تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.

فيديو: ضرب عدد صحيح في مضاعفات ۱۰

سوزان فائق

يوضح الفيديو كيفية ضرب عدد صحيح في مضاعفات العدد ۱۰، بطريقتين مختلفتين: استخدام خواص الضرب، وترتيب الأعداد بعضها فوق بعضها.

٠٨:٥٣

‏نسخة الفيديو النصية

هنتكلّم في الفيديو ده إزّاي نضرب عدد صحيح في مضاعفات العشرة.

هنستخدم طريقتين: أول طريقة هيكون فيها خواصّ الضرب. والطريقة التانية بإن إحنا هنرتّب العددين فوق بعض، ونضربهم. مضاعفات العشرة، اللي هي لمّا هنضربها في اتنين بتبقى عشرين، ولمّا بنضربها في تلاتة بتبقى تلاتين. في كل مرة بنضرب العشرة في عدد بننزّل الصفر زيّ ما هو، وبعدين نضرب العدد اللي هو مدّيهولنا في الواحد.

فبيبقى اتنين في واحد باتنين. لكن بنحطّها فين؟ بنحطّها في خانة العشرات؛ لأن الواحد دي في خانة العشرات. فبيبقى اتنين في الواحد اللي من خانة العشرات يعني العشرة مرتين، فبتبقى عشرين. والتلاتة بتبقى العشرة تلات مرات، فبتبقى تلاتين. بننزّل الصفر، وبعد كده نضرب التلاتة في الواحد، بتبقى بتلاتة. ونحطّها في خانة العشرات. ونفس الكلام بالنسبة للأربعة. نحطّ الصفر الأول، وبعد كده نضرب الواحد في الأربعة، فبتبقى أربعة. ونحطّ الأربعة في خانة العشرات. ده بالظبط اللي بنعمله في كل مرة نضرب عدد في مضاعفات العشرة.

فلو عايزين نضرب عشرين في خمسة وعشرين، بنبقى عارفين إن دايمًا فيه صفر معانا في الناتج، اللي هو اللي موجود في العشرين. وبعد كده بنضرب الاتنين في الخمسة وعشرين، يعني خمسة وعشرين مرتين، فهتبقى خمسين. ومعانا كان فيه صفر في الأول. يبقى الناتج بتاع العشرين في الخمسة وعشرين هيبقى خمسمية. وعايزين نعرف الطريقة اللي هنحلّ بيها هتبقى إزّاي. الطريقة الأولى، اللي هي باستخدام خواصّ الضرب، الخمسة وعشرين في العشرين. أول خطوة هنشوف العشرين دي عبارة عن كام في عشرة. هي عبارة عن عشرة في اتنين.

بعد كده هنستخدم خواصّ الإبدال؛ علشان نضرب الخمسة وعشرين في الاتنين، وبعدين يبقى باقيلنا اللي هيطلع. هنضربه في العشرة مباشرةً، اللي هو نحطّ الصفر وبعدين العدد. بعد كده نستخدم خاصية الدمج. ضرب الخمسة وعشرين في الاتنين. هتساوي خمسة وعشرين في اتنين. هندمجهم مع بعض، وكل اللي هيطلع هنضربه في عشرة. الخمسة وعشرين في اتنين يعني الخمسة وعشرين مرتين، بتساوي خمسين. في العشرة، يبقى هيساوي … الصفر هينزل، والصفر التاني ينزل، وبعد كده نضرب الخمسة في الواحد، ونحطّها في الخانة اللي بعد الصفرين. يبقى الناتج خمسمية. ودي طريقة اللي باستخدام خواصّ الضرب.

هنتكلّم على طريقة تانية. الطريقة التانية: إن إحنا نحطّ العددين فوق بعض بالشكل ده. الخانات كلّ خانة قصاد الخانة اللي زيّها في العدد التاني. يعني الخمسة مع الصفر في خانة الآحاد. والاتنين مع الاتنين في خانة العشرات. وبعد كده هنضرب الآحاد اللي في العدد التاني، نضربها في العدد كله، اللي هو خمسة وعشرين. صفر في خمسة وعشرين في الآحاد هتبقى بصفر، وتنزل في الآحاد. بعد كده نضرب الاتنين اللي في خانة العشرات في الخمسة وعشرين، وبعدين تنزل في العشرات. اتنين في خمسة وعشرين بتساوي خمسين. وتنزل ابتداءً من خانة العشرات، اللي هي هتبقى كده. يبقى الخمسة وعشرين في عشرين هتساوي خمسمية.

ناخد مثال تاني. عايزين نضرب تسعة وتلاتين في أربعين.

باستخدام الطريقة الأولى، اللي فيها خواصّ الضرب، يبقى التسعة وتلاتين في … الأربعين عبارة عن عشرة في أربعة. هتساوي … نستخدم خاصية الإبدال؛ عشان نضرب التسعة وتلاتين في الأربعة. وبعد كده ندمج التسعة وتلاتين مع الأربعة. التسعة وتلاتين في الأربعة بمية ستة وخمسين. في العشرة … هننزّل الصفر في خانة الآحاد. وبعد كده المية ستة وخمسين في الواحد هتبقى مية ستة وخمسين من بعد خانة الآحاد اللي حطّينا فيها الصفر. يبقى الناتج ألف خمسمية وستين.

باستخدام الطريقة التانية؛ بإن إحنا نرتّب العددين فوق بعض بالشكل ده، ونضربهم. هنبدأ بخانة الآحاد، اللي في الأربعين، فيها الصفر. يبقى صفر في تسعة وتلاتين هتبقى صفر في الآحاد. وبعد كده الأربعة في التسعة وتلاتين. يعني أربع عشرات في التسعة وتلاتين، هتبقى مية ستة وخمسين. ونبدأ من عند خانة العشرات. يبقى الناتج ألف خمسمية وستين.

في مثال: لدى متجر تلاتين ساعة حائط. إذا كان ثمن سعر الواحدة منها ميتين خمسة وعشرين جنيه، فما ثمن هذه الساعات؟

عايزين نضرب التلاتين في الميتين خمسة وعشرين؛ عشان نعرف تمن الساعات الكلّي. لو استخدمنا الطريقة التانية اللي فيها ترتيب العددين فوق بعض، بحيث إن كل خانة تحتيها الخانة اللي زيّها، يبقى هيبقى بالشكل ده. هنضرب خانة الآحاد، اللي فيها الصفر، في الميتين خمسة وعشرين، هيبقى صفر. بعد كده التلاتة في خانة العشرات، هنضربها في الميتين خمسة وعشرين. نحسبها على الجنب كده. يبقى ميتين خمسة وعشرين في تلاتة. خمسة في التلاتة بخمستاشر. معانا الواحد. واتنين في تلاتة بستة. وواحد، آدي سبعة. والتلاتة في اتنين بستة. يبقى خانة الآحاد فيها الصفر. وبعد كده نبدأ ونكتب العدد التاني، اللي هو ستمية خمسة وسبعين ابتداءً من خانة العشرات. يبقى حاصل الضرب ميتين خمسة وعشرين في تلاتين هو ست آلاف سبعمية وخمسين. إذن ثمن الساعات هو ست آلاف سبعمية وخمسين جنيه.

فتاة لديها عشر ألبومات، حيث يحتوي كل واحد منها على ربعمية أربعة وتسعين طابعًا. فكم طابعًا لديها؟

عايزين نضرب العشرة في ربعمية أربعة وتسعين؛ عشان نعرف كام طابع عندها. أول حاجة هننزّل الصفر بتاع العشرة؛ علشان يبقى في خانة الآحاد. وبعد كده نضرب العدد ربعمية أربعة وتسعين في الواحد من العشرات. يعني هنبدأ بعد خانة الصفر، ونكتب العدد اللي هو حاصل ضرب ربعمية أربعة وتسعين في الواحد. يبقى ربعمية أربعة وتسعين من بعد خانة الآحاد اللي فيها الصفر. إذن الفتاة لديها أربعة آلاف تسعمية وأربعين طابعًا.

اتكلّمنا في الفيديو ده عن ضرب أيّ عدد صحيح في مضاعفات العشرة. وعرفنا إن مضاعفات العشرة، اللي هي العشرة في الاتنين، العشرة في التلاتة، العشرة في الأربعة، العشرة في خمسة، وهكذا. فيه طريقتين للضرب؛ واحدة باستخدام خواصّ الضرب، والتانية بإن إحنا نرتّب العددين فوق بعض، ونضربهم. دايمًا بننزّل الصفر اللي موجود في مضاعفات العشرة. وبعد كده نضرب خانة العشرات اللي موجودة في العشرة أو مضاعفاتها، نضربها في العدد اللي عندنا. وبعدين نبدأ نكتب من عند خانة العشرات حاصل الضرب.