تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.

فيديو: استخدام نظرية فيثاغورس

سوزان فائق

يوضح الفيديو كيفية استخدام نظرية فيثاغورس في المواقف الحياتية.

٠٣:٤١

‏نسخة الفيديو النصية

في الفيديو ده هنتكلم على استخدام نظرية فيثاغورس؛ إزاي بنستخدمها في المواقف الحياتية، وإزاي بنحل مسائل باستخدامها.

يمكن استخدام نظرية فيثاغورس في المواقف الحياتية؛ يعني لو ظهر عندنا في شكل مثلث قائم الزاوية وفيه ضلع مجهول بنقدر نوجد قيمته بمعلومية الضلعين الآخرين في المثلث القائم الزاوية.

نظرية فيثاغورس بتقول: إذا كان المثلث قائم الزاوية فإن مربع الوتر، اللي هو بيبقى مقابل للزاوية القائمة وده بيبقى أطول ضلع في المثلث، بيساوي مجموع مربعي ضلعيه، اللي هما الضلعين المجاورين للزاوية القائمة.

هنشوف إزاي هنستخدم نظرية فيثاغورس لحل المسائل اللي موجودة في مواقفنا الحياتية. المثال: اكتب معادلة تعبِّر عن المسافة بين الطائرتين في الشكل التالي، وقرب الناتج لأقرب جزء من عشرة. في الرسم اللي قدامنا فيه طيارتين المسافة العمودية ما بينهم حداشر كيلومتر، والمسافة الأفقية ستاشر كيلومتر، والمسافة ما بينهم اللي هو وتر في مثلث قائم الزاوية قيمة مجهولة اسمها س. لإيجاد قيمة س باستخدام نظرية فيثاغورس هيبقى مربع الوتر اللي هو س تربيع هيساوي مجموع مربعي الضلعين الآخرين اللي هو ستاشر تربيع زائد حداشر تربيع، يساوي ميتين ستة وخمسين زائد مية واحد وعشرين؛ يبقى س تربيع هتساوي تلتمية سبعة وسبعين، ناخد جذر الطرفين لإيجاد قيمة س، يبقى س هتساوي موجب وسالب الجذر التربيعي لتلتمية سبعة وسبعين، وهنرفض القيمة السالبة علشان ده مسافة؛ يبقى الـ س هتساوي تقريبًا تسعتاشر وأربعة من عشرة كيلومتر، يبقى هي دي المسافة ما بين الطائرتين.

هناخد مثال كمان: في المثال أوجد المسافة بين أعلى درجة في السلم وأقل درجة. يعني عايز طول أ ب، مُعطى المسافة الرأسية تلاتة متر، والمسافة الأفقية أربعة متر في مثلث قائم الزاوية. باستخدام نظرية فيثاغورس يبقى أ ب تربيع اللي هو طول الوتر المقابل للزاوية القائمة، هيساوي تلاتة تربيع زائد أربعة تربيع، اللي هو مجموع مربعي طولي ضلعين المتجاورين، هتساوي خمسة وعشرين؛ يبقى أ ب تربيع هتساوي خمسة وعشرين، لإيجاد قيمة أ ب هنوجد الجذر التربيعي للطرفين؛ يعني هتبقى موجب وسالب الجذر التربيعي لخمسة وعشرين، هنرفض القيمة السالبة لأن دي مسافة، يبقى أ ب هتساوي خمسة متر، وهي دي المسافة ما بين أعلى درجة في السلم لأقل درجة.

اتكلمنا في الفيديو ده عن استخدام نظرية فيثاغورس؛ إزاي بنوجد الأطوال أو المسافات المجهولة لما يكون فيه مثلث قائم الزاوية.