تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.

فيديو: إيجاد الأنماط العددية باستخدام القيمة المكانية

نهال عصمت

يتناول الفيديو مفهوم الأنماط العددية، وطريقة إيجادها باستخدام القيم المكانية.

٠٦:٤٥

‏نسخة الفيديو النصية

إيجاد الأنماط العددية باستخدام القيمة المكانية.

هنتعلم إزاي نوجد الأنماط العددية باستخدام القيمة المكانية للعدد.

الأنماط العددية بتساعدنا على العَدّ. يعني لو عندنا مجموعة من الأنماط، هنلاحظ إن كل مرة النمط بيزيد عن العدد الذي يسبقه، أو يقل، بمقدار واحد أو عشرة أو مية.

بمعنى لو عندنا النمط خمسمية خمسة وأربعين. وخمسمية ستة وأربعين. وخمسمية سبعة وأربعين. وخمسمية تمنية وأربعين. هنلاقي إن النمط في كل مرة بيزيد بمقدار واحد. يعني كل عدد بيزيد بمقدار واحد عن العدد الذي يسبقه.

يعني الأول كان عندنا في خانة الآحاد خمسة. بعد كده خانة الآحاد زادت بمقدار واحد، بقت ستة. بعد كده بقت سبعة. بعديها بقت تمنية. يبقى نقدر نقول إن القيمة المكانية لخانة الآحاد كل مرة بتزيد بمقدار واحد. يعني بنعدّ بالآحاد.

طب لو عندنا النمط بالشكل ده: خمسمية خمسة وأربعين. بعد كده خمسمية خمسة وخمسين. يليها خمسمية خمسة وستين. وبعد كده خمسمية خمسة وسبعين.

في المرة دي هنلاقي إن النمط كل مرة بيزيد بمقدار عشرة عن العدد الذي يسبقه. يعني لو جينا بصينا على خانة العشرات، هنلاقي إن خانة العشرات كانت أربعة. بعد كده بقت خمسة. بعديها بقت ستة. بعديها بقت سبعة.

القيمة المكانية للعدد أربعة في خانة العشرات هو أربعين. والقيمة المكانية للعدد خمسة في خانة العشرات هو خمسين. بعديها القيمة المكانية للعدد ستة في خانة العشرات هو ستين. والقيمة المكانية للعدد سبعة في خانة العشرات هو سبعين.

يبقى في كل مرة النمط بيزيد بمقدار عشرة. يبقى كده بنعدّ بالعشرات.

طب لو عندنا النمط خمسمية خمسة وأربعين. بعد كده بقى ستمية خمسة وأربعين. سبعمية خمسة وأربعين. تمنمية خمسة وأربعين.

في المرة دي هنلاحظ إن النمط في كل مرة بيزيد بمقدار مية عن العدد الذي يسبقه. يعني لو جينا بصينا على خانة المئات، هيبقى عندنا خمسة، بعديها ستة، بعديها سبعة، بعديها تمنية.

القيمة المكانية للعدد خمسة في خانة المئات هو خمسمية. والقيمة المكانية للعدد ستة في خانة المئات هو ستمية. والقيمة المكانية للعدد سبعة في خانة المئات هو سبعمية. والقيمة المكانية للعدد تمنية في خانة المئات هو تمنمية.

معنى كده إن في كل مرة النمط بيزيد بمقدار مية. يبقى كده إحنا بنعدّ بالمئات.

يبقى عرفنا إزاي الأنماط بتزيد بمقدار واحد، أو عشرة، أو مية. هل في كل مرة النمط بيزيد؟ لأ النمط ممكن يبقى بيزيد أو بيقل. بيزيد [بيقل] بمقدار واحد، أو بمقدار عشرة، أو بمقدار مية.

هنبدأ نجيب صفحة جديدة. ونشوف أمثلة.

المطلوب أكمل النمط: تسعمية واحد وأربعين. تمنمية واحد وأربعين. نقط. ستمية واحد وأربعين. خمسمية واحد وأربعين.

عايزين نكمل النمط اللي موجود قدامنا. هنلاحظ في النمط إن كل عدد بيقل عن العدد الذي يسبقه بمقدار مية. عندنا خانة المئات في العدد الأول تسعة. بعد كده بقت تمنية. وبعد كده بقت ستة وبعديها بقت خمسة. يبقى كده بالفعل كل مرة النمط بيقل بمقدار مية.

يبقى هنيجي عند العدد تمنمية واحد وأربعين، ونبدأ نطرح منه مية. هيبقى العدد الناقص هو سبعمية واحد وأربعين.

بعد سبعمية واحد وأربعين هنشيل مية. بالفعل هيدينا ستمية واحد وأربعين. يبقى كده عرفنا نكمل أول نمط.

هنبدأ نبص على النمط التاني. عندنا خمسمية تمنية وسبعين. خمسمية تسعة وسبعين. بعد كده نقط. بعديها خمسمية واحد وتمانين. وبعد كده نقط. عايزين نكمل النمط.

هنلاحظ إن في النمط كل مرة خانة الآحاد بتزيد بمقدار واحد. يعني كانت تمنية بعد كده بقت تسعة. يبقى بتزيد بمقدار واحد. هنبدأ نزود واحد على خمسمية تسعة وسبعين. هيبقى العدد الناقص هو خمسمية وتمانين.

هنبدأ نزود كمان واحد. بالفعل هيبقى عندنا العدد خمسمية واحد وتمانين. نزود كمان واحد. هيبقى عندنا العدد خمسمية اتنين وتمانين.

يبقى كده عرفنا إزاي نكمل الأنماط العددية باستخدام القيمة المكانية. وإن النمط في كل مرة ممكن يزيد بمقدار واحد أو عشرة أو مية. أو ممكن كمان يقل بمقدار واحد أو عشرة أو مية.