتمن أجزاء متساوية. هنظلّل سبع أجزاء من التمنية دول. يبقى كده مثّلنا بيهم الكسر اللي هو سبعة على تمنية. الجزء الكسري في العدد الكسري اللي عندنا. وعشان نقدر باستخدام النماذج نحصل على الكسر غير الفعلي المكافئ. هناخد النموذج اللي بيمثّل الواحد الصحيح ونقسّمه لتمن أجزاء متساوية.

فهيبقى كل جزء فيهم بيمثّل واحد على تمنية. بعد كده هنعدّ عدد الأثمان اللي بيتكوّن منها الشكل اللي قدامنا. هنلاقيهم تلاتة وعشرين جزء. يعني دلوقتي الكسر غير الفعلي اللي بيمثّله النموذج أصبح تلاتة وعشرين على تمنية.

يبقى كده اتأكدنا إن العدد الكسري اتنين وسبعة على تمنية، بيكافئه الكسر غير الفعلي تلاتة وعشرين على تمنية.

في المثال اللي عندنا ده هنعرف إن متوسط ساعات النوم اللي القط بينامها تقريبًا اتناشر وتلاتة على خمسة ساعات يوميًّا. مطلوب مننا نكتب العدد ده في صورة كسر غير فعلي.

عشان نكتب أي عدد كسري على صورة كسر غير فعلي. هناخد مقام الجزء الكسري اللي عندنا ونضربه في العدد الصحيح. دي بتبقى أول خطوة.

بعد كده الخطوة التانية إننا بنضيف عليه بسط الجزء الكسري اللي هو التلاتة. فهيبقى الناتج دلوقتي تلاتة وستين.

آخر خطوة عندنا هي إن الناتج اللي حصلنا عليه ده هنخليه بسط لكسر مقامه مقام الجزء الكسري اللي عندنا، اللي هو خمسة. فيبقى كده تلاتة وستين عَ الخمسة هو ده الكسر غير الفعلي المكافئ للعدد الكسري اللي عندنا.

ونقدر نقول كده إن متوسط ساعات نوم القط تلاتة وستين على خمسة ساعات.

عرفنا في الفيديو ده الخطوات اللي بنتّبعها عشان نكتب أي عدد كسري عندنا على صورة كسر غير فعلي مكافئ له.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.