فيديو: إيجاد قياس زاويتين باستخدام قاعدة الزوايا المتكاملة والمتتامَّة

أوجد قيمتَيْ ﺱ، ﺹ.

٠٣:٢٨

‏نسخة الفيديو النصية

أوجد قيمتي س وَ ص.

ومعطى عندنا الشكل اللي قدامنا، وعايزين نوجد قيمة س وقيمة ص. فمن الشكل، هنلاحظ إن معطى عندنا الزاوية دي زاوية قائمة، والزاوية القايمة هي الزاوية اللي قياسها تسعين درجة. فمعنى كده إن الزاويتين اللي هم اللي قياسهم اتنين وستين درجة وَ س درجة، هما زاويتان متتامتان. والزاويتان المتتامتان هما الزاويتين اللي مجموع قياسهم تسعين درجة، فبالتالي هيبقى مجموع قياسات الزاويتين دول بيساوي تسعين درجة، فبالتالي هيبقى اتنين وستين، اللي هي قياس الزاوية دي، زائد س اللي هي قياس الزاوية دي، يساوي تسعين.

وعشان نوجد قيمة س، يبقى هنطرح اتنين وستين من طرفَي المعادلة، فهيبقى الطرف الأيمن للمعادلة اتنين وستين زائد س ناقص اتنين وستين، فاتنين وستين ناقص اتنين وستين بصفر، وهيتبقي س. وأمّا الطرف الأيسر للمعادلة، فهيبقى تسعين ناقص اتنين وستين، فلمّا نحسبها هيبقى بيساوي تمنية وعشرين. وبالتالي هتبقى قيمة س هي تمنية وعشرين، فكده يبقى أوجدنا قيمة س. بعد كده عايزين نوجد قيمة ص.

فلمّا نشوف الشكل اللي عندنا، هنلاحظ إن الزاوية دي زاوية مستقيمة، والزاوية المستقيمة هي الزاوية اللي قياسها مية وتمانين درجة. وبما إن الأربع زوايا اللي عندنا دول بيكوّنوا الزاوية المستقيمة، فبالتالي هيبقى مجموع قياساتهم يساوي مية وتمانين درجة. وبما إننا عرفنا قيمة س، واللي هي بتساوي تمنية وعشرين؛ فبالتالي هيبقى سبعة وتلاتين زائد اتنين وستين زائد تمنية وعشرين، اللي هي قيمة س زائد ص، يساوي مية وتمانين. فهنيجي عند الطرف الأيمن ونجمع؛ سبعة وتلاتين زائد اتنين وستين زائد تمنية وعشرين، فهيبقى بيساوي مية سبعة وعشرين. فهتبقى المعادلة مية سبعة وعشرين زائد ص يساوي مية وتمانين. بعد كده عشان نوجد قيمة ص، يبقى هنطرح مية سبعة وعشرين من طرفَي المعادلة. فهيبقى الطرف الأيمن للمعادلة مية سبعة وعشرين زائد ص ناقص مية سبعة وعشرين، فمية سبعة وعشرين ناقص مية سبعة وعشرين بتساوي صفر، فهيبقى الطرف الأيمن هو ص. وأمّا الطرف الأيسر للمعادلة، فهيبقى مية وتمانين ناقص مية سبعة وعشرين، فلمّا نحسبها هتبقى بتساوي تلاتة وخمسين. وبالتالي هتبقى قيمة ص هي تلاتة وخمسين.

وكان فيه عندنا طريقة تانية برضو نقدر نوجد بيها قيمة ص، وهي إن عندنا قياس الزاوية دي سبعة وتلاتين درجة، وعارفين إن الزاوية دي زاوية قايمة. فبالتالي كنا عشان نوجد قيمة ص، كنا نقدر نحسب مجموع الزوايا اللي هي قياسها سبعة وتلاتين درجة، والزاوية القايمة اللى هي تسعين درجة، زائد الزاوية اللي قياسها ص درجة، فهتبقى المعادلة سبعة وتلاتين زائد تسعين زائد ص يساوي مية وتمانين. وبنفس الطريقة لمّا نجمع سبعة وتلاتين زائد تسعين، هيبقى بيساوي مية سبعة وعشرين.

بعد كده عشان نوجد قيمة ص، يبقى برضو هنطرح مية سبعة وعشرين من طرفَي المعادلة. فلمّا نطرح مية سبعة وعشرين من طرفَي المعادلة، هتبقى ص بتساوي تلاتة وخمسين، وهي نفس القيمة اللي حصلنا عليها من الطريقة الأولى.

وكده يبقى قدرنا نوجد قيمة س واللي هي بتساوي تمنية وعشرين، وقيمة ص واللي هي بتساوي تلاتة وخمسين.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.