فيديو: إيجاد مساحة شكل مركَّب

ملاعب الكرة الطائرة المعتادة طولها ١٨ مترًا وعرضها ٩ أمتار، إضافة إلى منطقة مفتوحة تمتد من الضلعين الموضحين في الشكل. إذا كان عرض كل منطقة مفتوحة يساوي ٣ أمتار، فأوجد المساحة المجمعة لملعب الكرة الطائرة والمنطقتين المفتوحتين.

٠٢:٣٥

‏نسخة الفيديو النصية

ملاعب الكرة الطائرة المعتادة طولها تمنتاشر مترًا، وعرضها تسع أمتار، إضافة إلى منطقة مفتوحة تمتدّ من الضلعين الموضحين في الشكل. إذا كان عرض كل منطقة مفتوحة يساوي تلات أمتار، فأوجد المساحة المجمَّعة لملعب الكرة الطائرة، والمنطقتين المفتوحتين.

ومعطى عندنا الشكل اللي قدامنا، وهو عبارة عن ملعب كرة طائرة، ومعطى عندنا إن طول الملعب تمنتاشر متر، وعرضه تسع أمتار، فهنكتب الأبعاد عندنا بالشكل ده؛ فهيبقى تمنتاشر متر هو طول الملعب، وأمّا عرضه واللي هو الجزء ده فمعطى عندنا إن هو تسعة متر. بعد كده معطى عندنا في السؤال إن عرض كل منطقة مفتوحة بيساوي تلاتة متر، فمعنى كده إن عرض كل منطقة من المنطقتين تلاتة متر؛ فمعنى كده إن عرض الجزء ده تلاتة متر، وعرض الجزء ده تلاتة متر. والمطلوب في السؤال إننا نوجد المساحة المجمَّعة لملعب الكرة الطايرة والمنطقتين المفتوحتين؛ فمعنى كده إننا عايزين نوجد مساحة الشكل كله، يعني عايزين نوجد مساحة الشكل اللي قدامنا.

والشكل اللي قدامنا ده عبارة عن مستطيل، والمستطيل ده طوله تمنتاشر متر، وعرضه هو عبارة عن عرض الملعب زائد عرض المنطقتين المفتوحتين؛ يعني هيبقى العرض بيساوي تلاتة زائد تسعة زائد تلاتة. فعشان نوجد المساحة، خلّينا نفتكر إن مساحة المستطيل بيتساوي حاصل ضرب طوله في عرضه، فبالتالي هتبقى المساحة المجمَّعة بتساوي حاصل ضرب الطول في العرض.

فهنعوّض عن الطول عندنا بتمنتاشر متر، فهتبقى المساحة بتساوي تمنتاشر في العرض، والعرض اللي هو عرض الملعب زائد عرض المنطقتين المفتوحتين، يعني هيساوي تلاتة زائد تسعة زائد تلاتة. فلمّا نحسبها هتبقى بتساوي … تلاتة زائد تسعة زائد تلاتة هتبقى بتساوي خمستاشر؛ فبالتالي هتبقى المساحة المجمَّعة بتساوي تمنتاشر في خمستاشر. فلمّا نحسبها هتبقى بتساوي ميتين وسبعين. وبما إننا بنوجد مساحة، فبالتالي هتبقى الوحدة هي متر مربع؛ وبالتالي هتبقى المساحة المجمَّعة لملعب الكرة الطائرة والمنطقتين المفتوحتين بتساوي ميتين وسبعين متر مربع.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.