فيديو: إيجاد مرافق عدد غير نسبي

عيِّن مرافق العدد ٦ جذر (٧) + جذر (٣)، ثم أوجد حاصل ضرب العدد ٦ جذر (٧) + جذر (٣) في مرافقه.

٠٢:٤٥

‏نسخة الفيديو النصية

عيّن مرافق العدد ستة جذر التربيعي لسبعة، زائد جذر التربيعي لتلاتة. ثم أوجد حاصل ضرب العدد ستة جذر التربيعي لسبعة، زائد الجذر التربيعي لتلاتة؛ في مرافقه.

يعني معطى عندنا العدد ده، وعايزين نوجد مرافق العدد. وخلّينا نفتكر إننا عشان نوجد مرافق عدد بالشكل ده، فبنعكس إشارة الحد التاني. وبما أن الحد التاني هو الجذر التربيعي لتلاتة، وإشارته موجبة. فلمّا نعكسها، هيبقى سالب الجذر التربيعي لتلاتة. وبالتالي هيبقى مرافق ستة الجذر التربيعي لسبعة، زائد الجذر التربيعي لتلاتة، هو: ستة الجذر التربيعي لسبعة ناقص الجذر التربيعي لتلاتة. يعني عكسنا إشارة الحد التاني. وبالتالي هيبقى هو ده مرافق العدد اللي معطى عندنا في السؤال.

بعد كده مطلوب منّنا إننا نوجد حاصل ضرب العدد ستة الجذر التربيعي لسبعة، زائد الجذر التربيعي لتلاتة؛ في مرافقه. يعني عايزين نوجد حاصل ضرب العدد اللي معطى عندنا في السؤال، في مرافق العدد واللي إحنا أوجدناه هنا. يعني عايزين نوجد قيمة المقدار ده. فعشان نوجد حاصل الضرب، خلينا في الأول نفتكر … لو عندنا مقدار بالشكل ده، وعايزين نوجد حاصل ضربه؛ فبيبقى حاصل الضرب بيساوي مربع الحد الأول، مطروحًا منه مربع الحد التاني. يعني هيساوي أ تربيع ناقص ب تربيع.

فبنفس الطريقة هنحسب المقدار ده. فهيبقى بيساوي مربع الحد الأول، مطروحًا منه مربع الحد التاني. يعني هيبقى بيساوي ستة الجذر التربيعي لسبعة الكل تربيع، ناقص الجذر التربيعي لتلاتة تربيع. فهيبقى المقدار بيساوي … وهنبدأ نفك الحد الأول. فعندنا ستة تربيع بستة وتلاتين. والجذر التربيعي لسبعة تربيع بيساوي سبعة. فهيبقى عندنا ستة وتلاتين في سبعة، ناقص … وهنوجد قيمة الحد التاني، اللي هو الجذر التربيعي لتلاتة تربيع، واللي هيساوي تلاتة. فهيبقى المقدار عندنا بيساوي ستة وتلاتين في سبعة ناقص تلاتة.

ومن ترتيب العمليات، هنبدأ الأول بعملية الضرب. فهنحسب ستة وتلاتين في سبعة، واللي هتساوي ميتين اتنين وخمسين. فهيبقى المقدار هو ميتين اتنين وخمسين ناقص تلاتة. فلمّا نحسبها هتبقى بتساوي ميتين تسعة وأربعين. وهيبقى هو ده حاصل ضرب العدد في مرافقه. وبالتالي هتبقى الإجابة هي: ستة الجذر التربيعي لسبعة ناقص الجذر التربيعي لتلاتة. وهو ده مرافق العدد. وأمّا حاصل ضرب العدد في مرافقه، فهو ميتين تسعة وأربعين. وهتبقى هي دي إجابة السؤال.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.