فيديو: امتحان الديناميكا الدور الثاني للعام السابق • ٢٠١٨/٢٠١٧ • السؤال السادس

امتحان الديناميكا الدور الثاني للعام السابق • ٢٠١٨/٢٠١٧ • السؤال السادس

٠٣:٣٩

‏نسخة الفيديو النصية

تتحرك كرة ملساء كتلتها تلتمية جرام، على مستوى أفقي بسرعة ستين سنتيمتر عَ الثانية. اصطدمت الكرة بحائط رأسي أملس فأثر عليها بدفع مقداره تمنية وأربعين ألف داين ثانية. أوجد سرعة ارتداد الكرة عن الحائط بالسنتيمتر لكل ثانية.

يعني في البداية معطى عندنا إن فيه كرة ملساء كتلتها تلتمية جرام، والكرة دي بتتحرك على مستوى أفقي بسرعة ستين سنتيمتر عَ الثانية. وهنفرض إن هو ده اتجاه حركة الكرة. بعد كده مُعطى عندنا إن الكرة دي اصطدمت بحائط رأسي أملس، فأثَّر عليها بدفع مقداره تمنية وأربعين ألف داين ثانية. والمطلوب إننا نوجد سرعة ارتداد الكرة عن الحائط بالسنتيمتر لكل ثانية. يعني معنى كده إن الكرة اللي عندنا دي هتتحرك بسرعة ستين سنتيمتر عَ الثانية في الاتجاه ده، لحدّ ما هتصطدم بالحائط. بعد كده الكرة هترتدّ عن الحائط، وهترتدّ معنى كده إن هي هتتحرك في الاتجاه المعاكس. والمطلوب نوجد سرعة ارتداد الكرة عن الحائط.

وفي الأول خلينا نفرض إن الاتجاه ده هو الاتجاه الموجب للحركة. فمعنى كده إن سرعة الكرة قبل الاصطدام بالحائط، واللي بنرمز لها بالرمز ع، هتبقى بتساوي سالب ستين سنتيمتر عَ الثانية؛ وده لأن اتجاه السرعة هنا هو عكس الاتجاه الموجب للحركة. بعد كده بما إن مُعطى عندنا مقدار الدفع، فخلينا في الأول نعرف إن الدفع بيساوي التغيُّر في كمية الحركة. والتغير في كمية الحركة هو عبارة عن ك اللي هو كتلة الكرة، في ع شرطة ناقص ع. وَ ع شرطة اللي هي سرعة الكرة بعد الاصطدام أو سرعة ارتداد الكرة عن الحائط. وأما ع فهي سرعة الكرة قبل الاصطدام.

ومن المُعطيات اللي عندنا في السؤال، هنلاحظ إن عندنا الدفع، وعندنا ك اللي هي كتلة الكرة، وعندنا ع اللي هي سرعة الكرة قبل الاصطدام. والمطلوب إننا نوجد سرعة ارتداد الكرة عن الحائط اللي هي ع شرطة. فبالتالي هنبدأ نعوَّض عن الدفع بتمنية وأربعين ألف. فهيبقى عندنا تمنية وأربعين ألف بتساوي ك، واللي هنعوَّض عنها بتلتمية، في ع شرطة واللي عايزين نوجدها، ناقص ع. و ع هنا اللي هي بتساوي سالب ستين سنتيمتر عَ الثانية؛ وده لأن زي ما عرفنا إن اتجاه السرعة اللي عندنا هنا هو عكس الاتجاه الموجب للحركة. يعني معنى كده هنعوَّض عن ع هنا بسالب ستين. فهتبقى المعادلة هي تمنية وأربعين ألف بتساوي تلتمية في ع شرطة ناقص سالب ستين. وبقسمة طرفَي المعادلة على تلتمية، هيبقى عندنا الطرف الأيمن مية وستين. وأما في الطرف الأيسر فهنختصر تلتمية مع تلتمية، فهيبقى عندنا ع شرطة ناقص سالب ستين؛ يعني ع شرطة زائد ستين. بعد كده عشان نوجد ع شرطة، يبقى هنطرح ستين من الطرفين. فهتبقى المعادلة هي ع شرطة بتساوي مية. وأما الوحدة هتبقى سنتيمتر عَ الثانية. وبالتالي هتبقى ع شرطة بتساوي مائة سنتيمتر عَ الثانية. وهنلاحظ إن ع شرطة هي قيمة موجبة؛ يعني معنى كده إن هي هتبقى في الاتجاه الموجب للحركة. وده منطقي لأننا بنوجد سرعة ارتداد الكرة عن الحائط. فمن الطبيعي إن هي تكون في الاتجاه المعاكس لسرعة الكرة قبل الاصطدام. وبكده يبقى إحنا أوجدنا سرعة ارتداد الكرة عن الحائط، وهتبقى هي دي إجابة السؤال.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.