فيديو: الأجزاء من عشرة والأجزاء من مائة

يتناول الفيديو طريقة كتابة الأجزاء من عشرة والأعداد من مائة على شكل أعداد عشرية أو على شكل كسور وكيفية قراءتها.

٠٥:٠٨

‏نسخة الفيديو النصية

الأجزاء من عشرة، والأجزاء من مائة.

هنعرف في الدرس ده، إزاي نقدر نتعرّف على الأجزاء من عشرة، والأجزاء من مية. وإزاي نقدر نكتبها، ونقراها. ممكن نكتبها على شكل أعداد عشرية، أو على شكل كسور. لو سعر التذكرة للطفل، لركوب هذه الحافلة، هو خمسة وتمانين قرشًا. عايزين نكتب قيمة التذكرة دي، اللي هي تعتبر كسر من الجنيه، نكتبها مرة على شكل كسر، ومرة على شكل عدد عشري.

العدد العشري هو عبارة عن عدد، بنستخدم فيه القيمة المكانية، والعلامة العشرية؛ ليمثل جزءًا من كل. هنشوف زيّ المثال اللي عندنا ده. عندنا خمسة وتمانين قرش، اللي هي عبارة عن تذكرة الطفل، لركوب الحافلة. الخمسة وتمانين قرش دي، عبارة عن كسر من الجنيه. فلو حبّينا نمثّلها على شكل نموذج، هنجيب نموذج المائة. يعني متقسّم لمية جزء متساوي. وهنظلل خمسة وتمانين جزء من المية دي. هي دي هتبقى القيمة المناظرة لقيمة التذكرة، كجزء من الجنيه.

ظللنا خمسة وتمانين جزء من المائة، اللي في النموذج اللي قدامنا. وده قُلنا إن هو اللي بيكافئ، أو اللي بيمثّل خمسة وتمانين قرش. اللي هو خمسة وتمانين جزء من المائة. دلوقتي هنقرا العدد ده، بالطريقة دي: خمسة وثمانون جزءًا من مائة.

بالنسبة لطريقة الكتابة، فبنقدر نكتبه بطريقتين. يا إمّا نكتبه كده: ٨٥/ ١٠٠، على شكل كسر. أو بنكتبه على شكل عدد عشري. بالشكل ده: ٠٫٨٥. صفر، جنبها علامة عشرية، جنبها خمسة وتمانين؛ اللي هي خمسة وتمانين جزء من مائة.

نقدر نستخدم كمان الجدول بتاع القيم المكانية، عشان نقدر نعبّر عن العدد اللي عندنا ده. هنحطّ العلامة العشرية بين الآحاد، وبين الأجزاء من عشرة. هنبدأ نشوف العدد اللي عندنا. خمسة وتمانين قرشًا ده، عبارة عن كسر من الواحد، كسر من الجنيه. فهنحطّ في الآحاد هنا، ما فيش عدد صحيح. الآحاد هنا هتبقى صفر. يبقى هنحطّ في الآحاد هنا ٠.

والخمسة وتمانين قرش دول، عبارة عن خمسة وتمانين جزء من مائة. فهنكتب هنا ٨٥. ده هنقراه زيّ ما شُفنا بالطريقة الأولى: خمسة وثمانون جزءًا من مائة. وبرضو بنفس الطريقة؛ يا إمّا بنكتبه على شكل كسر، اللي هو: ٨٥/ ١٠٠. أو على شكل عدد عشري، اللي هو ٠٫٨٥.

هنشوف في صفحة جديدة مثال تاني. لو كان مطلوب منّنا نكتب العدد: ٥/ ١٠. الكسر ده، عايزين نكتبه على شكل عددين عشريين مختلفين. ممكن نستخدم نموذج العشرة، عشان نمثّل الكسر اللي عندنا. هنظلل خمس أجزاء من العشرة. ده هيبقى بيمثّل الكسر اللي هو ٥/ ١٠. هنكتبه على شكل عدد عشري. هيُقرأ: خمسة أجزاء من عشرة. أمّا بالنسبة لطريقة كتابته، فهتتكتب بالشكل ده. خمسة أجزاء من عشرة بتتكتب بالطريقة دي: ٠٫٥.

وممكن نمثّله على نموذج المائة. لو ظللنا خمس أجزاء من كل عشرة أجزاء. ده معناها إن من المية جزء اللي عندنا في النموذج ده، هنظلل خمسين جزء. يعني خمس أعمدة من اللي قدامنا دول، اللي هم بيوازوا، أو بيكافئوا خمسين جزء من المائة. ولو جينا نكتبها على شكل عدد عشري، هنكتبها بالشكل ده: ٠٫٥٠. أيْ خمسون جزءًا من المائة.

ومن هنا نقدر نستنتج إن ٠٫٥، أو ٠٫٥٠، دول عبارة عن أعداد عشرية متكافئة. متكافئة يعني ليهم نفس القيمة.

عرفنا في الدرس ده إزاي نقدر نتعرّف على الأجزاء من عشرة، والأجزاء من مية. وإزاي نقدر نكتبها على شكل أعداد عشرية، أو على شكل كسور.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.