تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.

فيديو: إيجاد محيط المستطيل

سوزان فائق

يوضح الفيديو مفهوم المحيط، وكيفية إيجاد قيمة محيط المستطيل.

٠٣:٢٠

‏نسخة الفيديو النصية

في الفيديو ده هنتكلم عن إيجاد محيط المستطيل، هنعرف يعني إيه محيط المستطيل وإزاي نِوجد قيمته.

طول الخط حول الشكل المغلق بيُسمى المحيط؛ يعني لو عندنا شكل مغلق كده زي المستطيل، طول اللي بره ده، اللي بيحيط المستطيل، ده هو المحيط يبقى لإيجاد محيط مستطيل بنجمع أطوال أضلاعه كلها؛ يعني بنجمع طول الضلع ده زائد طول الضلع ده زائد طول الضلع ده زائد طول الضلع ده، ولأن هنا الطول بيساوي الطول، والعرض بيساوي العرض؛ فمحيط المستطيل بيساوي ضِعف الطول مضافًا عليه ضِعف العرض.

يبقى محيط المستطيل بيساوي ضِعف الطول زائد ضِعف العرض، أو بنقول اتنين في الطول زائد العرض.

ناخد مثال ونشوف إزاي هنِوجد محيط المستطيل. أوجِد محيط المستطيل في الشكل المجاور. المستطيل اللي في الشكل طوله حداشر سنتيمتر وعرضه أربعة سنتيمتر، يبقى محيط المستطيل هيساوي اتنين في الطول زائد العرض؛ يبقى محيط المستطيل المطلوب هيساوي اتنين في الطول حداشر زائد أربعة العرض، هيساوي اتنين في خمستاشر يعني هيساوي تلاتين سنتيمتر، والمحيط وحدة طول يعني بيبقى سنتيمتر.

هناخد مثال كمان. أوجِد محيط المستطيل الذي طوله خمسة وتلاتين سنتيمتر، وعرضه خمستاشر سنتيمتر. بما إن محيط المستطيل بيساوي اتنين في الطول زائد العرض؛ يبقى المحيط للمستطيل المطلوب هيساوي اتنين في الطول خمسة وتلاتين زائد العرض خمستاشر، يبقى هيساوي اتنين في خمسين بتساوي مية سنتيمتر، وهي دي قيمة محيط المستطيل المطلوبة.

هناخد مثال كمان أوجِد محيط مستطيل طوله تسعين ديسيمتر وعرضه يساوي نصف طوله، الطول هيساوي تسعين ديسيمتر؛ يبقى العرض اللي هو بيساوي نص طوله هيبقى تسعين على اتنين يعني هيساوي خمسة وأربعين ديسيمتر، هنعوّض في قانون محيط المستطيل اللي هو هيساوي اتنين في الطول تسعين زائد العرض خمسة وأربعين، يساوي اتنين في مية خمسة وتلاتين، يعني هيساوي ميتين وسبعين ديسيمتر، وهي دي قيمة محيط المستطيل المطلوبة.

اتكلمنا في الفيديو ده عن إيجاد محيط المستطيل، عرفنا يعني إيه المحيط وإزاي بنِوجد قيمته للمستطيل.