نسخة الفيديو النصية
أوجد مجموع المصفوفات التالية. المصفوفة؛ الصف الأول: تمنية وحداشر، الصف التاني: سالب تلاتة وسبعة. زائد المصفوفة؛ الصف الأول: عشرة وسالب واحد، والصف التاني: تلاتة وواحد.
في البداية لو عايزين نجمع مصفوفتين بالشكل ده: المصفوفة: الصف الأول أ و ب، والصف التاني ت و ج، زائد المصفوفة: الصف الأول س و ص، والصف التاني ل و ع؛ فالناتج هيساوي … هنجمع العنصر اللي في الصف الأول العمود الأول في المصفوفة الأولى اللي هو أ، زائد العنصر اللي في الصف الأول العمود الأول في المصفوفة التانية اللي هو س، وهيكون ناتج الجمع في الصف الأول العمود الأول. وهنجمع العنصر اللي في الصف الأول العمود التاني في المصفوفة الأولى اللي هو ب، زائد العنصر اللي في الصف الأول العمود التاني في المصفوفة الثانية اللي هو ص، وهنكتب ناتج الجمع في الصف الأول العمود التاني. وهنجمع العنصر اللي في الصف التاني العمود الأول في المصفوفة الأولى اللي هو ت، زائد العنصر اللي في الصف التاني العمود الأول في المصفوفة التانية اللي هو ل، وهنكتب ناتج الجمع في الصف التاني العمود الأول في مصفوفة الناتج. وأيضًا العنصر اللي في الصف التاني العمود التاني في المصفوفة الأولى اللي هو ج، هنجمعه على العنصر اللي في الصف التاني العمود التاني في المصفوفة التانية اللي هو ع، وهنكتب الناتج في الصف التاني العمود التاني في مصفوفة الناتج.
وبالتالي ناتج الجمع هيساوي المصفوفة: الصف الأول: أ زائد س، ب زائد ص، الصف التاني: ت زائد ل، ج زائد ع.
يعني بالنسبة للمصفوفات المعطاة فناتج الجمع هيساوي: المصفوفة تمنية زائد عشرة، وحداشر زائد سالب واحد؛ وسالب تلاتة زائد تلاتة، وسبعة زائد واحد.
يعني هيساوي المصفوفة … تمنية زائد عشرة هيساوي تمنتاشر، حداشر زائد سالب واحد هيساوي عشرة، سالب تلاتة زائد تلاتة هيساوي صفر، سبعة زائد واحد هيساوي تمنية. يعني ناتج الجمع هيساوي المصفوفة: الصف الأول تمنتاشر وعشرة، والصف التاني صفر وتمنية.
ويبقى كده قدرنا نوجد مجموع المصفوفتين.
