تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.

فيديو: تقريب الأعداد العشرية لأقرب جزء من عشرة

سوزان فائق

يوضح الفيديو كيفية تقريب الأعداد العشرية لأقرب جزء من عشرة باستخدام قواعد التقريب.

٠٤:١٢

‏نسخة الفيديو النصية

في الفيديو ده هنتكلّم عن تقريب الأعداد العشرية لأقرب جزء من عشرة. هنعرف إزاي نقرّب الأعداد العشرية لأقرب جزء من عشرة باستخدام قواعد التقريب.

التقريب باستخدام قواعد التقريب بيبقى عن طريق إن إحنا نشوف الرقم اللي على يمين الرقم المراد التقريب له. إذا كان أقل من خمسة بيبقى الرقم اللي هنقرّب ليه زيّ ما هو. إزاي الكلام ده؟

يعني هنا مثلًا عايزين نقرّب لأقرب جزء من عشرة. يبقى هي دي الخانة اللي إحنا هنقرّب ليها اللي هي فيها الأربعة. بنشوف اللي على يمين الأربعة، ده قيمته سبعة. السبعة أكبر من الخمسة ولّا أقل من الخمسة؟

لو كانت أقل يبقى الأربعة هتفضل زيّ ما هي. لكن هنا السبعة أكبر من الخمسة. يبقى معنى كده إن إحنا هنزوّد الأربعة واحد. فيبقى تقريب التمنية وستين وسبعة وأربعين من مية هيبقى تمنية وستين وخمسة من عشرة. نشوف عدد كمان.

استخدم قواعد التقريب للتقريب لأقرب جزء من عشرة.

أقرب جزء من عشرة، هنشوف الرقم اللي في خانة الجزء من عشرة، هنا التلاتة. نشوف على يمين التلاتة هنلاقيها سبعة؛ أكبر من الخمسة. يبقى التلاتة هتبقى أربعة. يبقى الرقم تلاتة هيزيد يبقى أربعة. يبقى أربعة وخمسين وأربعة من عشرة. ده تقريب الأربعة وخمسين وسبعة وتلاتين من مية.

العدد تسعة وسبعين وتلاتة وتلاتين من مية. عايزين نقرّبه لأقرب جزء من عشرة.

يبقى هنشوف الرقم اللي في خانة الجزء من عشرة اللي هو التلاتة، ونشوف الرقم اللي على يمينه هنلاقيه تلاتة. ده أقل من الخمسة. يبقى التلاتة هتبقى زيّ ما هي. يبقى التقريب لأقرب جزء من عشرة هو تسعة وسبعين وتلاتة من عشرة.

قرّب تسعة وسبعين من مية إلى أقرب جزء من عشرة.

هنُقَف عند الخانة اللي هنقرّب ليها، اللي هي الجزء من عشرة، اللي هي هنا قيمتها سبعة. يبقى هنشوف يمين السبعة هنلاقيها تسعة. التسعة أكبر من الخمسة، يبقى التقريب هيبقى نزوّد السبعة واحد تبقى تمنية. ويبقى القيمة هي تمنية من عشرة.

قرّب أربعة وتلاتة وتسعين من مية إلى أقرب جزء من عشرة.

هنحطّ خط تحت خانة الجزء من عشرة هنا اللي هي قيمتها تسعة. نشوف الرقم اللي قبلها هنلاقيه تلاتة. ده أقل من الخمسة، يبقى التسعة هتبقى زيّ ما هي. يبقى التقريب هيبقى أربعة وتسعة من عشرة. وهو ده تقريب الأربعة وتلاتة وتسعين من مية.

في مسابقة رمي القرص رمى أحد اللاعبين القرص مسافة قدرها اتنين وأربعين وسبعة من مية مترًا. قرّب هذا العدد إلى أقرب جزء من عشرة.

عايزين نقرّب الاتنين وأربعين وسبعة من مية لأقرب جزء من عشرة. هنشوف الخانة بتاعة الجزء من عشرة فيها إيه، اللي هي فيها الصفر. الرقم اللي قبل الصفر على طول هو السبعة. ده قيمته أكبر من الخمسة. يبقى هنزوّد الصفر اللي في خانة جزء من عشرة، هنزوّده يبقى واحد. يبقى التقريب إلى أقرب جزء من عشرة هو اتنين وأربعين وواحد من عشرة.

اتكلّمنا في الفيديو ده عن تقريب الأعداد العشرية لأقرب جزء من عشرة. وعرفنا إزاي بنقرّبها باستخدام قواعد التقريب. اللي بتقول إن لو الرقم الواقع على يمين الرقم اللي هنقرّب ليه أقل من الخمسة، يبقى هيبقى كما هو. لكن لو كان خمسة فما فوق، يبقى هنزوّده واحد.