فيديو: تحديد المقادير المتساوية التي تتضمَّن قسمة الأعداد حتى ١٠٠

أيٌّ من الاختيارات التالية يساوي ١٨ ÷ ٣؟ [أ] ٣٠ ÷ ٦ [ب] ١٨ ÷ ٥ [ج] ١٨ ÷ ٦ [د] ٣٠ ÷ ٥

٠٤:١٠

‏نسخة الفيديو النصية

أيٌّ من الاختيارات التالية يساوي تمنتاشر على تلاتة؟ عندنا أربع اختيارات؛ الاختيار الأول: تلاتين على ستة. الاختيار التاني: تمنتاشر على خمسة. والاختيار التالت: تمنتاشر على ستة. والاختيار الرابع: تلاتين على خمسة.

عشان نقدر نوجد أيّ من الاختيارات اللي قدامنا دول هيدّينا نفس ناتج عملية القسمة المعطاة في السؤال، اللي هي تمنتاشر على تلاتة. يبقى لازم الأول نوجد ناتج عملية القسمة دي. عملية القسمة هي العملية العكسية لعملية الضرب. يعني لمّا نيجي نقول: تمنتاشر على تلاتة، وعايزين نوجد ناتج القسمة، معناها إن إحنا عايزين نشوف إيه العدد اللي لو تمّ ضربه في تلاتة، هيبقى حاصل الضرب تمنتاشر.

خلّينا نرجع لجدول التلاتة، هنلاقي إن حاصل ضرب تلاتة في واحد يساوي تلاتة. وتلاتة في اتنين يساوي ستة. وحاصل ضرب تلاتة في تلاتة يساوي تسعة. وحاصل ضرب تلاتة في أربعة يساوي اتناشر. وتلاتة في خمسة يساوي خمستاشر. وحاصل ضرب تلاتة في ستة يساوي تمنتاشر. يبقى كده عرفنا إن العدد اللي لو ضربناه في تلاتة هيدّينا حاصل ضرب تمنتاشر هو العدد ستة. يبقى ده معناه لمّا نيجي نقسم تمنتاشر على تلاتة، فناتج القسمة هيساوي ستة. يبقى خارج قسمة تمنتاشر على تلاتة يساوي ستة.

يبقى عايزين نشوف أيّ من عمليات القسمة اللي قدامنا دول هيدّينا نفس خارج القسمة. هنبدأ نشوف الاختيار الأول. هنلاقي فيه عملية قسمة للعدد تلاتين على العدد ستة. يعني عايزين نعرف إيه العدد اللي لو ضربناه في ستة حاصل الضرب هيبقى بيساوي تلاتين.

هنرجع نفتكر مع بعض جدول الضرب الخاص بالعدد ستة. هنلاقي إن ستة في واحد يساوي ستة. وستة في اتنين يساوي اتناشر. وستة في تلاتة يساوي تمنتاشر. ستة في أربعة يساوي أربعة وعشرين. وستة في خمسة يساوي تلاتين. يبقى كده وصلنا لحاصل الضرب تلاتين. يعني لو قسمناه على العدد ستة، هيبقى خارج القسمة بيساوي خمسة. يبقى كده وصلنا لخارج القسمة اللي هنا، اللي هو هيبقى العدد خمسة. وطبعًا خارج القسمة في الحالة دي لا يساوي خارج القسمة اللي معطى في السؤال.

دلوقتي هنشوف الاختيار التاني. وعايزين نوجد خارج عملية القسمة اللي عندنا دي. عايزين نشوف تمنتاشر على خمسة يساوي كام. ده معناها إن إحنا محتاجين نعرف إيه العدد اللي لو ضربناه في خمسة، يصبح حاصل الضرب تمنتاشر. لو شُفنا جدول الخمسة، هنلاقي إن ما فيش أيّ عدد صحيح لو ضربناه في العدد خمسة هيدّينا حاصل ضرب تمنتاشر. ده معناه إن لمّا نيجي نقسم تمنتاشر على خمسة، فالنتيجة عمرها ما هتبقى عدد صحيح. النتيجة هتبقى عدد عشري، اللي هو هيطلع تلاتة وستة من عشرة. وده بالتأكيد ما بيساويش خارج عملية القسمة اللي معطاة عندنا في السؤال.

دلوقتي هنشوف الاختيار التالت اللي عندنا. عايزين نوجد خارج عملية القسمة دي: تمنتاشر على ستة. يعني عايزين نشوف إيه العدد اللي لو ضربناه في ستة، هنحصل على حاصل ضرب تمنتاشر. لو رجعنا لجدول الضرب الخاص بالعدد ستة، هنلاقي إننا لو ضربنا ستة في تلاتة، فحاصل الضرب هيبقى تمنتاشر. وبالتالي فلمّا نيجي نقسم تمنتاشر على ستة، فخارج عملية القسمة هيبقى بيساوي تلاتة. وده برضو لا يساوي خارج القسمة اللي معطى عندنا في السؤال.

آخر اختيار عندنا هو عملية القسمة تلاتين على خمسة. عايزين نشوف إيه العدد اللي لو ضربناه في العدد خمسة، هنحصل على حاصل ضرب تلاتين. هنرجع لجدول الضرب الخاص بالعدد خمسة، هنلاقي إن حاصل ضرب خمسة في ستة يساوي تلاتين. يبقى لو جينا نقسم تلاتين على خمسة، فخارج القسمة هيبقى بيساوي ستة.

يبقى الاختيار اللي عندنا ده، خارج القسمة هيساوي ستة. وده الاختيار الوحيد اللي بيدّينا نفس خارج القسمة للعملية الحسابية اللي موجودة عندنا في السؤال، اللي هي تمنتاشر على تلاتة. وكان خارج القسمة فيها يساوي ستة.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.