فيديو: طرح عددين حتى ٩٩٩

لدى صبي ٥٥٠ قرشًا، أنفق منها ٢٢٥ قرشًا. كم تبقى معه من المال؟

٠٢:٠٥

‏نسخة الفيديو النصية

لدى صبيّ خمسمية وخمسين قرشًا. أنفق منها ميتين خمسة وعشرين قرشًا. كم تبقّى معه من المال؟

يعني دلوقتي الصبي اللي قدامنا ده، كان معاه خمسمية وخمسين قرش. صرف منهم؛ يعني المبلغ ده قلّ بعد ما صرف منه. يعني هنطرح منهم المبلغ اللي صرفه. المبلغ ده ميتين خمسة وعشرين قرش. يعني كان معاه خمسمية وخمسين قرش. صرف منهم ميتين خمسة وعشرين قرش. فعايزين نعرف المبلغ المتبقي معاه. يبقى هنبتدي نعمل عملية طرح.

هنبدأ بالمبلغ اللي كان معاه، اللي هو خمسمية وخمسين قرش. وبعدين هنطرح منه المبلغ اللي أنفقه، اللي هو ميتين خمسة وعشرين قرش. ونتأكد قبل ما نبتدي ننفّذ عملية الطرح، إن إحنا حاطّين الأرقام تحت بعض. كل رقم في الخانة المكانية الصحيحة. وحاطّين الآحاد تحت الآحاد. والعشرات تحت العشرات. والمئات تحت المئات. وبنبدا دايمًا عملية الطرح من خانة الآحاد.

صفر ناقص خمسة. الخمسة أكبر من الصفر، فمش هينفع نطرح الخمسة من الصفر. فهنتحرك لخانة العشرات، ونشوف الرقم اللي موجود فيها. موجود فيها الرقم خمسة. هناخد منه واحد، فهيصبح فيها الرقم أربعة. والواحد اللي أخدناه من خانة العشرات، بيمثّل عشرة في خانة الآحاد. فيبقى كده الآحاد هيصبح فيها عشرة. ودلوقتي نقدر نطرح الأرقام اللي موجودة في خانة الآحاد. عشرة ناقص خمسة يساوي خمسة.

وبعدين نطرح الأرقام اللي موجودة في خانة العشرات؛ أربعة ناقص اتنين يساوي اتنين. وبعدين نطرح الأرقام اللي في خانة المئات؛ خمسة ناقص اتنين يساوي تلاتة. وناتج الطرح اللي حصلنا عليه ده، اللي هو تلتمية خمسة وعشرين قرشًا، هو المبلغ المتبقّي معاه من المال.

يبقى كده الصبي لمّا كان معاه خمسمية وخمسين قرشًا. وأنفق منها ميتين خمسة وعشرين قرشًا. هيتبقّى معاه تلتمية خمسة وعشرين قرشًا.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.