فيديو: إيجاد عدد بمعلومية صورته التحليلية

أوجد قيمة ٨ + ١٠ + ٤٠٠ + ٠ + ٤٠٠٠٠ + ٢٠٠٠٠٠ + ٢٠٠٠٠٠٠ + ٦٠٠٠٠٠٠٠ + ٣٠٠٠٠٠٠٠٠.

٠٣:١٤

‏نسخة الفيديو النصية

أوجد قيمة تمنية، زائد عشرة، زائد ربعمية، زائد صفر، زائد أربعين ألف، زائد ميتين ألف، زائد اتنين مليون، زائد ستين مليون، زائد تلتمية مليون.

لو بصينا كويس على الصورة اللي قدامنا دي، هنفتكر الصورة التحليلية اللي كنّا بنكتب بيها أي عدد، اللي هي بتبقى عبارة عن مجموع القيم المكانية للأرقام اللي بيتكوّن منها العدد ده. يعني دلوقتي لو حبينا نعرف القيمة بتاعة عمليات الجمع اللي عندنا دي، كل اللي علينا إن إحنا نحط كل رقم من الأرقام المناظرة في القيمة المكانية بتاعته، ونقدر نستنتج منها العدد مكتوب بالصورة القياسية.

هنستعين بقى بجدول القيم المكانية، عشان نحط كل رقم من الأرقام اللي بيتكوّن منها العدد في الخانة المكانية الصحيحة. هنلاقي أول عدد بيتم جمعه هنا بيبقى عدد مكوّن من رقم واحد، وهو بيبقى الرقم اللي بيمثّل الآحاد في العدد اللي إحنا بنكوّنه. فالتمنية دي هتبقى في الآحاد.

بعد كده العدد التاني اللي بيتم جمعه بيمثّل الخانة المكانية اللي بعد كده. عندنا عشرة دي معناها إن عندنا واحد في خانة العشرات، عشان كده فيه واحد وجنبه صفر اللي هو بيمثّل القيمة المكانية للخانة المكانية دي.

العدد اللي بعد كده هو ربعمية. ربعمية دي معناها أربعة، وفيه صفرين يعني خانة المئات. يبقى عندنا أربعة في خانة المئات.

العدد اللي بعد كده هو صفر. المفروض ده خاص بالخانة المكانية اللي هي الألوف. يبقى كده عندنا فيها صفر في خانة الألوف.

بعد كده عندنا أربعين ألف. أربعين ألف دي معناها أربعة، وعندنا أربع أصفار يعني خانة عشرات الألوف. يبقى عندنا الرقم أربعة في خانة عشرات الألوف.

بعد كده عندنا ميتين ألف. يعني الرقم اتنين، وعندنا خمس أصفار يعني مئات الألوف. يبقى عندنا اتنين في خانة مئات الألوف.

بعد كده بنجمع اتنين مليون. معناها إن فيه الرقم اتنين في خانة الملايين. ست أصفار دي معناها ملايين، يبقى فيه اتنين في خانة الملايين.

بعد كده بنجمع ستين مليون. معناها ستة، وفيه سبعة أصفار يبقى دي خانة عشرات الملايين. يبقى فيه ستة في خانة عشرات الملايين.

بعد كده بنجمع تلتمية مليون، اللي هو عبارة عن تلاتة في خانة مئات الملايين. عندنا تمن أصفار؛ يبقى دي خانة مئات الملايين. يبقى هنحط الرقم تلاتة في الخانة دي.

يبقى كده قدرنا نوجد قيمة جمع مجموعة الأعداد اللي قدامنا دي، اللي هي أصلًا بتعبّر عن الصورة التحليلية لعدد ما. المجموع بقى هو بيمثّل الصورة القياسية للعدد. فإحنا كده قدرنا إن إحنا نوجد الصورة القياسية للعدد، أو القيمة المطلوبة اللي هو هيبقى تلتمية اتنين وستين مليون، ميتين وأربعين ألف، ربعمية وتمنتاشر.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.