نسخة الفيديو النصية
هنتكلم عن إيجاد المدى الرُّبيعي لمجموعة بيانات. في الفيديو ده هنعرف إيه هو المدى الرُّبيعي وكمان هنعرف إزاي نوجده.
لو عندنا مجموعة بيانات هنلاقي إن نُص البيانات دي بيقع بين الرُّبيعين الأدنى والأعلى، وده هيوصلنا للمدى الرُّبيعي اللي يعتبر مقياس من مقاييس التشتُّت، والمدى الرُّبيعي هو مدى نُص البيانات اللي بتقع في الوسط، وهو عبارة عن الفرق بين الرُّبيعين الأعلى والأدنى؛ يعني المدى الرُّبيعي يساوي الرُّبيع الأعلى ناقص الرُّبيع الأدنى، كده إحنا عرفنا إيه هو المدى الرُّبيعي، بعد كده هنشوف مثال نوضح بيه إزاي نوجد المدى الرُّبيعي لمجموعة بيانات.
عندنا في المثال إن نتايج اختبار عمر في مادة الرياضيات هي تسعين، واتنين وتسعين، وتسعة وستين، وستة وسبعين، وتلاتة وتسعين، وأربعة وتمانين، والمطلوب إيجاد المدى والمدى الرُّبيعي لدرجات عمر. هنبدأ أول حاجة نوجِد المدى، من تعريف المدى: المدى هو الفرق بين القيمتين العظمى والصغرى لمجموعة البيانات، ومن خلال البيانات اللي عندنا هنلاقي إن القيمة العظمى هي تلاتة وتسعين، والقيمة الصغرى هي تسعة وستين؛ معنى كده إن المدى لمجموعة البيانات اللي عندنا يساوي تلاتة وتسعين ناقص تسعة وستين؛ يعني هيساوي أربعة وعشرين، بكده بقى إحنا أوجدنا المدى لدرجات عمر.
بعد كده هنوجد المدى الرُّبيعي، بالنسبة للمدى الرُّبيعي فهو يساوي الرُّبيع الأعلى ناقص الرُّبيع الأدنى، معنى كده علشان نوجد المدى الرُّبيعي محتاجين نوجد الأول الرُّبيع الأعلى والرُّبيع الأدنى، ففي الأول هنرتب البيانات اللي عندنا ترتيب تصاعدي، فهنلاقي الترتيب عبارة عن تسعة وستين، وستة وسبعين، وأربعة وتمانين، وتسعين، واتنين وتسعين، وتلاتة وتسعين. بعد كده هنحدد مكان الوسيط اللي بيقسم مجموعة البيانات لجزئين متساويين، فهنلاقي مكانه بين القيمتين أربعة وتمانين وتسعين؛ يعني مكانه هنا، وقيمته هتساوي الوسط الحسابي للقيمتين دول، لكن إحنا مش محتاجين قيمة الوسيط، إحنا محتاجين قيمة الرُّبيع الأعلى والرُّبيع الأدنى، فهنبدأ نوجد الرُّبيع الأدنى واللي هو الوسيط للنُّص الأدنى من مجموعة البيانات، معنى كده إن الرُّبيع الأدنى هو ستة وسبعين، بعد كده هنوجد الرُّبيع الأعلى واللي هو الوسيط للنص الأعلى من مجموعة البيانات واللي هو النص ده، معنى كده إن الرُّبيع الأعلى هو اتنين وتسعين؛ كده إحنا حددنا قيمة الرُّبيع الأدنى وقيمة الرُّبيع الأعلى، معنى كده إن المدى الرُّبيعي يساوي اتنين وتسعين ناقص ستة وسبعين يعني يساوي ستاشر؛ بكده يبقى إحنا أوجدنا المدي الرُّبيعي لدرجات عمر.
بكده يبقى إحنا في الفيديو ده عرفنا إن المدى الرُّبيعي هو مقياس من مقاييس التشتُّت، وكمان عرفنا إن هو مدى نُص البيانات اللي بتقع في الوسط، وعرفنا إن هو عبارة عن الفرق بين الرُّبيعين الأعلى والأدنى، وعلشان كده المدى الرُّبيعي يساوي الرُّبيع الأعلى ناقص الرُّبيع الأدنى، وكمان شُفنا من خلال أمثلة إزاي نوجد المدى الرُّبيعي لمجموعة بيانات.
