تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.

فيديو: تمثيل دوال النمو الأُسِّي بيانيًّا

أحمد لطفي

يوضح الفيديو تعريف دوال النمو الأُسِّي، وكيفية تمثيلها بيانيًّا.

٠٣:١٧

‏نسخة الفيديو النصية

هنتكلم عن تمثيل دوال النمو الأُسي بيانيًّا، وهنعرف إيه هي دوال النمو الأسي، وإزاي هنقدر نمثّل دوال النمو الأسي بيانيًّا.

في البداية لو عندنا دالة بالشكل ده ص بتساوي خمسة أُس س، هنلاحظ إن في الدالة دي الأساس بيكون ثابت، والأُس بيكون متغير مستقل، وبالتالي هنسمي الدالة دي دالة أُسية؛ يبقى الدالة الأُسية هي دالة ليها أساس ثابت وأُس متغير مستقل.

دالة النمو الأسي هو نوع من أنواع الدوال الأُسية، وبتكون على الشكل ده، د س بتساوي ب أُس س؛ حيث ب أكبر من الواحد.

والتمثيل البياني لدالة النمو الأسي بيكون ليه خط تقارب، وهو الخط اللي بيقرّب منه منحنى الدالة. في صفحة جديدة هنشوف الدالة الرئيسية لدوال النمو الأسي. أول حاجة الدالة الرئيسية هتكون على الشكل ده. تاني حاجة خصائص منحنى الدالة هتكون متصلة، وهتكون الدالة أُحادية، وهتكون الدالة متزايدة. وبالنسبة للمجال فمجال دالة النمو الأسي بيكون هو جميع الأعداد الحقيقية، وبالنسبة للمدى فمدى دالة النمو الأسي بيكون هو جميع الأعداد الحقيقية الموجبة، وبالنسبة لخط التقارب هيكون محور السينات، وآخر حاجة بالنسبة لنقطة التقاطع مع محور الصادات هتكون هي النقطة صفر وواحد. لو عايزين نشوف إزاي هنقدر نمثّل بيانيًّا دالة النمو الأسي، صفحة جديدة هناخد مثال. لو عندنا مثال بالشكل ده، مطلوب نمثّل الدالة ص بتساوي تلاتة أُس س بيانيًّا، ونحدد المجال والمدى. أول خطوة هنستخدم جدول القيم، وهنعوّض عن قيم في س ونِوجد قيم ص المناظرة ليها، وهتكون بالشكل ده. هنمثّل الدالة بيانيًّا باستخدام جدول القيم، فهتكون بالشكل ده. محتاجين نحدد المجال والمدى، فالمجال هيكون هو جميع الأعداد الحقيقية، والمدى هو جميع الأعداد الحقيقية الموجبة.

ويبقي كده قدرنا نمثّل بيانيًّا الدالة ص بتساوي تلاتة أُس س ونحدد مجالها ومداها.

ويبقى في النهاية عرفنا يعني دالة النمو الأُسي، وعرفنا إزاي هنقدر نمثّل دالة النمو الأُسي بيانيًّا.