فيديو: إيجاد المساحة الجانبية لمكعب

المساحة الجانبية لمكعب هي حاصل ضرب محيط القاعدة وأيٍّ ممَّا يأتي؟ [أ] العرض [ب] الطول [ج] الارتفاع [د] الحجم

٠٣:١٥

‏نسخة الفيديو النصية

المساحة الجانبية لمكعب، هي حاصل ضرب محيط القاعدة، وأيّ ممّا يأتي؟ الاختيار الأول: العرض. الاختيار التاني: الطول. الاختيار التالت: الارتفاع. والاختيار الرابع: الحجم.

هنرسم مكعب؛ عشان نتخيّل عليه المعطى اللي عندنا في السؤال، ونقدر نجاوبه. المكعب هو شكل ثلاثي الأبعاد. بيتكوّن من ست أوجُه متطابقة. كل وجه منهم عبارة عن مربع. يعني جميع الأحرف بتاعة المكعب متساوية في الطول. يبقى المكعب هو شكل، كل الوجوه بتاعته متطابقة. يعني مساحة كل وجه من الوجوه بتاعته متساوية. إحنا مطلوب منّنا نوجد المساحة الجانبية للمكعب، وعلاقته إيه بمحيط القاعدة. لأننا عايزينه يبقى عبارة عن حاصل ضرب محيط القاعدة، في بُعدٍ ما، هنحدّده دلوقتي.

طب بصورة عامة، هو إيه المساحة الجانبية؟ المساحة الجانبية هي مجموع مساحة الأوجُه، اللي بيتكوّن منها جوانب بالشكل الثلاثي الأبعاد. الشكل المكعب اللي قدامنا ده، بيتكوّن في الجوانب بتاعته من أربع مربعات. يبقى المساحة الجانبية بتاعته، هتبقى عبارة عن مجموع مساحة الأربع مربعات، اللي بيكوّنوا جوانب الشكل.

لو جينا نفكّ المكعب، ونشوف الشبكة اللي بيتكوّن منها المكعب. هنلاقيها زيّ الشكل اللي قدامنا ده؛ عبارة عن ست مربعات، زيّ ما إحنا شايفين. طب يا ترى لو عايزين نوجد المساحة الجانبية، وهي قدامنا بالشكل ده؟ هتبقى زيّ ما قلنا عبارة عن مجموع مساحة الأربع وجوه، اللي على شكل مربع. اللي إحنا مظلّلينها دول، واللي بيمثلوا جوانب المكعب.

ونقدر نحسبها بطريقة تانية. نقدر نعتبر الأربع وجوه دول، بيكوّنوا مع بعض مستطيل كبير. اللي إحنا ظلّلناه باللون الأخضر ده. طب إيه أبعاد المستطيل ده؛ عشان أقدر أحسب مساحته؟ العرض بتاعه هو نفسه ارتفاع المكعب. طب الطول بتاعه هنجيبه إزاي؟ لو ابتدينا نطبّق أوجُه المكعب، كأننا بنكوّنه من أول وجديد. هنلاقي إن طول المستطيل، اللي إحنا عايزين نوجد ده، هو نفسه محيط القاعدة بتاعته. زيّ ما إحنا شايفين كده. فكده نقدر نعتبر الطول، هو نفسه محيط القاعدة. ونقدر دلوقتي نوجد مساحة المستطيل، اللي هو نفسه عبارة عن مجموع مساحة الأوجُه الجانبية، اللي بيتكوّن منها المكعب.

يبقى عايزين نوجد دلوقتي المساحة الجانبية للمكعب. اللي هي، زيّ ما اتفقنا، هتبقى مساحة المستطيل المظلل بالأخضر اللي عندنا ده. ومساحة أيّ مستطيل هي حاصل ضرب الطول في العرض. فهنعوّض عن العرض بالارتفاع؛ لأن العرض ده بيمثّل ارتفاع المكعب. وهنعوض عن الطول بمحيط القاعدة. يعني كده نقدر نستنتج إن المساحة الجانبية للمكعب، هتبقى عبارة عن حاصل ضرب محيط القاعدة في الارتفاع. ويبقى الاختيار الصحيح، من بين الاختيارات اللي عندنا، الارتفاع.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.