فيديو: امتحان الاستاتيكا للعام السابق • ٢٠١٨/٢٠١٧ • السؤال الثاني

امتحان الاستاتيكا للعام السابق • ٢٠١٨/٢٠١٧ • السؤال الثاني

٠٤:٠٩

‏نسخة الفيديو النصية

أثَّرت ثلاث قوًى مستوية على القضيب أ ب. إذا كان القضيب متَّزِنًا، فأوجد طول ب ج.

عندنا تلات قوى: اتناشر نيوتن، وعشرين نيوتن، وَ ق. أثَّروا على القضيب أ ب، وخلُّوه في حالة اتِّزان. وعاوزين نعرف طول ب ج. فمعطى عندنا في السؤال إن القضيب متزن. فهنستخدم شروط الاتزان؛ علشان نوجد طول القطعة المستقيمة ب ج.

فهنقول: بما أن القضيب متزن تحت تأثير ثلاث قوًى مستوية ومتوازية. ليه قلنا عليها متوازية؟ لأنها كلها عمودية على القضيب. إذن تطبَّق شروط الاتزان. شروط الاتزان عندنا شرطين؛ الشرط الأول: مجموع القياسات الجبرية للقوى تساوي صفر. يعني محصِّلة القوى اللي عندنا بتساوي صفر. مجموع القياسات الجبرية لعزوم هذه القوى حول أيِّ نقطة تساوي صفر. ده الشرط التاني من شروط الاتزان.

فهنبدأ بتطبيق الشرط الأول. واللي هو: مجموع القياسات الجبرية للقوى بتساوي صفر. وهنفرض عندنا اتجاه موجب للأعلى. ونبدأ في تجميع القوى، ونساويها بالصفر. يبقى عندنا القوى اتناشر نيوتن والقوة ق، الاتنين إشارتهم موجبة. والقوة عشرين اتجاهها للأسفل؛ يبقى إشارتها سالبة. بيساوي الصفر. من هنا نقدر نقول: إن القوة ق بتساوي تمنية نيوتن. ده اللي نتج لنا من إن المحصّلة بتساوي صفر.

ودلوقتي هنطبَّق الشرط التاني. واللي بيقول لنا: إن مجموع القياسات الجبرية لعزوم هذه القوى حول أيِّ نقطة يساوي الصفر. فإحنا هنحسب مجموع القياسات الجبرية لعزوم القوى دي حول النقطة أ. يعني هنوجد ج أ، ونساويه بالصفر.

عند النقطة أ مش هنحسب القوة اتناشر نيوتن؛ لأنها بتمُرّ بالنقطة أ. خطّ عمل قوتها بيمُرّ بالنقطة أ. هنحسب القوة عشرين والقوة ق. فنبدأ أول حاجة بالقوة عشرين نيوتن. القوة في البُعد العمودي. القوة عندنا عشرين نيوتن، والبُعد العمودي، اللي هو طول أ ج، ستين سنتيمتر. وأهم حاجة الإشارة. إشارة القوة هنعرفها من اتجاه الدوران.

عندنا القوة عشرين نيوتن ده اتجاه دورانها حول النقطة أ، وده اتجاه موجب؛ لأنه عكس اتجاه دوران عقارب الساعة. فيبقى كده إحنا عرفنا إن الإشارة موجبة. فهنقول: عشرين في ستين. بعدين نيجي للقوة ق. بنضرب القوة ق في البُعد العمودي، اللي هو أ ب كلها. واتجاه دوران خطّ عمل القوة ق حول النقطة أ بيكون بالشكل ده. وده اتجاه سالب؛ لأنه اتجاه دورانه مع اتجاه دوران حركة عقارب الساعة. فهنقول: سالب ق في أ ب، ده كله بيساوي الصفر. عشرين في ستين هتساوي 1200. والـ ق عندنا هتساوي تمنية نيوتن. جِبناها من تطبيق الشرط الأول.

يبقى نقول 1200 ناقص تمنية أ ب بتساوي الصفر. من هنا يبقى طول أ ب بيساوي مية وخمسين سنتيمتر. وإحنا عندنا أ ب بيساوي أ ج زائد ب ج. يبقى مية وخمسين بتساوي ستين زائد ب ج. ويبقى طول القطعة المستقيمة ب ج بتساوي تسعين سنتيمتر. وهو المطلوب.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.